Ppën 16 - Mankanya

Pde na uyemaţ wi Nawat Kabuka awuluŋ biki Iŧrayel

¹ Bañaaŋ biki Iŧrayel bapën du Elim, aya ban bukal bŧi du pndiiş pi Ŧin ţi unuur uţënk iñeen na kañeen wi pli ptëbanţën wi bapënuŋ uŧaak wi Ejiptu ; dko mënţ dawo ţi pŧoof pi Elim na Ŧinayi.

² Bañaaŋ bŧi baŋur ŋuran aţiini ţi uko wi Moyiŧ na Aaron du pndiiş.

³ Baji na baka : « Woli Yawe Nawat Kabuka ado dolun lah kë ŋkeţ du Ejiptu, di ŋjaaŋ ŋţo kafooy iliiruŋ yi uyemaţ kabot kade pde kayok, umat. Kë an naşë ţijun ţi pndiiş pi kawutun ŋkeţ ubon, un bŧi. »

⁴ Nawat Kabuka aji na Moyiŧ : « Ddo uko ude udo kaşub kapënna du baţi duuţ. Bañaaŋ badoki bapën kajejënţ uko wi bahilanuŋ kade unuur mënţ. Dŋal katen me baţaş uko wi njakuŋ.

⁵ Unuur upaajanţënţën, uko wi bakyaaŋ kajejënţ kajuŋ upel wi ŋnuur ŋundu ŋyaaş ŋtëb. »

⁶ Moyiŧ na Aaron baji na bañaaŋ biki Iŧrayel bŧi : « Na uŧejan wi nţa wi name kë Nawat Kabuka apënananaŋ du Ejiptu.

⁷ Na nfa nawin mndëm mi nul. Aŧiink pŋur ŋuran pi naŋur ŋuranuŋ uko wi nul. Kë un, ŋwo we kë nadoo ŋur ŋuran ţi uko wi nun ? »

⁸ Moyiŧ akak aji : « Nawat Kabuka awulan na uŧejan wi nţa uyemaţ nade, na nfa awulan pde pankëşuŋ nade nadoo nayok ; Nawat Kabuka aŧiink kë naŋur ŋuran uko wi nul. Kë un, ŋwo we ? Mënţ ţi un biki naŋur ŋuranuŋ, ţi Nawat Kabuka a. »

⁹ Moyiŧ aji na Aaron : « Jakan na bañaaŋ bŧi babi ţi kadun ki Nawat Kabuka, aŧiink kë baŋur ŋuran ţi uko wi nul. »

¹⁰ Kë wi Aaron akţiiniiŋ na bañaaŋ bŧi biki Iŧrayel, bawugşa du pndiiş awin mndëm mi Nawat Kabuka kë mampën ţi udu uweek.

¹¹ Nawat Kabuka aţiini na Moyiŧ aji :

¹² « Dŧiink pŋur ŋuran pi babuk Iŧrayel, ţiiniin na baka iji na baka kë : Na ujot unuur bade uyemaţ na nfa bade pde kayok. Bame wal mënţ kë nji dwooŋ Yawe Nawat Kabuka Naşibaţi i baka. »

¹³ Na utaakal, ŋkaŧ ŋnaam ŋjiku ŋabi aniink dko di bawooŋ, kë na nfa upoş ujot afooy dko di bawooŋ.

¹⁴ Wal wi upoş utoluŋ aşë duk uko uloŋ uwiiş unwooŋ ji pşon panwooŋ na iŧuk ţi mboş mi pndiiş duuţ.

¹⁵ Wal wi bañaaŋ biki Iŧrayel bawinuŋ uko mënţ andoli aji na aŧënţul : « We wi ? » Baamme uko mënţ wuŋ. Moyiŧ aji na baka : « Pde pi Nawat Kabuka awulanaŋ pa. »

¹⁶ Uko wi ajakuŋ wii wi : « Andoluŋ adoki jej uko wi ahilanuŋ kade, uko ji kakana ki ŋlitru ŋbaakër pa andoli, andoli adoki jejënţ pa bañaaŋ biki katohul. »

¹⁷ Kë biki Iŧrayel bado haŋ : baloŋ bajej aŧuman kë baloŋ bajej ntiinku.

