Kañaam 40 - Mankanya

Pbeeb Naşibaţi na pñehana aţënk bañaaŋ

1 Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ .

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ.

² Dhaţ maakan ţi Yawe Nawat Kabuka ; ajuţ ţi nji, aŧiinkën wi nji kadu'uluŋ aţënkën.

³ Apënanaan du bnjiir bi mnhaj ; apënanaan ţi dko dangëjuŋ maakan. Aţu kahoţ naan ţi plaak ; adolën kë nnaţ aliinŧ.

⁴ Aţu ţi mntum mi naan kayeeh kahalu kado kadëmanaan Naşibaţi i nja. Baŧum baluŋ kawina kaşë kayikrën mnhina mi nul, baţu wal mënţ mnhaţ mi baka ţi Nawat Kabuka.

⁵ Ñaaŋ anţuuŋ mnhaţ mi nul ţi Nawat Kabuka anuurandëni ; ñaaŋ anwooŋ aanya du bahomp anuurandëni ; ñaaŋ anwooŋ aanya du baţilan anuurandëni.

⁶ Iwi Nawat Kabuka Naşibaţi i naan, ido iko iñoŋarënaan iŧum işal pdo iko inuura pa nja. Nin ñaaŋ aanaam na iwi. Dŋal kaţup iko mënţ kameeţan ya kë işë ŧum maakan ñaaŋ afën ya.

⁷ Iinŋal bafiŋaru ŋko kë iinŋal baţenu iko iloŋ, ituhëşaan ibaţ nhilna nyikrën. Ŋko ŋantëradiiŋ iinji klilandër ŋa ; iţeŋan ppënanaan ipekadu, iinji klilandër ya.

⁸ Kë nşë ji wal mënţ : « Natenan, nji wi, dbi du iwi, dwin ţi ulibra uko wi nwooŋ kaţaş.

⁹ Iwi Naşibaţi i naan dŋal kado uko wi iŋaluŋ ; bgah bi nu bawo ţi uhaaş naan meeţ. »

¹⁰ Dji kaţup ţi kadun ki bañaaŋ baŧum kë iwo naŧool. Tenan, mënkyomp. Iwi Nawat Kabuka ime uko mënţ !

¹¹ Mënji kamen du uhaaş meeţ kë iwo naŧool ; dji kaţiiniyaan uŋal wi nu unjoonanuŋ na mbuur mi ijaaŋ kţij. Ţi kadun ki bañaaŋ banŧumuŋ, mënji kamen uŋal wi nu unwooŋ uunkba na manjoonan mi nu.

¹² Iwi Nawat Kabuka iinkpok pñagi'aan ; uŋal wi nu unwooŋ uunkba na manjoonan mi nu mando kayeŋën na ŋnuur.

¹³ Pwuţan pŧum pakëb ţi nji, mënkak ahil pniib pa. Ipekadu yi naan iţaşën, mënkak ahil pten ya ; iŧum apel wel wi bkow naan, mënkak añoom.

¹⁴ Iwi Nawat Kabuka dkooţu kooţ buuranaan ! Iwi Nawat Kabuka, ŧaraan ibi iţënkën !

¹⁵ Bañaaŋ banŋaluŋ pyeenkën ubida kaba na nji, banaakiirën bukal bŧi bakowa. Bañaaŋ banŋaluŋ nwuţën, bakakan kafeţ bakowa.

¹⁶ Bañaaŋ bankjiiŋ nji, bakeţan na mnkow.

¹⁷ Bañaaŋ bŧi bankla'iiŋ, bawoon ţi mnlilan na mnŧaŋ ţi iwi. Bañaaŋ banŋaluŋ mbuur mi ijaaŋ kţij, bawutan kaţañan pdo kaji : « Nawat Kabuka adëmi ! »

¹⁸ Nji dwo nawaaŋ akuţ awo ţi kanuma, kë Nawat Kabuka aşë ji şalën. Iwi Naşibaţi i naan ikţënknuŋ abot abuuranaan ; ŧaraan iţënkën, kjon !