Ppën 11 - Mankanya

Kakob kankluŋ kabi

¹ Yawe Nawat Kabuka aji na Moyiŧ : « Dkak akob Farawuna na uŧaak wi Ejiptu kakob kaweek. Uko mënţ uţëple awutan naya, adoo dookan dook ţi uŧaak wi nul.

² Ţiiniin keeri na pntaali pi naan, andoli ahepar akinţul iko yi unŧaam na yi uwuuru. »

³ Nawat Kabuka ado kë biki Iŧrayel bawinana bnuura ţi këş ki biki Ejiptu. Moyiŧ ţi uleeful awo wal mënţ ñaaŋ naweek ţi uŧaak wi Ejiptu na ţi këş ki banjaaŋ baţënk Farawuna pşih, na ţi biki Ejiptu.

⁴ Kë Moyiŧ aşë ji : « Nawat Kabuka aţiini aji : “Kaya mnjel dpën kañaay na Ejiptu,

⁵ bapoţ biinţ bajeen bŧi başë bakeţ ţi uŧaak wi Ejiptu, hënk du bajeen i Farawuna naşih, te du bajeen i ñaaţ ankşonuŋ ; na ŋbuk ŋkaş ŋŧeek ŋi ŋnŧaam bŧi ŋakeţ.

⁶ Iwuuh iŧiinkana ţi Ejiptu bŧi jibi uwooŋ uumbaaŋ kawohaara na jibi uwooŋ uunkak aluŋ kawo kak.

⁷ Kë ţi biki Iŧrayel baando ŧiink ŧiink ubuş udugar ñaaŋ këme unŧaam.” Hënk name kë Nawat Kabuka aji paţëş biki Iŧrayel na biki Ejiptu.

⁸ Wal mënţ banjaaŋ baţënku pşih bŧi babi kajot ţi ihoţ yi naan kakooţën kaji : “Yaani, iwi na bañaaŋ bankţaşiiŋ bŧi.” Uko waŋ uţëple kaşë ya. » Wal mënţ kë Moyiŧ aşë pën du uko Farawuna na udeeb uweek.

⁹ Nawat Kabuka abi ji na a : « Farawuna aankŧiinkan nhilna ndo iko iñoŋarënaan iŧum ţi Ejiptu. »

¹⁰ Moyiŧ na Aaron bado iko iñoŋarënaan yuŋ bŧi ţi kadun ki Farawuna. Kë Nawat Kabuka aşë dënëţëna uhaaş kë aando wut biki Iŧrayel bapën ţi uŧaakul.