Kañaam 8 - Mankanya

Katim kayimanaan ki Naşibaţi

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Bayeehna ka bko bi bajaaŋ bado Gaŧ. Kayeeh ki Dayiţ.

² Iwi Yawe Nawat Kabuka Ajugun, mndëm mi nu maniink mboş bŧi, mndëm mi nu mampel baţi !

³ Iţëpna ţi mntum mi bapoţ bankmbootuŋ, mi bambaaŋ abuka buka, adiiman mndëm mi nu ţi kadun ki başooradu, kadolna baka bayomp, bukal bankdooŋ na plukan.

⁴ Woli dten baţi bi ipaşuŋ na iñen yi nu, woli dten pli na ŋjah ŋi iţuuŋ ţi baţi bi nu,

⁵ dji kaşal kaji : « Ñaaŋ awo in kë idoo şala ? Abuk ñiinţ awo in kë idoo ţo ptena ?

⁶ Iindola kë adëm aliŋ na iwi, idola kë awo na mndëm mnweek.

⁷ Idola kë aşih iko bŧi yi ipaşuŋ, iţu iko bŧi ţi ihoţul uţeeh ;

⁸ iţu ŋkaneel, ŋpi na ŋgit bŧi ţi ihoţul uţeeh, adoo ţu ŋko ŋi uţeeh ţi ihoţul uţeeh.

⁹ Idola kë aşih ŋkaŧ ŋanwooŋ baţi na ŋţëb ŋanwooŋ ţi idëk, adola kë aşih ŋko bŧi ŋanjaaŋ ŋawo ţi idëk. »

¹⁰ Iwi Yawe Nawat Kabuka Ajugun mndëm mi nu maniink mboş bŧi.