Kañaam 41 - Mankanya

Pñehan pi ñaaŋ ammaakuŋ kë başooradul bakdo na a

1 Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ .

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ.

² Ñaaŋ anjaaŋ aşal bajuuk anuurandëni ! Yawe Nawat Kabuka aji buurana wal wi awooŋ ţi mnhaj.

³ Nawat Kabuka aji beela aji yeŋana ubida kawula bnuura bi nul ţi mboş. Aanji wuta ţi iñen yi başooradul.

⁴ Nawat Kabuka aji ţënka wi amaakuŋ apiinţ ţi kalişa ki nul ; aji wugşa kaboman kalişa ki nul.

⁵ Nji dji kaji : Iwi Nawat Kabuka ñagi'aan ! Jebanaan, djubanu !

⁶ Başoorad naan baji baţup buţaan ţi nji, kaji : « Lum di di abaaŋ akeţ ba ? Lum di di katimul kakneemuŋ ba ? »

⁷ Ñaaŋ abile pwinën uji uwo pyaana kaţilan ; aji wo ţi pla iko iwuţaan yi pkakalëş ; aji pën kaşë kaţiini buţaan du bdig.

⁸ Bañaaŋ banşoornuŋ bŧi baji bahoopaţër ţi uko wi naan ; baji bayoonk yoonk pwuţan pi naan.

⁹ Baji baji : « Pmaak pwuţaan paneej ţi a ! Awuŋ apiinţ, aanknaţa ţi pa ! »

¹⁰ Nanoh naan i ndooŋ ahaţ, anjaaŋ abi kade na nji anaţari'aan.

¹¹ Kë iwi Nawat Kabuka, ñagi'aan, naţanaan, nhilna lukan baka !

¹² Hënk di di nji kameeŋ kë iŋalën : naşoorad naan aankak ahuuran kaji awatën.

¹³ Nji nwooŋ naŧool, iţënkën, akakanaan uleef, adolën kë nwo ţi kadunu te mnţo.

¹⁴ Iwi Yawe Nawat Kabuka Naşibaţi i Iŧrayel, bañaaŋ badëmanu du ujuni te mnţo. Uwo haŋ, uwo haŋ !