Kañaam 62 - Mankanya

Phaţ ţi Naşibaţi

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kawo ki Yeduŧun. Kayeeh ki Dayiţ.

² Du kañog Naşibaţi ţañ di di uhaaş wi naan ujaaŋ ujoobëţ ; mbuur mi naan manwoona du a.

³ Ul aloolan awooŋ pnkuŋ pi naan pi nji ntëŋnuŋ ; awooŋ mbuur mi naan. Ul awooŋ katoh ki ŋniw ŋankëmuŋ ki naan ki nji mmeniiŋ ; mënkşinţar nin.

⁴ Te lum di di nakdëpiiŋ an bŧi ţi ñaaŋ kala pwata kafiŋ jibi ñaaŋ ajaaŋ awat uniw unţeehiiŋ këme unkintaar unkjotuŋ ?

⁵ Mndëm mi nul mankaaŋ kë bakdo na pwata ; baŋal ŋţilan maakan. Baji babeeb na mntum mi baka kaşë kakar du ŋhaaş ŋi baka meeţ. Pnaţ ntiinku

⁶ Aa, iwi uhaaş wi naan, ţoon ijoobëţ du kañog Naşibaţi ţañ ; mnhaţ mi naan manwoona du a.

⁷ Ul aloolan awooŋ pnkuŋ pi naan pi nji ntëŋnuŋ ; awooŋ mbuur mi naan. Ul awooŋ katoh ki ŋniw ŋankëmuŋ ki naan ki nji mmeniiŋ ; mënkşinţar nin.

⁸ Mndëm na mbuur mi naan manwoona du Naşibaţi ; dmennaana du a, ul awooŋ pnkuŋ panjaaŋ pabeelën.

⁹ An bañaaŋ, nahaţan ţi a wal undoli ; naţupan ţi kadunul uko unwooŋ ţi uhaaş wi nan. Naşibaţi awo dko dmennaani di nja. Pnaţ ntiinku

¹⁰ Bañaaŋ bajën bawo ji udu ; bañaaŋ bammeeţaniiŋ bawo baţilan. Woli bapeeşaar baka lah, bawiiş bukal bŧi kapel udu

¹¹ Nawutan kahaţ ţi kmëni kanooran uleef ţi pŧeh bañaaŋ iko. Woli pyok paŧumi, nawutan kaţu uhaaş ţi pa.

¹² Naşibaţi aţiini uyaaş uloolan ; aţiini ŋyaaş ŋtëb, kë nŧiink uko wi : mnhina manwo mi nji Naşibaţi.

¹³ Iwi Ajugun uŋal uwo wi nu. Iwi ijaaŋ kluk ñaaŋ andoli kaliŋan na ulemp wi adoluŋ.