Kañaam 42 - Mankanya

Kayeeh ki mnţëg

¹ Kayeeh ki pñaamarën Naşibaţi ki kapënna ţi ulibra wi najukan uyeeh. Kayeeh ki babuk Kore

² Iwi Naşibaţi, uhaaş wi naan uji ula'u, jibi ubaŧa wi udaan uţijuŋ maakan ujaaŋ ula meel.

³ Iwi Naşibaţi, uhaaş wi naan ula'u maakan, iwi injaaŋ kwul ubida. Lum di di nji kaluŋ kawo na a ?

⁴ Cay didu ! Mnkuul mi naan manwooŋ pde pi naan pnak na uŧejan, başë kaheparaan na ŋnuur kaji : « Naşibaţi i nu awo ţuŋ ba ? »

⁵ Uhaaş wi naan uji ujooţan woli dleş wal wi njaaŋ kapoş na bañaaŋ baŧum kawo ţi kadun ki pnŧuk panwooŋ ţi ufeŧtu te du katoh ki Naşibaţi, başë kahuuran na mnlilan kabot kabeeba.

⁶ Hakadi ! Iwi uhaaş naan, we wi ibaaŋ ajooţan ba ? Wel wi ibaaŋ aţëga ba ? Haţan ţi Naşibaţi ! Dluŋ kabeebu kak, iwi injaaŋ kbuuranaan akuţ awo Naşibaţi i naan.

⁷ Iwi Naşibaţi, uhaaş naan ujooţi, ukaaŋ kë nji kaleşnu du uŧaak wi Yordaniya du inkuŋ yi Hermoŋ na du pnkuŋ pi Mişeyar.

⁸ Meel manwoonuŋ du inkuŋ mando pŋaat pweek ; uwo wo ji meel manfooyën kë ŋmaaroŋ bŧi ŋakkobën.

⁹ Dme kë na pnak Yawe Nawat Kabuka aji diimanaan uŋal wi nul unwooŋ uunkba, na uŧejan aşë kaleşanaan kayeeh ki nul, kaşë kayeeh ka kañehana, ul anjaaŋ awulën ubida.

¹⁰ Dŋal kahepar Naşibaţi i naan, anwooŋ mnhaţ mi naan kaji na a : « We ukaaŋ kë iţilmi'aan ba ? We ukaaŋ kë nji kapoş ajooţan kë başoorad naan bakhajanaan ? »

¹¹ Uleef uŋër na nji bŧi, başoorad naan bakarën, baji bajakën na ŋnuur : « Naşibaţi i nu awo ţuŋ ba ? »

¹² Hakadi ! Iwi uhaaş naan, we wi ibaaŋ ajooţan ba ? Wel wi ibaaŋ aţëga ba ? Haţan ţi Naşibaţi ! Dluŋ kabeebu kak, iwi injaaŋ kbuuranaan akuţ awo Naşibaţi i naan.