Ppën 15 - Mankanya

Kayeeh ki mbuur

¹ Wal mënţ kë Moyiŧ na biki Iŧrayel başë yeeh Yawe Nawat Kabuka kayeeh ki, baji : « Dyeeh Nawat Kabuka anyuujuŋ mndëm mi nul, awat ŋmpëlënŧ na bandapiiŋ ŋa du bdëk.

² « Nawat Kabuka abuuranaanuŋ awooŋ mnhina, akaaŋ kë nji kayeeh ul awooŋ Naşibaţi i naan, dyeeha kadëmana, ul Naşibaţi i paapa ajaaŋ adëman.

³ Nawat Kabuka awo nagutan naweek, katimul kawo Yawe.

⁴ Awat ŋkaaru ŋi ŋmpëlënŧ ŋajaaŋ ŋapul ŋi Farawuna na bangoli biki nul du bdëk. » Bdëk bjeenkal bawun bantamnuŋ ţi bangoli baweek biki nul.

⁵ « Meel mi bdëk manjotna baka, kë bajiir du pndiiloŋ ji mnlaak.

⁶ Kañen ki nu kadeenu, iwi Nawat Kabuka, kaji kayuuj mndëm mi nu, kañen ki nu kadeenu, iwi Nawat Kabuka, kaji kanantël başooradu.

⁷ « Mndëm mi nu mnweek manji mawat biki ikgutanaanuŋ. Udeeb wi nu ji bdoo, uji utër baka ji pbooli.

⁸ Uhefënţ wi nu uşiinţ bdëk kë meel mampaţşëri, anaţ awo ji ŋniw meel manaţ ţi pŧoof pi bdëk awo ji ifaar

⁹ Başoorad nja babi ji : “Ŋdookar na baka, ŋmob baka, ŋfaaşër bka bi baka, ŋyeenk ŋdoo ŋpelan. Najoh ŋŧoot ikej yi nja, iñen yi nja iba na baka.”

¹⁰ Kë işë fuuţ, kë meel manwun baka. Bajiir ji pko pdiţ di pndiiloŋ pi meel mnyibanaan.

¹¹ Nawat Kabuka, in awooŋ ji iwi ţi ŋnŧoŋ ? In ayimanuŋ pyiman pweek pi iyimanuŋ ? In ajaaŋ ado iko iñoŋarënaan maakan iŧënţ yi nu ? Iwi injaaŋ kdo iko inuura maakan.

¹² Itar kañen kadeenu, kë mboş mamoy baka.

¹³ Iŋal pntaali pi ibuuranuŋ abot aţoŋ pa Mnhina mi nu manyafan baka, kë bakya du katohu kayimanaan.

¹⁴ Ŋŧaak ŋaŧiink uko unţëpuŋ, kë ŋleef ŋakki na bañaaŋ biki ŋa, palënk paneej bafiliŧteŋ.

¹⁵ Başih biki Edom bañoŋari. Baweek biki Mowab balënk akat kat. Bañaaŋ biki Kanaan balënk adoo poş anaay.

¹⁶ Manţaaf na phaajala manwo ţi baka bŧi, udo uñoŋarënaan wi Nawat Kabuka udo baka kë balënk aŧiim ji plaak ţi uţëp pntaali pi nu, iwi Nawat Kabuka, ţi uţëp pntaali pi ibuuranuŋ.

¹⁷ Iwi Nawat Kabuka iluŋ kaya na baka, kañooţ baka du pnkuŋ pi nu bafëţ da, du dko di idatuŋ ado katoh. Iwi Nawat Kabuka iluŋ kaya, kañooţ baka du dko dyimanaan di nu, di iñen yi nu ipaşuŋ.

¹⁸ Yawe Nawat Kabuka aşih ŋwal bŧi te mndani. »

Kayeeh ki Miriyaam

¹⁹ Bañaaŋ biki Iŧrayel bapoş ihoţ ikay amuur bdëk ; kë wal wi ŋmpëlënŧ ŋi Farawuna ŋabiiŋ, ŋkaaru ŋi ŋmpëlënŧ ŋajaaŋ ŋapul na badapa ŋmpëlënŧ, Yawe Nawat Kabuka ado kë meel mi bdëk manwun baka.

²⁰ Miriyaam ñaaţ naţupar Naşibaţi, naweek Aaron, ajej untambër umpoţi, kë baaţ bŧi bajej ŋa kak, aţaşa aki.

²¹ Miriyaam ayeehar baka kayeeh ki aji : « Nayeehan Nawat Kabuka, ayuuj mndëm mi nul. Awat du bdëk ŋmpëlënŧ na bandapiiŋ ŋa. »

Meel mi Mara

²² Moyiŧ ado kë bañaaŋ biki Iŧrayel kë banaţa du bdëk bjeenkal, aya du umbaŋ wi pndiiş pi Şur. Bapoş ŋnuur ŋwajanţ du pndiiş baanwin meel.

²³ Kë wi babanuŋ du Mara, baanhil adaan meel mi da, ţiki manŧaakţi ; ukaaŋ kë badu dko mënţ Mara.

²⁴ Bañaaŋ baţiini aŋur ŋuran uko wi Moyiŧ aji : « Wel wi ŋbaaŋ adaan ? »

²⁵ Moyiŧ akooţ Yawe Nawat Kabuka, kë ayuuja pmul ploŋ. Moyiŧ ajej pa awat du meel, kë mankak ajoobëţ anuura pdaan. Ţi dko mënţan di di Nawat Kabuka awuluŋ baka bgah bi pţaş abot aten me bafiyaari.

²⁶ Aji na baka : « Woli iŧiink bnuura pdiim pi Nawat Kabuka Naşibaţi i nu, ado uko unwooŋ uŧool ţi këş ki nul, woli iţu kabaţ ţi uko wi aţuuŋ pdo, abot aţaş bgah bi nul bŧi, ikob yi nkobuŋ Ejiptu, mënkkobu ya. Nji dwooŋ Nawat Kabuka anjaaŋ ajebanan. »

²⁷ Baban du Elim di ŋkumpëş iñeen na ŋtëb ŋanwooŋ na ŋnkem iñeen paaj na uloŋ. Batan da iloona yi baka kakab meel.