Kañaam 21 - Mankanya

Naşih alilandër mnhina mi Yawe Nawat Kabuka

¹ Kayeeh ki pñaamarën Naşibaţi ki kapënna ţi ulibra wi najukan iyeeh. Kayeeh ki Dayiţ.

² Yawe Nawat Kabuka, naşih aji lilandër mnhina mi nu, aji lilan maakan woli ibi pbuurana.

³ Iwula uko wi uhaaş wi nul uŋaluŋ, iimpok pwula uko wi añehanuŋ na mntumul. Pnaţ ntiinku

⁴ Iji kbi ţi kadunul na bnuura bweek, kaţu ţi bkowul bŧepi bi naşih bi wuuru unuura.

⁵ Añehanu ubida kë iwula wa te mnţo ido ŋnuur ŋi nul kë ŋawo ŋi mnţo.

⁶ Mbuur mi ibuuranuluŋ manţu kë adëm maakan, idola kë ayuk maakan abot awula mndëm mi nu.

⁷ Iwula bnuura te mnţo, idola kë awo ţi mnlilan mnweek wi ijaaŋ kñoga.

⁸ Naşih ahaţ ţi Nawat Kabuka, Uŋal unwooŋ uunkba wi Naşibaţi Andëmuŋ Maakan ubuurana phubta.

⁹ Kañen ki nu kaluŋ kakob başooradu, kañen kadeenu ki nu kaluŋ kamob banşooriiŋ.

¹⁰ Iluŋ kado baka bakak bdoo bweek ţi unuur wi ikwinaniiŋ, Iwi, Nawat Kabuka, udeeb wi nu uluŋ kaba na baka, bdoo batër baka.

¹¹ Iba na babuk baka ţi mboş, iba na pntaali pi baka ţi pŧoof pi bañaaŋ bajën.

¹² Başalule buţaan ado na pţaawanu, baankhinan nin uko uloŋ.

¹³ Aa, ido baka badek kafeţ işë itap baka işuuri.

¹⁴ Iwi Yawe Nawat Kabuka, yuujan mnhina mi nu, naţiin ! Ŋdo kayeeh mnhina mi nu, kañaamarënu.