Kañaam 22 - Mankanya

We ukaaŋ kë iwutanaan ?

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kaji kayeeh na pdiim pannaamuŋ na pi ubaŧa wi nfa. Kayeeh ki Dayiţ.

² Iwi Naşibaţi i naan, we ukaaŋ kë iwutanaan ba ? We ukaaŋ kë ilowën ba ? We ukaaŋ kë iinkbuuranaan ba ? We ukaaŋ kë iinkŧiink idiim yi naan ba ?

³ Iwi Naşibaţi i naan, dji kahuuran na pnak, iinji kŧeemën ; dji kahuuran na uŧejan, mënji kanoorfën nin.

⁴ Kë işaaŋ awoha anyimanuŋ, iţooŋ aşih kë biki Iŧrayel bakdëmanu.

⁵ Başinun babi haţ ţi iwi kë ibuuran baka ;

⁶ baji bahuuran kadu'u kaşë buur ; baji bahaţ ţi iwi awo baankowaa.

⁷ Kë nji nşë wo mënwo ñaaŋ, dwo wo ji ukuŧ ; bañaaŋ babeŋën abot abeehën.

⁸ Bañaaŋ banwinnuŋ bŧi baji babeŋën, baji baji kaşë bëţ bëţan bkow.

⁹ Baji baji : « Aţu uhaaşul ţi Yawe Nawat Kabuka ! Abuuraana, abuuraana wi aŋaluluŋ. »

¹⁰ Aa, iwi ipënanaanuŋ ţi kayiŋ ki ni, aţu'ën ţi mnwil mi nul.

¹¹ Dbuki'ara buka kë başë hankanaan du iwi ; dhum du kayiŋ ki ni, kë işë do bi woha wo Naşibaţi i njaaŋ kadëman.

¹² Wutan kalowën wi mnhaj mañoguŋ, kë nin aloŋ aanwoo, ankbiiŋ kaţënkën !

¹³ Başoorad naan baŧum afooyën ji ngit ŋkaş ŋŧum, ŋgit ŋkaş ŋjooţ ŋakoolën.

¹⁴ Bahaabëş itum yi baka pdohën, awo ji uliihu unkdohuŋ uko wi umobuŋ aşë liih.

¹⁵ Uforŧa wi naan ubaa uwo wo ji meel mankbulanuŋ, kë mntëŋ mi naan manwo wo ji bko bankyuuyşiiŋ. Kë mënkak ahina, ayuuyşa awo wo ji ujot du pŧoof pi ipëş naan.

¹⁶ Uforŧa wi naan ubaa, ukak ji ufuuş unkayuŋ, kë pndemënt pi naan pajab ţi bdaah daahan naan ; ido kë nkak pdëpalën pi pkeţ.

¹⁷ Pnŧuk pi balaŧ pafooyën, bafooyën awo ji ŋbuş, ŋadumën aluŋan iñen na ihoţ.

¹⁸ Dbon akay adoo hinan kafën imoh yi naan bŧi. Badolën kë nwo bten bi bañaaŋ ;

¹⁹ bafaaşiir imişa yi naan aşë do kanuŋ katen ankyeenkuŋ bayeti bi naan.

²⁰ Iwi Nawat Kabuka, wutan kalow ! Iwi inwooŋ uforŧa wi naan, ŧaraan ibi iţënkën !

²¹ Buranaan pkeţ pi kakej, buuranaan iñiiŋ yi ŋbuş !

²² Buuranaan mntum mi uliihu, buuranaan itiim yi uwit ukaş. Aa, iŧeemën !

²³ Dluŋ kaţiiniyaan katim ki nu ţi pŧoof pi bayiţ naan ; dluŋ kadëmanu ţi pŧoof pi bañaaŋ.

²⁴ An nankţiiŋ Naşibaţi, nadëmaana ! An bŧi nanwooŋ biki pntaali pi Yakob, nadëmaana ! An bŧi nanwooŋ biki pntaali pi Iŧrayel, nadoon kalënk ţi kadunul !

²⁵ Na manjoonan aambeehi aanţiija unoor wi najuuk, aanji deka kafeţ ; woli ahuuran adu'a, aji ŧiinka.

²⁶ Iwi, Nawat Kabuka, ikaaŋ kë nji kaluŋ kadëmanu du dko dyiti di bañaaŋ baŧum ; dluŋ kado uko wi nhoŋuŋ ţi kadun ki bañaaŋ banjaaŋ baŧiinku.

²⁷ Bajuuk baluŋ kade kayok ; banklaaŋ Nawat Kabuka baluŋ badëmana. Ŋhaaş ŋi baka ŋawo te mnţo !

²⁸ Bañaaŋ biki ŋŧaak bŧi baluŋ kaleş Nawat Kabuka kaşë kakak du a ; kntaali bŧi ki mboş kaluŋ kaŋup ţi kadunul

²⁹ Nawat Kabuka akaaŋ mnhina, aşih ŋŧaak bŧi.

³⁰ Aa, bañaaŋ bŧi bankaaŋ mnhina ţi mboş baluŋ kaŋup ţi kadunul ; bañaaŋ baññoganuŋ pkeţ, banwooŋ baanhil pduka bajeb baluŋ kaŋup ţi kadunul,

³¹ Pntaali pi baka paluŋ kadëman baka, baluŋ kaţup bankluŋ kabuka uko wi Yawe Nawat Kabuka.

³² Baluŋ kaţup bankluŋ kabuka iko iŧool yi adoluŋ : ulempul wii wi !