Kañaam 28 - Mankanya

Nawat Kabuka aŧiink ñaaŋ ankkooţuluŋ

1 Kayeeh ki pñaamarën Naşibaţi ki kapënna ţi ulibra wi Dayiţ

¹ Kayeeh ki pñaamarën Naşibaţi ki kapënna ţi ulibra wi Dayiţ Iwi Yawe Nawat Kabuka, i nji kaduuŋ ! Iwi inwooŋ pnkuŋ pi nji ntëŋnuŋ, wutan kayomp ! iyomple, kanaam na bankwaliiŋ du bhër.

² Ŧiinkaan, wi nji kahuuranuŋ añehanu iñagi'aan ; ŧiinkaan, wi nji ndeeŋuŋ iñen du dko dyimanaan maakan di nu.

³ Wutan kanakrënaan na bañaaŋ bado buţaan ; wutan kaŧelën na bado buţaan. Baji baţiini bnuura na baŧënţ baka kaşë wo na buţaan ţi ŋhaaş.

⁴ Lukan baka uko wi badoluŋ ; kakaan baka buţaan di badoluŋ. Lukan baka uko wi badoluŋ na iñen yi baka ; kakaan baka iliŋan na uko wi badoluŋ.

⁵ Baanji baţoo kafiiţ iko yi Yawe Nawat Kabuka adoluŋ ; baanji baţoo kafiiţ ulemp wi adoluŋ na iñen yi nul. Awatan baka ţi mboş apoş, awutan kanaţan baka nin !

⁶ Ddëman Yawe Nawat Kabuka, aji aŧiink pdiim pi naan wi nji ñehanuluŋ aji na a, añagi'aan.

⁷ Nawat Kabuka awooŋ nayeŋ i naan akuţ awo ubeel wi naan ; dţu mnhaţ mi naan bŧi ţi a, kë aji buuranaan ; uhaaş wi naan uwo na mnlilan, dbeeba na iyeeh yi naan.

⁸ Nawat Kabuka awooŋ nayeŋ i pntaali pi nul ; awooŋ katoh ki ŋniw ŋankëmuŋ kankbuuranuŋ naşih i adatuŋ.

⁹ Iwi Nawat Kabuka, buuraan pntaali pi nu ; wulan biki nu bnuura bi nu ! Woon nayafan i baka, doon kayafan baka te mnţo !