Kañaam 18 - Mankanya

Ubeeb wi naşih anyaaŋ awat du ugut

¹ Kayeeh ki pñaamarën Naşibaţi ki kapënna ţi ulibra wi najukan uyeeh. Kayeeh ki Dayiţ nalempar Yawe Nawat Kabuka. Dayiţ ayeehar ka Nawat Kabuka wal wi abuuranuluŋ ţi başooradul bŧi, abuurana ţi Ŧawul.

² Abëţ aji : Iwi Yawe Nawat Kabuka iwooŋ nayeŋ i naan, dŋalu.

³ Iwi Yawe Nawat Kabuka, iwooŋ pnkuŋ pi nji ntëŋnuŋ iwooŋ katoh ki ŋniw ŋankëmuŋ ki nji mmeniiŋ, ijaaŋ kbuuranaan. Iwooŋ Naşibaţi i naan, awo pnkuŋ panjaaŋ pabeelën, awo ubeel wi naan ; iwooŋ mhina manjaaŋ mambuuranan, iwooŋ uniw unkëmuŋ wi katoh ki naan.

⁴ Dji kahuuran kaji : Bañaaŋ badëmaan Yawe Nawat Kabuka kaşë buur ţi iñen yi başoorad naan.

⁵ Pkeţ pabi fooyën kë ubulan uweek unjaaŋ uŧok kë ulënkanaan maakan ;

⁶ dbi wo wo ji nakalabuş du mnkeţ pkeţ kë panaţ ţi kadun naan.

⁷ Ţuŋ phaajala pi naan, dhuuran adu Nawat Kabuka, dhuuran adu Naşibaţi i naan ; kë aŧiinkën du ufëţ wi nul, kadug ki naan kaban te du ibaţ yi nul.

⁸ Mboş manşinţar aluŋar, anaay inkuŋ kë işinţar ţi uţeeh alënk, wal wi adeebaţuŋ.

⁹ Udu upënna ţi iyiş yi nul apaya, mntum kë mankfat apënan bdoo bjeenkal, imbetan injaaŋ itërad kë ikpën ţi ba.

¹⁰ Aţeeh baţi aşë wala, kanfëluŋ kajënal pëţ kawo ţi ihoţul uţeeh.

¹¹ Aţo ţi uwanjuŧ wi bajaaŋ bado kerubin ayiţ na ibaaklu yi uyook.

¹² Amena ţi bdëm, ado infëluŋ ijënal kë ifooya, ijën ji meel mi pndiiloŋ.

¹³ Bjeehi bandëmuŋ maakan bajota kadun kë infëluŋ işë ţëp, awo na mpoj na imbetan.

¹⁴ Nawat Kabuka adugna du baţi, Naşibaţi Andëmuŋ Maakan adeeŋ pdiim, awo na mpoj na bdoo na imbetan.

¹⁵ Awat işuuri awayëş başooradul, atëmplën iliik liik kë balënk ajiŋ na pţi.

¹⁶ Wi iwi Nawat Kabuka iduguŋ, wi iwi Nawat Kabuka iheefënţuŋ, umayar wi ŋkumpëş upën awinana, kë dko di mboş mampafnuŋ ihoţ dapën awinana.

¹⁷ Atarna kañen du bko duuţ, amëbanaan, apënanaan ţi meel manţuunkuŋ.

¹⁸ Aji buuranaan ţi naşoorad naan anhiniiŋ maakan ; aji buuranaan ţi başoorad naan, bankaaŋ mnhina apelën.

¹⁹ Banaţ ţi kadun naan unuur wi ujeenkuŋ ţi nji, kë Nawat Kabuka aşë wo dko di mpafnuŋ ihoţ.

²⁰ Apënanaan alowan du ; aŋalën, ukaaŋ kë abuuranaan.

²¹ Nawat Kabuka awayëşaan pwayëş pŧool, atuumën katuum kanliŋuŋ na pjinţ pi njinţuŋ.

²² Dţaş bgah bi Nawat Kabuka, mëndek Naşibaţi i naan kafeţ kadolna buţaan.

²³ Iko yi aţuuŋ pdo bŧi iwo ţi kadun naan, mënji kaduk iko yi aţuuŋ pdo.

²⁴ Dwo najinţ piş ţi këş ki nul, ddoonaan awo mënjuban nin.

²⁵ Uţuuŋ kë Nawat Kabuka atuumën aliŋan na uko wi ndooŋ, aliŋan na pjinţ pi njinţuŋ ţi këş ki nul.

