Kañaam 26 - Mankanya

Ñaaŋ anwooŋ naŧool ţi këş ki Naşibaţi añehana

1 Kayeeh ki pñaamarën Naşibaţi ki kapënna ţi ulibra wi Dayiţ .

¹ Kayeeh ki pñaamarën Naşibaţi ki kapënna ţi ulibra wi Dayiţ. Iwi, Yawe Nawat Kabuka, wayëşaan, dwo ñaaŋ naŧool. Iwi, Nawat Kabuka, dhaţ ţi iwi, mënkpën ţi bgah bŧool.

² Iwi Nawat Kabuka şalanaan, ţu'aan ţi unoor işë ido katenën ; şalaan bnuura uşal na uhaaş wi naan.

³ Uŋal wi nu unwooŋ uunkba wii wi ţi kadun naan, kë nşë poş ţi bgah bi nu.

⁴ Mënji kaţo na bañaaŋ banjaaŋ balafrën, mënji kawo na bañaaŋ banjaaŋ baţilan.

⁵ Dpok byit bi banjaaŋ bado buţaan, mënji kaţo na bañaaŋ baŋoonk.

⁶ Nawat Kabuka, dñow iñen yi naan kadimanaan kë dwo naŧool ţi kadun ki nu, kafooyna bliit bi mngur bi nu

⁷ kabeebu kabot kaţup iko iñoŋarënaan yi idoluŋ.

⁸ Nawat Kabuka, katoh ki ifëţuŋ kalilën, dko di mndëm mi nu manwooŋ.

⁹ Wutan kadolën jibi ijaaŋ kdo na bado buţaan ; wutan kayeenkën ubida jibi ijaaŋ kyeenk wi bafiŋ bañaaŋ.

¹⁰ Iñen yi baka iţop na iko iwuţaan maakan ; badinan kë banug baka kë başë do uko wi banuguŋ baka baŋaluŋ.

¹¹ Kë nji nşë wo naŧool ; Nawat Kabuka, buuranaan, ñagi'aan.

¹² Dwo ţi bgah bŧool ; dluŋ kadëman Yawe Nawat Kabuka ţi kadun ki bañaaŋ.