Ppën 19 - Mankanya

Pyit pi Moyiŧ na Naşibaţi du pnkuŋ pi Ŧinayi

¹ Bañaaŋ biki Iŧrayel baban du pndiiş pi Ŧinayi ţi unuur uŧeek wi pli pwajanţën wi bapënnuŋ Ejiptu.

² Bawoona Refidim aya aban du pndiiş pi Ŧinayi, atan iloona yi baka da kañog pnkuŋ pweek.

³ Wal mënţ, kë Moyiŧ aşë paya du pnkuŋ pya kayit na Naşibaţi. Yawe Nawat Kabuka aduuna du pnkuŋ duuţ aji na a : « Hënk di di ikyaaŋ kaţiini na babuk Iŧrayel, jakan na baka :

⁴ “Nawin na këş ki nan jibi ndoli bañaaŋ biki Ejiptu na jibi nţijanaŋ ţi, kë nañogën awo ji ukaŧ uweek unjaaŋ ujij ŋbuk wa ţi ibaaklu.

⁵ Hënkuŋ, woli naŧiink pdiim pi naan akuţ amëban bhoŋar bi ŋkdoluŋ, kadolan nawo pntaali pi naan ţi kntaali bŧi, kë mboş bŧi manşë wo mi naan na manjoonan.

⁶ Dmëbanan ji pntaali pi baţeŋan, pntaali pyimanaan.” Uko waŋ wi wi ikyaaŋ kaţup bañaaŋ biki Iŧrayel. »

⁷ Moyiŧ aya adu bantohi biki pntaali aţup baka uko bŧi wi Nawat Kabuka ajakuluŋ ado.

⁸ Kë bañaaŋ bŧi başë ŧeem aji : « Ŋdo iko bŧi yi Nawat Kabuka ajakuŋ. » Kë Moyiŧ aya ţup Nawat Kabuka uko wi bañaaŋ bajakuŋ.

⁹ Nawat Kabuka aji na Moyiŧ : « Dbi du iwi kamena ţi kanfëluŋ kaweek bañaaŋ bahilna baŧiinkën woli dţiini na iwi başë bafiyaaru te mnţo. » Kë Moyiŧ aţup Nawat Kabuka uko wi bañaaŋ bajakuŋ.

¹⁰ Nawat Kabuka aji na Moyiŧ : « Yaan du bañaaŋ iji na baka bado bañow bajinţan ŋleef nţa na faan, banaj imişa yi baka,

¹¹ babomandër pa kankoţan, ţiki unuur mënţ nji Nawat Kabuka dwala ţi kadun ki bañaaŋ bŧi du pnkuŋ pi Ŧinayi.

¹² Woli ibaa, kdo dko di bakţañuŋ kafooyan pnkuŋ : baanwo kapaya pnkuŋ këme kaban ban pa. Ñaaŋ ankbanuŋ pnkuŋ awo i kakeţ.

¹³ Nin ñaaŋ aankbana, batapa tap mnlaak këme işuuri adoo akeţ, awole ñaaŋ këme unŧaam, baankwuta najeb. Wal wi plul pakluluŋ wi wi bañaaŋ baloŋ babaaŋ ahil kapaya du pnkuŋ. »

¹⁴ Moyiŧ awala ţi pnkuŋ abi ţi bañaaŋ ado baka kë bado bañow aşë naj imişa yi baka.

¹⁵ Wi wi aşaaŋ aji na baka : « Nabomandëran pa kankoţan, nawutan kaban baharan. »

¹⁶ Na nfa mi unuur uwajanţën, imparantant iŧiinkana du pnkuŋ, iliik liik na kanfëluŋ kaweek kë ipëni. Wi wi bañaaŋ başaaŋ aŧiink plul kë palul maakan. Ţi dko di bañaaŋ batanuŋ iloona palënk pweek pawo da.

¹⁷ Moyiŧ ado baka kë bapën pya kañog Naşibaţi. Baya anaţ du pnkuŋ uţeeh.

¹⁸ Kë pnkuŋ bŧi paşë wo udu du, ţiki Nawat Kabuka awala ţi pa ţi bdoo, udu kë ukpën ji unjaaŋ upën ţi bdoo bweek maakan, kë pnkuŋ bŧi pakşinţar maakan.

¹⁹ Kë plul paşë lula lul maakan pya. Moyiŧ aţiinii, kë Naşibaţi akŧeemna ţi imparantant.

²⁰ Hënk, Nawat Kabuka awala ţi pnkuŋ pi Ŧinayi duuţ di aduunuŋ Moyiŧ kë Moyiŧ apaya ayit na a da.

²¹ Nawat Kabuka aji na a : « Yaan iji na bañaaŋ bawut kaŧarandër pwinën, woli baando haŋ baŧum bakeţ ţi baka.

²² Baţeŋan bandooŋ ahil pñogën bawo i kajinţ kaţi nfiŋ baka. »

²³ Kë Moyiŧ aŧeema aji : « Bañaaŋ baanhil kapaya ţi pnkuŋ pi Ŧinayi, iwi ţi mntumu ijakuŋ ndo dko di bakţañuŋ nfooyan pa, mbot nji na baka payimani. »

²⁴ Wal mënţ kë Nawat Kabuka aşë ji na Moyiŧ : « Kakan du dko di natanuŋ iloona, işë ikak ţi na Aaron. Baţeŋan na bañaaŋ bandukiiŋ başë bawut kaŧaran kabi ţi nji, kaţi nfiŋ baka. »

²⁵ Kë hënk di Moyiŧ akakuŋ du bañaaŋ aţup baka uko wi Nawat Kabuka ajakuŋ.