Kañaam 137 - Mankanya

Du kakab idëk yi Babilon

Kayeeh ki biki bamobuŋ du Babilon

¹ Du kakab idëk yi Babilon di di ŋţooŋ awooni, wal wi ŋleşuŋ Ŧiyoŋ.

² Ŋyoont ikoora yi nun ţuŋ mnko manwooŋ da.

³ Ţuŋ di di bambiiŋ amob nja ayaanaan bajakuŋ na un, ŋyeehar baka, ţuŋ di di bankhajanuŋ un baŋaluŋ ŋyeehar baka iyeeh yi mnlilan. Bajakun aji : « Nayeeharun kayeeh kaloŋ ki Ŧiyoŋ ! »

⁴ We ? Hum di di ŋhiluŋ kayeeh kayeeh ki Yawe Nawat Kabuka du uŧaak umpaţi ?

⁵ Iwi Yeruŧalem, woli dţilmi'u kañen naan kadeenu kayoj !

⁶ Iwi Yeruŧalem, woli mënleşu woli mënţu mnlilan mi naan bŧi ţi iwi, pndemënt naan pajab ţi bdaah daahan naan.

⁷ Iwi Nawat Kabuka leşan uko wi biki uŧaak wi Edom badoluŋ, ţi unuur wi başooradun bawatuŋ Yeruŧalem, bahuuran aji : « Naŧokan ubeeka ! Nawatan itoh bŧi ! »

⁸ Kë iwi ubeeka wi Babilon, iluŋ kaŧoka ! Ankluŋ kakakanu buţaan bi idoluŋ un, anuurandëni !

⁹ Ankluŋ kajej bapoţ biki nu kabaj ţi mnlaak, anuurandëni !