Kañaam 50 - Mankanya

Naşibaţi awo nawayëş naŧool

Kayeeh ki pñaamarën Naşibaţi ki Aŧaf

¹ Yawe Nawat Kabuka Naşibaţi Andëmuŋ Maakan aţiini, adu bañaaŋ biki mboş bŧi du umbaŋ wi umayar unuur te du kayoba.

² Du Ŧiyoŋ ubeeka unnuuriiŋ maakan di di Naşibaţi apënuŋ na mndëm mi nul awinana.

³ Naşibaţi i nja abi, aankluŋ kabi na byompan. Abi kë bdoo banjeenuŋ bawo ţi kadunul, ukëk uweek kë ufooya.

⁴ Ahuuran adu baţi na mboş, adu baţi na mboş ŋawo bamaar kawayëşaan pntaali pi nul.

⁵ Aji : « Nayitrënan banfiyaarnuŋ, bandoluŋ bhoŋar na nji na bţeŋan. »

⁶ Baţi baţup kë Naşibaţi awooŋ nawayëş, ul awo naŧool. Naşibaţi awooŋ nawayëş. Pnaţ ntiinku

⁷ « Iwi pntaali pi naan, ŧiinkaan, dŋal kaţiini ; Iŧrayel, dŋal kakeeşaaru. Nji, dwooŋ Naşibaţi, Naşibaţi i nu.

⁸ Mënţ iţeŋan ikaaŋ kë nji kaŋoman na iwi : ŋnŧaam ŋi itëradaanuŋ ŋii ŋi ţi kadun naan na ŋnuur.

⁹ Mënkyeenk nin uwit ukaş unwoonuŋ du katohu ; mënkyeenk ŋpi du itani yi nu.

¹⁰ Ŋko ŋi uţeeh bŧi ŋawo ŋi naan ; pntuni pweek pi ŋko ŋanwooŋ du inkuŋ pawo pi naan.

¹¹ Dme ŋkaŧ bŧi ŋanwooŋ du inkuŋ ; ŋko bŧi ŋanwooŋ du uţeeh ŋawo ŋi naan.

¹² Woli ubon ude'ën lah, mënknuma pţupan ; mboş manwo mi naan na iko bŧi inwooŋ ţi ma.

¹³ Nji, dji kade uyemaţ wi ngit ŋkaş i ? Nji, dji kadaan pñaak pi ŋpi i ?

¹⁴ Beebaan nji Naşibaţi, uwooŋ bţeŋan bi nu, işë ido iko yi ihoŋuŋ nji Naşibaţi Andëmuŋ Maakan.

¹⁵ Du'aan wal wi iwooŋ ţi unoor ; dluŋ kabuuranu işë idëmanaan. »

¹⁶ Kë Naşibaţi aşë ji ji na ñaaŋ nawuţaan : « We uwooŋ pkakalëş iko yi nţuuŋ pdo kawo na bhoŋar bi naan ţi mntum ?

¹⁷ Iwi impokuŋ pjukan pi naan, adek ŋţup ŋi naan kafeţ.

¹⁸ Woli iwin nakiij, iji kdo pnoh na a ; iji kgakandër na bankjubanuŋ pjuban pi piinţ.

¹⁹ Iji kbi wo wo na buţaan ţi mntum kawo na kaguuru ţi pndemënt.

²⁰ Iji kţo katapar ayiţu bţup ; iji kkuut ñaaŋ i nabootuŋ.

²¹ Iko mënţ yi yi idoluŋ, kë nyompan mntum. Işal aji dwo ji iwi, kë hënkuŋ nşë ŋoman na iwi kaţup iko mënţ bŧi ţi kadunu. »

²² « An nanjaaŋ naţilma nji Naşibaţi naţaafaraan kaţi mbi mpitëşan kë nin aloŋ aankburanan.

²³ Pbeebën pawooŋ bţeŋan banjaaŋ badëmanaan ; kë anjaaŋ aţaaf bgah bi naan, dluŋ kawula mbuur mi njaaŋ kawul. »