Kañaam 30 - Mankanya

Yawe Nawat Kabuka abuuranaan

1 Kañaam. Kayeeh ki kabeebnuŋ Yawe Nawat Kabuka wi babomanuŋ Katoh Kaweek ki Naşibaţi aba. Kayeeh ki kapënna ţi ulibra wi Dayiţ .

¹ Kañaam. Kayeeh ki kabeebnuŋ Yawe Nawat Kabuka wi babomanuŋ Katoh Kaweek ki Naşibaţi aba. Kayeeh ki kapënna ţi ulibra wi Dayiţ.

² Iwi Yawe Nawat Kabuka, ddëmanu ţiki inaţanaan ; iinwut başoorad naan kë bakji'ën.

³ Iwi Nawat Kabuka Naşibaţi i naan, dhuuran adu'u kë ijebanaan.

⁴ Iwi Nawat Kabuka, ipënanaan du mnkeţ ; ipënanaan ţi pŧoof pi bankwaliiŋ du bhër.

⁵ An nanfiyaaruŋ Nawat Kabuka, nayeehan nadëmana ; nayeehan nadëman katim kayimanaan ki nul.

⁶ Udeeb wi nul uji uwo wi ŋwal ŋntiinku ; kë bnuura bi ajaaŋ awul başë ji bawo bi mnţo. Na utaakal, mnkuul ; na nfa, iyeeh yi mnlilan.

⁷ Nji dbi wo ţi bnuura aşë ţup : « Mënkluŋ kalënk nin. »

⁸ Iwi Nawat Kabuka, iwulën bnuura bi nu kë nliinŧ ji pnkuŋ ; ibi dekën kafeţ kë nlënk akat kat.

⁹ Iwi Nawat Kabuka, ddu'u ; Iwi Ajugun, dkooţu aji :

¹⁰ « Woli iyeenkën ubida, we wi ikkaaŋ ? Woli iwutën kë njot du bhër, we wi ikkaaŋ ? Mboş kadëmanu i ? Mboş kaţup manjoonan mi nu i ?

¹¹ Iwi Nawat Kabuka dkooţu kooţ, ŧiinkaan iñagi'aan ! Iwi Nawat Kabuka, woon nabuuranaan ! »

¹² Ido kë ŋwooni ŋi naan ŋakak iyeeh yi mnlilan ; iwohëşaan imişa yi puum aţu'ën yi mnlilan.

¹³ Ukaaŋ kë mënkţañna pyeehu ; iwi Yawe Nawat Kabuka, Naşibaţi i naan, dbeebu te mnţo.