Ppën 20 - Mankanya

Iko iñeen yi Naşibaţi aţuuŋ pdo kaţaş

¹ Ŋţup bŧi ŋi Naşibaţi aţupuŋ bañaaŋ biki Iŧrayel ŋii ŋi :

² aji na baka : « Nji dwooŋ Yawe Nawat Kabuka, Naşibaţi i nu, andoliiŋ kë ipën du Ejiptu, uŧaak wi babiiŋ ajuuknţënaanu.

³ « Iinkdëman nin uko uloŋ bë mënţ nji a.

⁴ « Iinkboman nin uko uloŋ unnaamuŋ na iko inwooŋ du baţi këme ţi mboş, këme ţi meel manwooŋ ţi mboş uţeeh kado kadëman ya.

⁵ Iinkŋup ţi kadun ki ŋnŧoŋ mënţ kadëman ŋa kabot kalempar ŋa, nji Nawat Kabuka, dwo Naşibaţi i nu, awo mënji kaţok nin uko uloŋ, pjuban pi banşoornuŋ paji paţu nkob baka, babuk baka te du bamumiin.

⁶ Kë banŋalnuŋ abot amëban uko wi nţuuŋ baka pdo, baji baţu nwul bañaaŋ baŧum maakan bampënnuŋ ţi baka bnuura.

⁷ « Iinkdo kanohnaana katim ki Naşibaţi, ţiki Nawat Kabuka aanji miir ñaaŋ anknohnaaniiŋ katimul.

⁸ « Doon kaleş unuur wi pnoorfën, ido wa unuur uyimanaan.

⁹ Ido kalemp ŋnuur paaj, kado iko bŧi yi iwooŋ i pdo ţi ŋnuur mënţan ;

¹⁰ kë unuur uţënk paaj na uloŋ uşë wo unuur wi pnoorfën, unuur wi Nawat kabuka Naşibaţi i nun. Iinkdo nin ulemp uloŋ ţi unuur mënţ, iwi, abuku, nalemparu, na ŋnŧaam ŋi nu, na nayaanţ ambiiŋ ţi katohu.

¹¹ Nji Nawat Kabuka dpaş baţi, mboş, bdëk na iko inwooŋ ţi ya bŧi, ado ya ţi ŋnuur paaj, aşë noorfën ţi uţënk paaj na uloŋ. Ukaaŋ kë Nawat Kabuka awul unuur mënţ bnuura abot ado wa kë uyimani.

¹² « Mëbaan şaaş na naan bnuura ŋnuur ŋi nu ŋahilna ŋaŧum ţi mboş mi Nawat Kabuka Naşibaţi i nu akwuliiŋ.

¹³ « Iinkfiŋ ñaaŋ.

¹⁴ « Iinkpiinţ na ahar ñaaŋ.

¹⁵ « Iinkkiij.

¹⁶ « Iinkţilandër aŧënţu.

¹⁷ « Iinkñeebar bka bi aŧënţu : uwole katoh, aharul, nalemparul, uwit këme ubuuru, iinkñeebar nin uko uloŋ wi nul. »

¹⁸ Bañaaŋ balënk akat kat aşë naţ alow wi baŧiinkuŋ imparantant na ilul akuţ awin iliik liik na udu unkpënnuŋ du pnkuŋ.

¹⁹ Baji wal mënţ na Moyiŧ : « Iwi doon kaţiini na un, ŋŧiinku, ţiki woli Naşibaţi aţiini na un ŋkeţ. »

²⁰ Kë Moyiŧ aşë ŧeem baka aji : « Nawutan kalënk. Naşibaţi abi bi pa ptenan, nahilna nawo naankñooma, nawo naankjuban. »

²¹ Bañaaŋ banaţ alow kë Moyiŧ aşë ya añog du kanfëluŋ kaweek ki Naşibaţi awooŋ.

Bliit bi mngur

²² Yawe Nawat Kabuka aji na Moyiŧ : « Uko wi, wi ikjakuŋ na babuk Iŧrayel : “Nawin, an ţi ŋleefan, jibi nţiiniiŋ na an du baţi duuţ.

²³ Nin naankboman iko iloŋ yi unŧaam këme uwuuru yi nakdooŋ kadëman ji nji Naşibaţi.

²⁴ Naniwën bliit bi mngur na kafuuş : ţi ba duuţ di di nakdooŋ kafiŋaraan ŋnŧaam ŋmpoţi na ŋweek kabot katërna ŋa, ţi ba kak di di nakdooŋ kafiŋaraan ŋnŧaam ŋanwooŋ ŋi bţeŋan bi bŧiinkar. Dko bŧi di nji kadoluŋ katim naan kaleşana, dbi du an kawulan bnuura.

²⁵ Woli nadolën bliit bi mngur na mnlaak, nawutan kado ba na mnlaak mi balempuŋ lemp, ţiki woli nalemp ma nabi ţopan bliit te nji dyimani.

²⁶ Bliit baanwo kakuuŋëţ, banwooŋ uţeeh bawutna kawin bduun bi nul.” »