Kañaam 103 - Mankanya

Uhaaş wi naan ubeeb Yawe Nawat Kabuka

1 Kayeeh ki Dayiţ.

¹ Kayeeh ki Dayiţ. Iwi uhaaş wi naan, beeban Yawe Nawat Kabuka, iwi uhaaş wi naan bŧi, beeban katimul kayimanaan !

² Iwi uhaaş wi naan, beeban Yawe Nawat Kabuka, wutan kaţilma nin uko uloŋ ţi iko inuura yi adoluŋ !

³ Nawat Kabuka ajaaŋ amiirën buţaan bi naan bŧi, kajebanaan ţi mmaak mi naan bŧi.

⁴ Nawat Kabuka ajaaŋ abuuranaan pkeţ, kadëmanaan wi aŋalnuŋ abot añagi'aan.

⁵ Nawat Kabuka aji wulën bnuura bŧum ŋnuur bŧi, kaşë kak nahalu kawo ji ubaŧa unkţiiŋ.

⁶ Nawat Kabuka aji wayëş pwayëş pŧool, kawayëş bañaaŋ bŧi biki bakhajanuŋ.

⁷ Nawat Kabuka adiiman Moyiŧ udolade wi nul, adiiman babuk Iŧrayel iko iweek yi adoluŋ.

⁸ Nawat Kabuka aji ñaga, kaŧiink mnţëg, aanji ŧar udeeb, aji ŋal te mnţo.

⁹ Nawat Kabuka aanji bi duka duka ţi pŋoman, aanji hank ñaaŋ nin ţi uhaaş.

¹⁰ Nawat Kabuka aanji ţo katen ipekadu yi nja, aanji kob nja kakob kanŧaaŋuŋ na buţaan bi nja.

¹¹ Jibi baţi badëmuŋ, hënk di uŋal wi nul udëmuŋ ţi banjaaŋ baŧiinka.

¹² Jibi pŧaal palowiiruŋ na kayoba, hënk di ajaaŋ alowan nja pjuban.

¹³ Jibi ñaaŋ ajaaŋ añaga babukul, hënk di Nawat Kabuka ajaaŋ añaga banjaaŋ baŧiinka.

¹⁴ Ul, ame uko wi abomanaanuŋ nja, ame kë ufuuş wi wi abomanaanuŋ nja.

¹⁵ Ubida wi ñaaŋ uwo ji pbooli uji uwo ji iţeeñ yi bko ;

¹⁶ woli uyook ujaka jak ufuuţ uji ubi ya ya na ya, paankak aji pameeţana dko di pabiiŋ awo.

¹⁷ Kë uŋal wi Nawat Kabuka aŋaluŋ bankŧiinkuluŋ uşë ji uwo wi mnţo, aji wayëş baka pwayëş pŧool bukal na babuk baka te mnţo.

¹⁸ Aji wayëş baka pwayëş pŧool wal wi baţijanuŋ bhoŋar aleş pdo uko wi aţuuŋ pdo.

¹⁹ Nawat Kabuka abëkan pşih pi nul du baţi, aşih iko bŧi.

²⁰ An ŋwanjuŧ ŋi nul ŋankaaŋ mnhina abot aji ŋado ţi dko mënţ uko wi ajakuŋ : nabeeban Nawat Kabuka !

²¹ An bangoli biki nul banwooŋ du baţi, nanjaaŋ nalempara kabot kado uko wi aŋaluŋ : nabeeban Nawat Kabuka !

²² An bañaaŋ na ŋwanjuŧ na iko bŧi yi apaşuŋ du dko di nawohaŋ : nabeeban Nawat Kabuka ! Iwi uhaaş wi naan, beeban Yawe Nawat Kabuka !