Kañaam 24 - Mankanya

Yawe Nawat Kabuka aneej du dko dyimanaan di nul

1 Kayeeh ki pñaamarën Naşibaţi ki kapënna ţi ulibra wi Dayiţ

¹ Kayeeh ki pñaamarën Naşibaţi ki kapënna ţi ulibra wi Dayiţ Yawe Nawat Kabuka akaaŋ mboş na iko bŧi iwooŋ ţi ma ; akaaŋ aka bañaaŋ bŧi banfëţuŋ ţi ma.

² Ul apaşuŋ ma aşeef ţi meel duuţ ; ul aţuuŋ ma ţi idëk duuţ.

³ In akluŋ kapaya du pnkuŋ pi Nawat Kabuka ? In akluŋ kanaţ du dko dyimanaan di nul ?

⁴ Ñaaŋ anwooŋ aanjubani a ; ñaaŋ anwooŋ na uhaaş ujinţ a ; ñaaŋ anwooŋ aanţu uhaaş ţi iko inaaf a ; ñaaŋ anwooŋ aanji mehna kaguurna bañaaŋ a.

⁵ Aluŋ kayeenk bnuura bi Nawat Kabuka, kayeenk pwayëş pŧool pi Naşibaţi ankbuuranuluŋ.

⁶ Bañaaŋ bukuŋ mënţan bakla'uluŋ, baklaaŋ kaara di nu, kaara di Naşibaţi i Yakob akdëmanuŋ. Pnaţ ntiinku

⁷ Ilëman ihaabëşiin, ihaabëşiin ihaan ! Ihaabëşiin, ilëman ijon ! Naşih anwooŋ na mndëm aneej !

⁸ In awooŋ Naşih anwooŋ na mndëm mënţ ? Nawat Kabuka ankaaŋ mnhina mweek a ; Nawat Kabuka anhiluŋ ugut a.

⁹ Ilëman ihaabëşiin, ihaabëşiin ihaan ! Ihaabëşiin, ilëman ijon ! Naşih anwooŋ na mndëm aneej !

¹⁰ In awooŋ Naşih anwooŋ na mndëm mënţ ? Yawe Nawat Kabuka, Anhiniiŋ iko bŧi a, ul awooŋ Naşih anwooŋ na mndëm. Pnaţ ntiinku