Kañaam 16 - Mankanya

Mnlilan mi ñiinţ i Naşibaţi abuuranuŋ pkeţ

Kayeeh ki pñaamarën Naşibaţi ki kapënna ţi ulibra wi Dayiţ

¹ Iwi Naşibaţi, yeŋanaan, du iwi di di njaaŋ kaya kamena.

² Dji na iwi Yawe Nawat Kabuka : « Iwooŋ Ajugun ! Bnuura bi naan bŧi bawoona du iwi. »

³ Kë bañaaŋ biki nu banwooŋ ţi mboş mi, bukuŋ mënţan banwooŋ na mnhina, bawooŋ mnlilan mi naan bŧi.

⁴ Mnhaj mi bankdëmanuŋ iko inwooŋ iinwo Naşibaţi ala a la ya, manluŋ kadëm ; mënkluŋ kafiŋar ya ŋnŧaam kado pgur nin ; mënkluŋ katiman ya nin.

⁵ Iwi Nawat Kabuka, iwo kafah ki naan, iwo bka bi nyeenkuŋ, uhaaş wi naan uwo ţi iñen yi nu.

⁶ Bka bi nyeenkuŋ balil akuţ anuura kafah ki nyeenkuŋ kanuurnaaniiŋ.

⁷ Dbeeb Nawat Kabuka anjaaŋ aţaŋën ; na uŧejan uşal naan uji ujukanaan.

⁸ Dji kaţu Nawat Kabuka ţi kadun naan wal undoli ; wi awooŋ ţi kadeenu ki naan, mënji kalënk.

⁹ Hënk uhaaş wi naan uji ujoobëţ kabot kawo bŧi ţi mnlilan, uleef naan uji uwo bŧi ţi mnjeeh.

¹⁰ Iinkluŋ kawutën du mnkeţ, iinkluŋ kawut nalemparu awin bhër.

¹¹ Iluŋ kadolën mme bgah banjaaŋ bawul ubida ; mnlilan manji manŧum ţi kadunu bnuura bi mnţo bawo ţi kadeenu ki nu.