Kañaam 65 - Mankanya

Kayeeh kabeebni Naşibaţi

1 Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ .

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ.

² Iwi Naşibaţi inwooŋ du Ŧiyoŋ bañaaŋ bawo i kadëmanu, bañaaŋ bawo i kado uko wi bahoŋiiŋ.

³ Iwi injaaŋ kŧiink pñehan, bañaaŋ bajën bŧi baluŋ kabi du iwi.

⁴ Pjuban pi nun padiţ maakan pkuŋa, kë işë pënan ipekadu yi nun.

⁵ Ñaaŋ i idatuŋ adola kë añogu afëţ du blay bi nu anuurandëni. Ŋluŋ kayeenk kakëşan ţi bnuura bi katohu ; ŋluŋ kayeenk ţi iko iyimanaan yi katoh kaweek ki nu.

⁶ Iwi Naşibaţi nabuuranun ido iko iñoŋarënaan inwooŋ iŧool kaŧeemnun ; iwi i ŋŧaak ŋanwooŋ te du kabaŋ ki mboş na kabaŋ ki bdëk ŋahaţuŋ !

⁷ Iwi indoluŋ na mnhina mi nu kë inkuŋ inaţi ; iwi inwooŋ na mntëŋ.

⁸ Iwi inyompanuŋ bdëk banţuunkuŋ, iwi inyompanuŋ pŋaat pi ŋmaaroŋ, iwi inyompanuŋ pŋaat pi ŋŧaak.

⁹ Bañaaŋ banwooŋ te du kabaŋ ki mboş bawo ţi palënk wi bawinuŋ iko iñoŋarënaan yi idoluŋ. Du umayar unuur te kayoba ido kë iyeeh yi mnlilan iŧiinkanaa.

¹⁰ Iji kboman mboş bnuura kado ma manëk maakan ; iji kdo ma mambuk ŋdeey ŋŧum. Katant ki nu kaŧum na meel ; iji kwul bañaaŋ ŋdeey wi ijaaŋ kboman mboş hënk.

¹¹ Itulan ilël yi mboş adaaŋan dko danşëkrëtiiŋ ; iñowan mboş na uşubal awul mbuk uforŧa ubuki.

¹² Iji kwul ŋdeey ŋŧum ţi uşubal bŧi ; dko di iţëpuŋ daji daŧum na mbuk.

¹³ Dko di ŋko ŋajaaŋ ŋafeerna du pndiiş daŧum ŋdeey ; inkuŋ iwo ţi mnlilan.

¹⁴ Dko dfeerni daŧum na itani ; ŋţeeh ŋabuk maaj akëşan ; iyeeh yi mnlilan iŧiinkanaa.