Kañaam 71 - Mankanya

Pñehan pi ñaaŋ nantohi

¹ Iwi Yawe Nawat Kabuka, du iwi di di njaaŋ kamennaana ; kwut nin bakowandënaan !

² Iwi inwooŋ naŧool, yeŋanaan ibot ibuuranaan ! Watan kabaţ iŧiinkën ibot ibuuranaan !

³ Woon pnkuŋ pi nji ntëŋnuŋ, pnkuŋ pi nhiluŋ kaya wal undoli. Iŋal pbuuranaan, iwo katoh ki ŋniw ŋankëmuŋ.

⁴ Iwi Naşibaţi, buuranaan ţi iñen yi bañaaŋ bajooţ ; buuranaan ţi ñaaŋ anwooŋ aanwo naŧool ; buuranaan ţi ñaaŋ anwooŋ na udeeb ţi uhaaş.

⁵ Iwi Yawe Nawat Kabuka Ajugun iwooŋ mnhaţ mi naan ; dhaţ ţi iwi wi nwoonuŋ napoţ.

⁶ Wi nhojuŋ du kayiŋ ki ni aşë mëban ţi iwi ; iwi ipënanaanuŋ du kayiŋ ki ni ; iwi i i njaaŋ kadëman unuur unjinţi.

⁷ Bañaaŋ baŧum babi ñoŋar ţi uko wi naan, kë iwi işë wo dko di mmeniiŋ dantuhuŋ bnuura.

⁸ Mntum mi naan manji mandëmanu wal undoli ; dji kaţup mndëm mi nu unuur undoli.

⁹ Wutan kawutanaan wi pţaf pabiiŋ hënkuŋ ; wutan kawutanaan wi mbiişniiŋ hënkuŋ.

¹⁰ Başoorad naan baţiiniyaan uko wi naan ; banklaaŋ pba na nji baţiini aŧiinkar.

¹¹ Baji : « Naşibaţi awutana ; nadookaran na a namob, nin aloŋ aanhil kabuurana. »

¹² Iwi Naşibaţi wutan kalowën ! Iwi Naşibaţi i naan, ŧaraan ibi iţënkën !

¹³ Bañaaŋ bampoknuŋ bakeţan na mnkow, baba ! Bañaaŋ banklaaŋ pdolën buţaan, bawoon na mnkow mnweek bakuţ bayewla !

¹⁴ Kë nji nşë luŋ kayoonku na ŋnuur ; ddo kadëmanaaru dëman maakan ;

¹⁵ mntum naan manji manji iwo naŧool kë ijaaŋ kbuuran wal undoli ; mënhil kafën iko inuura yi idoluŋ.

¹⁶ Iwi Nawat Kabuka, dluŋ kabi kaţup bañaaŋ iko iweek maakan yi idoluŋ ; dluŋ kaţup kaji iwi ţañ iwooŋ naŧool.

¹⁷ Iwi Naşibaţi, wi nwoonuŋ napoţ kë işë jukanaan, kë te hënkuŋ nji kaţup iko iñoŋarënaan yi idoluŋ.

¹⁸ Iwi Naşibaţi woli ddoo ţaf kë bkow bafaaŧ na nji, wutan kawutanaan, nhilna nţup kawuuŋ ki mnhina mi nu, nhilna nţup bankluŋ kabuka mnhina mi nu.

¹⁹ Iwi Naşibaţi, pwo naŧool pi nu paţëp uţup paya te du bko duuţ. Iwi Naşibaţi, in awooŋ ji iwi ? Iwi indoluŋ iko iweek maakan.

²⁰ Iwi idolnuŋ kë nţëp ţi unoor na pwuţan aşë luŋ kadolën nka ubida, iluŋ kadolën mpën du bnjiir.

²¹ Iluŋ kahoţan mndëm mi naan, iluŋ kabi katëŋţënaan.

²² Iwi Naşibaţi i naan uŋal wi nu ujoonani, dluŋ kakob bko banwooŋ na ital kabeebnu. Iwi Nayimanaan i Iŧrayel, dkob bko bi ital pa iwi

²³ Dluŋ kahuuran na mnlilan wi nji kaluŋ kayeeh kañaamarënu ; uhaaş wi naan wi ibuuranuŋ bŧi uluŋ kayeehu.

²⁴ Dluŋ kaţup na mntum mi naan wal undoli kë iwo naŧool, ţiki banklaaŋ pdolën buţaan bakeţ na mnkow