Ppën 18 - Mankanya

Byit bi Yetro na Moyiŧ

¹ Yetro, naţeŋan i uŧaak wi Madiyan, ayootan Moyiŧ aŧiink iko bŧi yi Naşibaţi adoluŋ Moyiŧ na Iŧrayel pntaali pi nul : Aŧiink jibi Yawe Nawat Kabuka apënandëri biki Iŧrayel du Ejiptu.

² Yetro abi yeenk Ŧipora ahar Moyiŧ du katohul wi Moyiŧ aţiişanuŋ aharul,

³ ayeenka ul na babukul batëb. Moyiŧ abi ji : « Dwo nayaanţ ţi uŧaak wi. » Ukaaŋ kë aţu aloŋ ţi babukul katim ki Gerşom.

⁴ Akak aji : « Naşibaţi i paapa ajaaŋ adëman abi aţënkën, ul abuuranaanuŋ kakej ki Farawuna. » Ukaaŋ kë aţu natëbanţën katim ki Eliyeŧer.

⁵ Yetro ayootan Moyiŧ ajej ahar Moyiŧ na babukul, aya du Moyiŧ du pndiiş pankabuŋ du pnkuŋ pweek pi Naşibaţi di atanuŋ kaloona ki nul.

⁶ Yetro ado kë baji na Moyiŧ : « Nji ayootanu, dbi pwinu na aharu na babuku batëb. »

⁷ Moyiŧ apën abi akita, aŋup ţi kadunul, aboota, kë wi bawuladuŋ mboş aba, baya du kaloona ki Moyiŧ.

⁸ Moyiŧ akakalëş ayootanul iko bŧi yi Nawat Kabuka adoluŋ Farawuna na bañaaŋ biki Ejiptu abuuranaan Iŧrayel. Aţupa kak unoor bŧi wi bakaaŋ ţi bgah, na jibi apënanuŋ baka ţi wa.

⁹ Yetro alilandër iko inuura bŧi yi Nawat Kabuka adoluŋ bañaaŋ biki Iŧrayel, wi abuuranuŋ baka ţi bañaaŋ biki Ejiptu.

¹⁰ Aţiini wal mënţ aji : « Ddëman Nawat Kabuka ambuurananaŋ ţi bañaaŋ biki Ejiptu na ţi iñen yi Farawuna, ambuuranuŋ pntaali pi nul pjuuk du Ejiptu.

¹¹ Hënkuŋ dme kë Yawe adëm apel biki bajaaŋ banaamnţën na Naşibaţi bŧi, ţiki adiiman wa wi bakhajanuŋ biki Iŧrayel »

¹² Wal mënţ Yetro afiŋar Nawat Kabuka unŧaam atër abot ado iţeŋan iloŋ. Aaron na bantohi biki Iŧrayel bŧi babi ade na ayootan Moyiŧ ţi kadun ki Naşibaţi.

Pjukan pi Yetro

¹³ Wi nfa mambanuŋ, Moyiŧ aţo awayëş bañaaŋ biki Iŧrayel, kë bañaaŋ banaţ nfa te utaakal ayoonk awayëş baka.

¹⁴ Wi ayootan Moyiŧ awinuŋ iko yi akdoluŋ bŧi pa bañaaŋ aji na a : « Wel wi ikdoluŋ hënk pa bañaaŋ ba ? Wel ukaaŋ kë ikwayëş iwi aloolan ţañ kë bañaaŋ başë ŧum ayoonk nfa te utaakal ? »

¹⁵ Moyiŧ aŧeem ayootanul aji : « Bañaaŋ baji babi ţi nji pme uko wi Naşibaţi ajakuŋ ţi uko wi baka.

¹⁶ Woli baka uhok baji babi ţi nji. Dji kawayëş baka kaţup baka uko wi Naşibaţi ajakuŋ na bgah bi ayuujuŋ. »

¹⁷ Kë ayootanul aji : « Mënţ hënk di di iwooŋ kado !

¹⁸ Ilemp te kanoor, pntaali pi nu panoor, ţiki ulemp udëm maakan pa iwi, iinkhinan pdo wa aloolan.

¹⁹ Hënkuŋ ŧiinkan uko wi nji kajukaniiŋ, dñehan Naşibaţi awo na iwi. Ulemp wi nu uwo pţupar pntaali pi nu ţi kadun ki Naşibaţi, iñooţa uhok wi baka.

²⁰ Jukaan baka uko wi Naşibaţi aţuuŋ pdo na bgah bi nul, jukaan baka uko wi bawooŋ kaţaş na jibi bawooŋ kawo.

²¹ Kë işë wo kadat ţi pntaali bŧi bañaaŋ banhilanuŋ pwayëş, afiyaar Naşibaţi, aŋal manjoonan, biki bawooŋ baanhil pnug na nin uko uloŋ, ido baka bawo bawayëş biki pnŧuk pi bañaaŋ iñeen-week ŋyaaş iñeen (1 000) na biki bañaaŋ iñeen-week (100), iñeen kañeen (50), na iñeen (10).

²² Bukal bakdooŋ kaţo ŋnuur bŧi kawayëş bañaaŋ bankaaŋ uhok. Woli uko uwo uweek, baţiju kwayëş ; kë woli iko impoţi ya, bawayëş bdidi baka. Hënk, ulempu uunkŧum maakan, bafaaşër wa na iwi uşë uwiiş.

²³ Woli ido haŋ kë uwo uko wi Naşibaţi ajakiiŋ ido, khil kanoorfën, bañaaŋ bŧi kaŧiinkar kaţiiş itoh yi baka. »

²⁴ Moyiŧ aŧiink Yetro ayootanul ado iko bŧi yi ajakuŋ.

²⁵ Adat ţi Iŧrayel bŧi bañaaŋ banhilanuŋ pwayëş, aţu baka ţi kadun ki pntaali kë bawo bawayëş. Biki pnŧuk pi bañaaŋ iñeen-week ŋyaaş iñeen (1 000), biki pi iñeen-week, biki pi iñeen kañeen na biki iñeen.

²⁶ Baji bawayëş bañaaŋ ŋnuur bŧi ; woli uko uloŋ udëm pa baka, baji bawul Moyiŧ awayëş wa, woli uwo umpoţi, bawayëş bdidi baka.

²⁷ Hënk di di Moyiŧ awutanuŋ ayootanul kë aţiiş uŧaakul.