Kañaam 44 - Mankanya

Naşibaţi adek biki nul kafeţ

¹ Kayeeh ki pñaamarën Naşibaţi ki kapënna ţi ulibra wi najukan uyeeh. Kayeeh ki babuk Kore.

² Iwi Naşibaţi, ŋŧiinki, ŋŧiink na ibaţ yi nun başinun baţupun iko iñoŋarënaan yi idoluŋ ţi wal wi baka, yi idoluŋ du unjon.

³ Idook ŋŧaak na kañen ki nu aţooranaan baka ; ikob ŋŧaak başinun bahilna baţoo.

⁴ Mënţ ikej yi baka yi yi bayeenknuŋ uŧaak, mënţ iñen yi baka ibuuranuŋ baka ; kañen kadeenu ki nu ka, kañen ki nu, bjeehi bi kaara di nu ba, iwi ibi ŋal baka.

⁵ Iwi Naşibaţi, iwooŋ naşih i naan : ibi ţup kë Yakob aşë wat !

⁶ Ikaaŋ kë ŋji ŋwat başooradun ; katim ki nu kakaaŋ kë ŋpoş poşan bankgutuŋ na un.

⁷ Mënţ kaşuuri ki naan ki ki nji nhaţuŋ, mënţ kakej ki naan kakbuuranaanuŋ.

⁸ Iwi ikbuuranuŋ un ţi başooradun ; iwi ikdoluŋ banşooruŋ un bakowa.

⁹ Iwi Naşibaţi, na ŋnuur ŋji ŋyeeh mndëm mi nu ; ŋji ŋdëman katimu unuur unjinţi. Pnaţ ntiinku

¹⁰ Kë işë dekun kafeţ, ido nja kë ŋyewlaa, iinkak agakandër na nja woli ŋya ugut.

¹¹ Ido nja kë ŋţi ţi kadun ki bangutuŋ na un kë başoorad nja bakkiij iko yi baŋaluŋ.

¹² Iji kwul nja ji ŋkaneel ŋi bakyaaŋ pdoh, iniinkan nja ŋŧaak.

¹³ Iwaapar pntaali pi nu preeş pmpoţi, iţen ţen pa !

¹⁴ Iwut kë bakinţun bakkarun, kë bañaaŋ banfëţuŋ na un bakbeŋ aŋuubanun.

¹⁵ Ido kë bañaaŋ biki ŋŧaak bakyeeh abeŋun ; ido kë bañaaŋ baji babëţ bëţan ikow.

¹⁶ Unuur unjinţi dji kawin pŧoka pi naan, mnkow manji manŧum ţi kaara di naan,

¹⁷ wi njaaŋ kaŧiinkaara ŧiink ikar na imbeŋ yi naşoorad naan ajaaŋ abi kala la pŋom.

¹⁸ Iko mënţ bŧi iwoo kë ŋënţilmi'u, ŋëmpën ţi bhoŋar bi idoluŋ na un,

¹⁹ ŋëmpënan ŋhaaş, ŋëmpën ţi bgah bi nu ;

²⁰ idoo fëlun du dko di ŋbuş kajaagal ŋawooŋ, iţu nja mnkow mi pkeţ.

²¹ Woli ŋţilma lah katim ki Naşibaţi i nun, woli ŋdëman lah unŧoŋ,

²² Naşibaţi aankme i ? Ul ammeeŋ uko ummeniiŋ du ŋhaaş ŋi nun meeţ.

²³ Kë iwi Yawe Nawat Kabuka ikaaŋ kë baji bafiŋun na ŋnuur, baji badolun ji ŋkaneel ŋi bakñooţuŋ pfiŋ.

²⁴ Iwi Yawe Nawat Kabuka naţiin, we ukaaŋ kë ikŋoyënţ ba ? Tenan, kwutanun te mnţo.

²⁵ We ukaaŋ kë imen kaara di nu ba ? We ukaaŋ kë iţilma mnhaj na phajala pweek pi nja ba ?

²⁶ Ŋjot ţi mboş akëlënk na pdëpalën, ŋwo ţi ppula ţi mboş.

²⁷ Naţiin, biin iţënk nja ! Iwi i uŋal uwooŋ uunkba, buuraanun.