Kañaam 33 - Mankanya

Kayeeh ki pdëman Nawat Kabuka

¹ An bañaaŋ baŧool, nahuuraan na mnlilan nadëman Yawe Nawat Kabuka. An bañaaŋ banwooŋ na ŋhaaş ŋjinţ, unuura nado kadëmana.

² Nakoban bnŧuni nadëman Nawat Kabuka ; nakoban bnŧuni bi ital iñeen nadëmana.

³ Napaşan kayeeh nadëmana ; nakoban bnuura nadëmana.

⁴ Uţup wi Nawat Kabuka uwo uŧool ; ñaaŋ ahil kahaţ ţi iko bŧi yi adoluŋ.

⁵ Aŋal uko unwooŋ uŧool abot aţëp ţi bgah. Uŋal wi nul unwooŋ uunkba uŧum ţi mboş.

⁶ Nawat Kabuka aţëpna ţi uţup wi nul apaş baţi ; ahaabëş mntum apaş iko bŧi inwooŋ baţi.

⁷ Aţoonkrën meel mi idëk aneejan ţi itank, ahank bdëk bweek ţi ŋbuli.

⁸ Bañaaŋ banfëţuŋ ţi mboş bŧi badoon kaŧiink Nawat Kabuka ! Bañaaŋ banfëţuŋ ţi mboş bŧi balënkan ţi kadunul !

⁹ Aji ţup, uko wi aţupuŋ upaşana ; aji ţiini, uko wi ajakuŋ uwo.

¹⁰ Nawat Kabuka aji naţan iko yi ŋŧaak ŋakdoluŋ ; aji neenan bañaaŋ biki ŋŧaak pdo iko yi başaluŋ pdo.

¹¹ Kë iko yi Nawat Kabuka ajaaŋ aşal işë wo yi mnţo ; iko yi aşaluŋ pdo iinkţëlşa nin.

¹² Pntaali pi Nawat Kabuka awooŋ Naşibaţi i pa panuurandëni ; pntaali pi adatuŋ aji pawo pi nul panuurandëni.

¹³ Nawat Kabuka aji ţo du baţi kaşë katen, kawin bañaaŋ bajën bŧi.

¹⁴ Du dko di afëţuŋ, aji şalan bañaaŋ bŧi banfëţuŋ ţi mboş.

¹⁵ Ul ambomanuŋ baka bŧi ŋhaaş ; ul antenuŋ bnuura iko bŧi yi bajaaŋ bado.

¹⁶ Mënţ bangoli baŧum bakaaŋ kë naşih aya buur du ugut, mënţ mnhina mnweek mankaaŋ kë nangoli natëŋ aya buur du ugut.

¹⁷ Phaţ ţi umpëlënŧ kabuurna pawo ŋţaafi ; uforŧa wi wa bŧi uunhil kabuuran ñaaŋ.

¹⁸ Kë Nawat Kabuka aşë ji ten banjaaŋ baŧiinka aji ten banjaaŋ bahaţ ţi uŋal wi nul unwooŋ uunkba,

¹⁹ kahilna kabuuran ŋhaaş ŋi baka pkeţ, bawo bajeb wal wi pkeţ ubon pakwooŋ.

²⁰ Nja ŋhaţ ţi uko wi Nawat Kabuka ahoŋuŋ ; ul ajaaŋ abuuran nja, ajaaŋ abeel nja.

²¹ Ul akaaŋ kë ŋhaaş ŋi nja ŋawo ţi mnlilan ŋţu mnhaţ mi nja ţi katimul kayimanaan.

²² Iwi Yawe Nawat Kabuka ŋñehan uŋal wi nu unwooŋ uunkba uwo ţi nja, un, ŋţu mnhaţ mi nun ţi iwi.