Kañaam 29 - Mankanya

Pyeehar Yawe Nawat Kabuka

1 Kayeeh ki pñaamarën Naşibaţi ki kapënna ţi ulibra wi Dayiţ

¹ Kayeeh ki pñaamarën Naşibaţi ki kapënna ţi ulibra wi Dayiţ An ŋwanjuŧ ŋi baţi nawulan Yawe Nawat Kabuka, nadëmaan Nawat Kabuka, ul awooŋ na mnhina na mndëm !

² Nabiin naţup mnhina na mndëm mi katim Nawat Kabuka ! Naŋupan nadëman Nawat Kabuka, ayiman abot awo na mndëm !

³ Pdiim pi Nawat Kabuka paŧiinkana du idëk ; Naşibaţi ajug mndëm ado kë imparantant ikdug ; Nawat Kabuka aţo, aşih idëk iweek.

⁴ Pdiim pi Nawat Kabuka pawo na mnhina ; pdiim pi Nawat Kabuka pawo na mndëm.

⁵ Pdiim pi Nawat Kabuka papaaţ mnko mnweek ; aa, Nawat Kabuka apaaţ mnko mnweek manwooŋ du uŧaak wi Libaŋ.

⁶ Ado kë inkuŋ yi Libaŋ iklut aŧëfa awo ji ubay ; ado kë pnkuŋ pi Hermoŋ paklut aŧëfa awo ji uwit wi uţeeh umpoţi.

⁷ Pdiim pi Nawat Kabuka paji papënan iliik liik yi bdoo.

⁸ Pdiim pi Nawat Kabuka paji paşinţ şinţan pndiiş ; aa, Nawat Kabuka aji lëk lëkan pndiiş pi Kadeş.

⁹ Pdiim pi Nawat Kabuka paji pado ŋbaŧa ŋabuk ; paji pamaran itoh yi mnko mi uţeeh. Katoh ki nul kaŧum na idiim injaaŋ ihuuran kaji : Nawat Kabuka awo na mndëm !

¹⁰ Nawat Kabuka aţo ţi meel duuţ aşih ; Nawat Kabuka aţo aşih te mnţo.

¹¹ Nawat Kabuka aluŋ kawul pntaali pi nul mnhina ; Yawe Nawat Kabuka aluŋ kawul bañaaŋ biki nul bnuura.