Kañaam 2 - Mankanya

Naşih i Naşibaţi akëruŋ

¹ We ukaaŋ kë bañaaŋ biki ŋŧaak babubara şinţar, kë bañaaŋ bŧi babubara aŋaat anooran ŋleef ?

² We ukaaŋ kë başih biki mboş bakbomandër ugut, kë baweek baŧiinkar aji bagut na Yawe Nawat Kabuka na naşih i akëruŋ ?

³ Baji baji : « Nawulën ŋfënëş ital yi batannuŋ nja, nawulën ŋlëŧ ya ŋfël. »

⁴ Kë Anţooŋ du baţi aşë ji baka, Ajugun abeŋ baka.

⁵ Ţi udeeb wi nul, aţiini wal mënţ na baka, ţi udeeb uweek wi nul, alënkan baka aji :

⁶ « Nji, dţooranuŋ naşih i naan, nji dţooranuluŋ du Ŧiyoŋ, pnkuŋ pyimanaan pi naan. »

⁷ Nawutaan hënkuŋ, nţup uko wi Nawat Kabuka ajakuŋ : aji na nji « Iwi, iwooŋ abuk naan ; nţa di, dţup aji dwo şaaş !

⁸ Heparan, nşë nwulu ŋŧaak ika ; heparan, nşë nwulu te du kabaŋ ki mboş.

⁹ Iluŋ kafom baka na pjuuţi pnţak, iluŋ karoc rocan baka ji pţukar. »

¹⁰ An başih, hënkuŋ nadoon kaşal, an baweek biki mboş, nadoon kaŧiink.

¹¹ Nadoon kalempar Nawat Kabuka nawo ţi palënk, nadoon kaţi Nawat Kabuka nakat kat naşë nawo ţi mnlilan.

¹² Nadëmaan Abukul kaţi abi adeebaţ naşë nakitşa ţi bgah ; na manjoonan, aŧar udeeb. Bawo na bnuura, bañaaŋ bŧi banţiiŋ amena du Yawe Nawat Kabuka.