Ppën 2 - Mankanya

Kabuka ki Moyiŧ

¹ Ñiinţ aloŋ i pşini pi Lewi aya jej ñaaţ i pşini'ul aniim.

² Ñaaţ amobana kayiŋ abuk napoţ ñiinţ. Awin kë anuuraa aşë mena kli kwajanţ.

³ Wi awooŋ aankak ahil pmena kak kajon, aşë jej pkaar pi başiirnuŋ intooliin yi bjaagal bloŋ banwooŋ ţi bdëk akër iko iloŋ meel manwutna kado kaţëp ţi pa. Aţu napoţ da aşë lëmëd pa aya bëkan pa du bdëk du dko di pjaagal pweek.

⁴ Poonu naweek napoţ anaţ alow btiişu katen jibi uko ukţëpari.

⁵ Wal mënţ kë poonu abuk Farawuna naşih i Ejiptu aşë wala du bdëk añowa, kë balemparul baaţ başë duka du pkay aşuumala. Abuk naşih awin pkaar kë pawo ţi meel ţi pjaagal pweek aşë yil nalemparul kë ayaarada pa.

⁶ Ahaabëş pa aşë win napoţ : awo napoţ ñiinţ, awo ţi ŋwooni. Añagi'a aşë ji : « Awo abuk bahebërë. »

⁷ Naweek napoţ aji na abuk Farawuna : « Iŋal nya nla'u nayewi du baaţ bahebërë i ? Ahilan kado kabootana. »

⁸ Kë abuk Farawuna ajaka aji aya. Kë poonu uŋ aya adu anin napoţ.

⁹ Kë poonu abuk Farawuna aji na anin napoţ : « Jejan napoţ i, iya ido kabootan, ddo kaluku. » Kë ñaaţ ajej napoţ aya abootan.

¹⁰ Napoţ adëmi, kë aţija poonu abuk Farawuna. Kë ajeja adola abukul aşë wula katim ki Moyiŧ, ţiki aji : « Dpënanaana du meel. »

Pţi pi Moyiŧ du uŧaak wi Madiyan

¹¹ Moyiŧ adëm akëş ñiinţ, apën unuur uloŋ aya pwin bahebërë bayiţul aşë win ulemp utam wi baţuuŋ baka. Awin aloŋ i Ejiptu kë akkob nahebërë ;

¹² kë aşë kok kokan aten, wi awooŋ aanwin nin aloŋ aşë kob i Ejiptu afiŋ aşë moya ţi pyiw amen.

¹³ Unuur utëbanţën, kë akak apën aşë win bahebërë kë bakgut. Aţiini na anlaaŋ bţup aji : « Wel ukaaŋ kë ikob aŧënţu ba ? »

¹⁴ Kë aŧeem aji : « In ajakiiŋ iwo naweek i nun ba ? Kë iwo nawayëş i nun ? Wom ikak aŋal pfiŋën, jibi ifiŋuŋ i Ejiptu ? » Moyiŧ aji ţi uşalul wal mënţ : « Bañaaŋ bame uko wi ndoluŋ » aşë lënk maakan.

¹⁵ Farawuna kak aŧiink uko mënţ aşë la pfiŋ Moyiŧ. Kë aşë ţi apën du uko Farawuna, aya du uŧaak wi Madiyan aya ţo kakab pliik ploŋ.

¹⁶ Kë naţeŋan aloŋ i uŧaak wi Madiyan aşë ka bapoţ baaţ paaj na aloŋ. Babi pliikandër imbëŋan kadaanan batani bi aşin baka.

¹⁷ Kë bayafan baloŋ başë bi adook baka. Moyiŧ anaţa aya ayeŋan baka aşë daanan batani bi baka.

¹⁸ Bakak du Reuwel aşin baka, kë aşë ji na baka : « Wel ukaaŋ kë naŧar nţa abi ba ? »

¹⁹ Kë baŧeema aji : « Ñiinţ aloŋ i Ejiptu ayeŋanuŋ un wi bayafan bakdooŋ na un, ul adooŋ aliikarun liikar meel abot adaanan ŋnŧaam. »

²⁰ Kë aşë ji na babukul : « Awo ţuŋ ba ? Wel ukaaŋ kë naambi na a ? Naduun'a abi ade na nja ! »

²¹ Moyiŧ adinan, abi fëţ du uko ñiinţ mënţ, kë uŋ awula Ŧipora abukul kë aniimi.

²² Ñaaţ abuk napoţ ñiinţ, kë aţu'a katim ki Gerşom, ţiki aji : « Dwo nayaanţ ţi uŧaak wi. »

Mnţëg mi biki Iŧrayel

²³ Wi baţooŋ ajon, kë naşih i Ejiptu aşë keţ. Bañaaŋ biki Iŧrayel baţëga abot awooni ţi phaj pi bakhajanuŋ baka ţi ulemp. Kë idiim yi baka iban du Naşibaţi.

²⁴ Naşibaţi aŧiink mnţëg mi baka aşë leş bhoŋar bi adoluŋ na Abraham, Iŧaak na Yakob.

²⁵ Awin bañaaŋ biki Iŧrayel na mnhaj mi baka.