Kañaam 64 - Mankanya

Pñehan Naşibaţi ubeel

1 Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ .

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ.

² Iwi Naşibaţi, ŧiinkaan wi nji kaţëgiiŋ ! Buuranaan ţi naşoorad naan anjaaŋ aşookën !

³ Lowanaan bŧiinkar bi bado buţaan ! Lowanaan byit bi baţak buţaan.

⁴ Baji batuum pndemënt ji umbañ ; baji bafël ŋţup ŋjooţ ji işuuri.

⁵ Batapna ñaaŋ naŧool du dko di bameniiŋ ; baji batapa kaŧaran, baanji baţi nin uko uloŋ.

⁶ Bawo ţi pbomandër pdo buţaan, baţiiniyaan pkuur bţaaw aşë ji : « In akwinuŋ ba ? »

⁷ Baji baţak pdolna buţaan : « Ŋbaa, iko iboman bŧi. » Uko unwooŋ du uhaaş meeţ wi ñaaŋ andoli uwo ji bnjiir.

⁸ Naşibaţi amara mara awat işuuri yi nul ţi baka, kë bakoba ţi dko mënţ.

⁹ Ado kë pndemënt pi baka pado kë bahubtaa. Hënkuŋ, ñaaŋ anwinaŋ baka aji bëţ bëţan bkow.

¹⁰ Palënk paneej ţi bañaaŋ bajën bŧi, kë baţup uko wi Naşibaţi adoluŋ, bayikrën ulemp wi nul.

¹¹ Mnlilan mi ñaaŋ naŧool manji manwoona du Yawe Nawat Kabuka aji mennaana du a. Bañaaŋ bŧi banwooŋ baŧool baluŋ kalilandër uko mënţ.