Kañaam 66 - Mankanya

Pdëman Naşibaţi anjaaŋ abuuran

1 Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh.

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh. An bañaaŋ biki mboş bŧi, nayeehan nadëman Naşibaţi.

² Nayeehan mndëm mi katim ki nul ; nayeehan nadëmana.

³ Najakan na Naşibaţi : « Iko yi ikdoluŋ iñoŋarën maakan ! Mnhina mnweek mi nu mando kë başooradu bakmaţu.

⁴ Bañaaŋ biki mboş bŧi baŋup ţi kadunu adëmanu na iyeeh, bayeeh katim ki nu. » Pnaţ ntiinku

⁵ Nabiini, nawin iko yi Naşibaţi adoluŋ ! Iko iweek maakan yi adoluŋ iñoŋarën bañaaŋ bajën.

⁶ Ado bdëk kë bakak pkay kë bañaaŋ bakpoş poş amuur. Wal mënţ kë ŋşë lilandëra.

⁷ Aşih na mnhina mi nul te mnţo ; këş ki nul katen ŋŧaak, bandekuluŋ kafeţ bawutan kahomp. Pnaţ ntiinku

⁸ An bañaaŋ biki ŋŧaak bŧi, nabeeban Naşibaţi i nja, nayeehan nadëmana.

⁹ Ul anjaaŋ añooţ nja du ubida, aanwut nja kë ŋluuli.

¹⁰ Iwi Naşibaţi, itenun bnuura, abomanun jibi bajaaŋ baboman unŧaam.

¹¹ Iwuukun du bţaaw aţu'un pkuŋa bdaaj bandiţuŋ ;

¹² iwut kë badapi'un ji ŋmpëlënŧ, ŋţëp ţi bdoo aţëp ţi meel, kë işë pënanun da aţij du mboş manŧumuŋ ŋdeey.

¹³ Dluŋ kaya du katoh ki nu katëradu ŋnŧaam, dluŋ kado iko yi nji nhoŋiiŋ,

¹⁴ iko yi nhaabuŋ aţup, iko yi mntum mi naan manţupuŋ wi nhaajaliiŋ.

¹⁵ Dluŋ katëradu ŋnŧaam ŋanniiruŋ ; dluŋ katëradu ŋkaneel udu upaya ubi du iwi ; dluŋ katëradu ŋgit ŋkaş na ŋpi ŋkaş. Pnaţ ntiinku

¹⁶ An nanjaaŋ nadëman Naşibaţi bŧi nabiini, dkakalëşan iko yi adoluŋ pa nji.

¹⁷ Wi nji nhaabuŋ, adu'a, kë mntum mi naan mankdëmana.

¹⁸ Woli dşal lah buţaan, Yawe Nawat Kabuka aankŧiinkën.

¹⁹ Kë Naşibaţi aşë ŧiinkën, awat kabaţ aŧiink pñehan pi naan.

²⁰ Bnuura bawoon ţi Naşibaţi ! Aandiikën wi nji kañehanuluŋ ; aanlowanaan uŋal wi nul unwooŋ uunkba !