Kañaam 49 - Mankanya

Ñaaŋ akeţle aanji ya na nin uko uloŋ

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki babuk Kore.

² An bañaaŋ bŧi, naŧiinkan ! An bŧi nanfëţuŋ ţi mboş, nawatan ibaţ !

³ An bampoţi na baweek, naŧiinkan ! An bayok na bajuuk bŧi !

⁴ Mntum mi naan manţup ŋţup ŋi ñaaŋ nanŧuŋa ; uhaaş naan uţup iko inţëpuŋ ţi bgah.

⁵ Dwat kabaţ kaŧiink uhoñ ; dkob bnŧuni kapibanaan uhoñ wi naan.

⁶ We ukaaŋ kë nwo kalënk wal wi nwooŋ ţi unoor, wi ŋţilan ŋi başoorad naan ŋafooynuŋ ?

⁷ Bahaţ ţi bka bweek bi baka ; baji banahna pyok pweek pi baka.

⁸ Kë ñaaŋ najën aşë wo aanhil pbuuran aŧënţul ; aanhil pluk Naşibaţi preeş pi ubida wi nul.

⁹ Preeş plukni ubida wi ñaaŋ patam maakan, paankëş nin

¹⁰ ahilna aka ubida wi mnţo awut kaneej du bhër.

¹¹ Uwinana bnuura kë bañaaŋ banwooŋ na uşal unŧuŋa baji bakeţ, kë bañaaŋ bapën uko na bamënaţaan bakak aji bakeţ kadukar baloŋ bka bi baka.

¹² Ihër yi baka iwooŋ itoh yi baka te mnţo, iwooŋ ŋfëţ ŋi baka ŋwal bŧi, te badoo ţu mboş mloŋ itim yi baka.

¹³ Kë ñaaŋ najën na mndëm mi nul bŧi aşë wo aanji jon, aluŋ kakeţ jibi ŋlimariya ŋajaaŋ ŋakeţ.

¹⁴ Uko wi uwooŋ unkdooŋ banhaţuŋ maakan ţi ŋleef ŋi baka ; kë banjaaŋ baţaş baka baji balilan ţi ŋţup ŋi baka. Pnaţ ntiinku

¹⁵ Bawo wo ji batani bi baŧoofuŋ du mnkeţ ; kë pkeţ pakyafan baka. Na nfa bañaaŋ baŧool baloŋ kapoş poşan baka ; kanuura ki baka kafaawi ; mnkeţ manwooŋ ufëţ wi baka.

¹⁶ Kë Naşibaţi aşë luŋ kabuuranaan du mnkeţ ; aa, aluŋ kajejën. Pnaţ ntiinku

¹⁷ Wutan kañoŋar woli ñaaŋ ayoki, woli mndëm mi katohul manyaha ya kadun.

¹⁸ Woli akeţi aankñooţ nin uko uloŋ ; pyok pi nul paankţaşa du bhër.

¹⁹ Wi awooŋ najeb, aji şal kë awo ţi bnuura ; iko iţëp bnuura pa a, ukaaŋ kë bañaaŋ baji badëmana.

²⁰ Kë işë ya du bateemu, bukal banwooŋ baankak awin bjeehi.

²¹ Ñaaŋ najën i badëmanuŋ kë aşë waaŋ uşal anaam ji ulimariya unkkeţuŋ.