Kañaam 46 - Mankanya

Yawe Nawat Kabuka awo na nja

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki babuk Kore. Kayeeh ki pdiim pi baaţ.

² Naşibaţi awo katoh kaweek ki ŋniw ŋankëmuŋ ki ŋmeniiŋ, aji ţënk nja wal undoli wi ŋhajaliiŋ.

³ Ukaaŋ kë ŋënji ŋlënk woli mboş manşinţar ; woli inkuŋ inaay du idëk pŧoof,

⁴ woli meel mando pŋaat pweek, afat ado kë inkuŋ ikşinţar alut. Pnaţ ntiinku

⁵ Kë bdëk başë wo, itant yi ba ijaaŋ ido ubeeka wi Naşibaţi uwo ţi mnlilan, dko danyimanaanuŋ ţi ŋfëţ ŋi Andëmuŋ Maakan.

⁶ Naşibaţi awo ţi pŧoof pi wa : uunhil pşintar ; Aji mëf pţënk wa.

⁷ Ŋŧaak ŋaşinţari, pşih payewlaa. Ado pdiim kë mboş manwulamëşaa.

⁸ Yawe Nawat Kabuka Anhiniiŋ Maakan awo na nja ; Naşibaţi i Yakob awo katoh ki ŋniw ŋankëmuŋ ki ŋmeniiŋ. Pnaţ ntiinku

⁹ Nabiin naten iko iweek maakan yi Nawat Kabuka adoluŋ ! Natenan jibi aŧokuŋ mboş !

¹⁰ Aji do ŋgut kaţañan te du kabaŋ ki umundu ; aji kit kaşuuri kafom bjan ; aji tër ŋkaaru ŋi ŋmpëlënŧ ŋakpuluŋ.

¹¹ Aji : « Naţañaan, nameen kë nji dwooŋ Naşibaţi ! Dşihuŋ ŋŧaak, dşihuŋ mboş. »

¹² Nawat Kabuka Anhiniiŋ Maakan awo na nja ; Naşibaţi i Yakob awo katoh ki ŋniw ŋankëmuŋ ki ŋmeniiŋ. Pnaţ ntiinku