²⁶ Iwi Nawat Kabuka iinji kdek kafeţ anjaaŋ aţaşu, kawo naŧool na anwooŋ naŧool.

²⁷ Iji kwo najoob bkow ţi ñaaŋ anjinţuŋ ţi këş ki nu, kawo natit ţi kadun ki naguuru.

²⁸ Iwi ijaaŋ kbuuran bañaaŋ biki bakkowandënuŋ, kawalan bandeeŋuŋ igaŋan.

²⁹ Iwi Nawat Kabuka iwooŋ pfiiţi pi naan ; iwi Naşibaţi i naan, jeehaan bdëm bi naan.

³⁰ Dñoom kagut na pntuni pi bangoli wi iwooŋ na nji ; dñoom kalut uniw uweek wi iwi Naşibaţi iwooŋ na nji.

³¹ Bgah bi Naşibaţi nin ñaaŋ aanhil kaţup buţaan ţi ba ; uţup wi Nawat Kabuka uwo ujinţ piş ; uwo ubeel wi bañaaŋ bŧi banyaaŋ amena du a.

³² In awooŋ Naşibaţi bë mënţ Nawat Kabuka a ? In awooŋ pnkuŋ pi nji ntëŋnuŋ bë mënţ Naşibaţi a ?

³³ Ul ajaaŋ awulën uforŧa ; ul ajaaŋ ado iko yi naan iwo iŧool.

³⁴ Ul ajaaŋ adolën nŧar ji ubaŧa ; ul ajaaŋ adolën nnaţ du bko duuţ.

³⁵ Ul ajaaŋ ajukanaan ugut ; ul ajaaŋ ajukanaan pgut na kaşuuri kanţak.

³⁶ Iwi Nawat Kabuka, iwulën ubeel wi nu unjaaŋ ubuuranaan ; kañen kadeenu ki nu kaji kayeŋanaan ; iji kdëmanaan wal wi iŧiinkuŋ pñehan pi naan.

³⁷ Iji kdolën nţi kaŧaran, mënji kahubta.

³⁸ Dji kadookar na başoorad naan kamob baka ; mënji kaţiiş bë mëmba na baka.

³⁹ Dji kawat baka baanji bahil pnaţa baji bajot ţi ihoţ naan uţeeh.

⁴⁰ Iji kwulën uforŧa ugutanaani ; ido başoorad naan kë bawo ţi ihoţ naan uţeeh.

⁴¹ Ido başoorad naan kë baţii ; dba na başoorad naan.

⁴² Bahuuran adu, nin aloŋ aambi bi pbuuran baka ; bahuuran adu Nawat Kabuka, kë aanŧeem baka.

⁴³ Dfuuţ baka jibi uyook ujaaŋ ufuuţ pdëpalën ; dwet baka jibi bajaaŋ bawet ubulan du bgah.

⁴⁴ Idolën kë mbuur pŋom pi bañaaŋ ; idolën kë nwo ţi kadun ki ŋŧaak ; ido kë pntaali pi nwooŋ mëmmee pakak aŧiinkën.

⁴⁵ Woli djaka jak, dhaab bado bi do ; bayaanţ badaar amaţën

⁴⁶ banoor awutan ; bapën du bñot bi bameniiŋ na palënk.

⁴⁷ Nawat Kabuka awo ajug ubida ! Bañaaŋ badëmaan Naşibaţi awooŋ pnkuŋ pi ntëŋnuŋ ! Bañaaŋ badëmaan Naşibaţi, awooŋ mbuur mi naan !

⁴⁸ Ul awooŋ Naşibaţi anjaaŋ alukandëraan, ul ajaaŋ ado bañaaŋ baŋup ţi kadun naan.

⁴⁹ Ijaaŋ kbuuranaan ţi başoorad naan. Idolën kë nţo ţi başoorad naan duuţ, idolën kë mbuur ţi ñaaŋ najooţ.

⁵⁰ Iwi Yawe Nawat Kabuka, uko mënţ ukaaŋ kë nji kadëmanu ţi ŋŧaak, dyeeh kadëman katim ki nu.

⁵¹ Iji kdo iko iñoŋarënaan kabuuranaan naşih i ikëruŋ ; aji diiman ñaaŋ i akëruŋ bnuura bi nul banwooŋ baankba aji diiman Dayiţ na pntaali pankpënnuŋ ţi a bnuura bi nul te mnţo.