¹⁸ Wal wi bayaaŋ aniiban wa, anjejënţuŋ aŧuman aanji pelan, kë anjejënţuŋ ntiinku aji këşan. Andoluŋ ajejënţ uko wi ahiluŋ kade.

¹⁹ Moyiŧ aji na baka : « Nin ñaaŋ awutan kaduk uko uloŋ pa faan. »

²⁰ Kë baloŋ başë wo baanŧiinka, ahank te unuur utëbanţën, kë ŋkuŧ ŋajot wa kë upuţi. Kë Moyiŧ aşë deebaţër bakaŋ mënţan.

²¹ Ŋnuur bŧi na nfa baji bajejënţ uko mënţ, andoli uko wi ahinanuŋ kade. Wal wi bnuur baktëruŋ uji uyuuy.

Unuur wi pnoorfën

²² Unuur upaajanţën bañaaŋ biki Iŧrayel bajejënţ uko ude wi bajaaŋ bajejënţ ŋnuur ŋundu ŋyaaş ŋtëb, iniibi itëb pa ñaaŋ. Baweek biki Iŧrayel babi aţup uko mënţ Moyiŧ,

²³ kë aji na baka : « Uko wi Yawe Nawat Kabuka ajakuŋ wii wi : unuur wi faan uwo unuur wi pnoorfën, unuur wi pnoorfën uyimanaan pa Nawat Kabuka. Najuŋan uko wi naŋaluŋ pjuŋ, nafatan wi naŋaluŋ, undukiiŋ nahankan wa te faan. »

²⁴ Kë bahank uko undukiiŋ jibi Moyiŧ ajakuŋ, uumpuţi, kë nin ukuŧ uunjot wa.

²⁵ Moyiŧ aji na baka : « Nadeen wa nţa, nţa dawo unuur wi pnoorfën wi Nawat Kabuka, naankţënk wa du ŋţeeh.

²⁶ Nadoon kajejënţ wa ŋnuur paaj, unuur uţënk paaj na uloŋ, uunkwo. »

²⁷ Unuur uţënk paaj na uloŋ kë baloŋ başë ya pjejënţ wa baanya win nin uko uloŋ.

²⁸ Nawat Kabuka aji na Moyiŧ : « Naţo te lum kado kapok pŧiink uko wi nţu'anaŋ pdo, kapok pţaş bgah bi naan ?

²⁹ Natenan, nji Nawat Kabuka dwulan unuur wi pnoorfën, ukaaŋ kë unuur upaajanţën kë aji wulan uko ude wi ŋnuur ŋtëb. Naţoon du itohan, nin aloŋ awutan kapën du dko di awooŋ ţi unuur wi pnoorfën. »

³⁰ Kë bañaaŋ biki Iŧrayel baţo baando nin uko uloŋ ţi unuur uţënk paaj na uloŋ.

³¹ Babuk Iŧrayel badu uko mënţ « Mana ». Uwo wo ji iñeeliin ifaaŧal, unaam kalilare na iko yi pşon injuŋuŋ na mnob.

³² Moyiŧ aji : « Uko wi Nawat Kabuka aţuuŋ pdo wii wi : Najejan kako kaniibi naŧuman ka na mana, nahank pa iwuuŋ inkmbiiŋ, bahilna bawin pde pi awulanaŋ du pndiiş wi apënananaŋ du Ejiptu. »

³³ Moyiŧ aji na Aaron : « Jejan kako kaţuuni, ijej kako kaniibi, iniib iŧuman iya ibëkan ţi kadun ki Nawat Kabuka ahilna ahank wa pa iwuuŋ iinkmbiiŋ. »

³⁴ Kë jibi Nawat Kabuka abiiŋ aţu Moyiŧ pdo, Aaron ajej wa aţu ţi kadun ki dko dyimanaan, ahilna ahank wa.

³⁵ Bañaaŋ biki Iŧrayel bade mana ŋşubal iñeen ŋbaakër, bade da te wal wi babanuŋ du dko danfëţuŋ, te wi babanuŋ kañog uŧaak wi Kanaan.

³⁶ Kako ki bajaaŋ bajon kaniibna kawo ŋyaaş iñeen kako ki bajaaŋ baniibna Mana.