Bgah 9 - Mankanya

Baţeŋan bajun ulemp

¹ Wi unuur uţënk bakreŋ ubanuŋ Moyiŧ adu Aaron na babukul biinţ na bantohi biki Iŧrayel

² aşë ji na Aaron : « Jejan ubay ukaş pa pdo bţeŋan bi ppënan ipekadu yi nu na unkaneel ukaş ŋi baktëruŋ bŧi, ŋul bŧi ŋaanwo kaţakëm nin dko dloŋ këme kawo na ujad uloŋ, iţij ŋa ţi kadun ki Yawe Nawat Kabuka.

³ Woli ido kşë ji na babuk Iŧrayel : “Najejan upi udow naţeŋan Nawat Kabuka ahilna amiiran ipekadu, najejan kak uwit ukaş na unkaneel ukaş ŋankaaŋ uşubal ŋanwooŋ ŋaanţakëm nin dko dloŋ këme awo na ujad uloŋ ŋi naktëruŋ bŧi.

⁴ Na manjoonan nţa Nawat Kabuka apën kawinana ţi kadunan, ukaaŋ kë nawo kajej uwit ukaş na unkaneel ukaş pa bţeŋan bi bŧiinkar ţi Nawat Kabuka na bañaaŋ kafiŋ ţi kadun ki nul, kabot kado indak kanaakrën na ukëra.” »

⁵ Baţij iko bŧi yi Moyiŧ ajakuŋ ţi ukëbi wi kaloona ki bayiti, kë bañaaŋ bŧi başë bi añog anaţ ţi kadun ki Nawat Kabuka.

⁶ Kë Moyiŧ aşë ji : « Uko wi, wi wi Nawat Kabuka ajakuŋ nawo i pdo ; nadoon kado wa, mndëm mi nul manhilna manwinana ţi kadunan. »

⁷ Moyiŧ aji wal mënţ na Aaron : « Ñogan keeri ţi bliit bi mngur, ido bţeŋan bi nu pa ppënan ipekadu na bţeŋan bi iktëraduŋ bŧi Nawat Kabuka, hënk amiir ipekadu yi nu na yi biki katohu. Ibale kşë do bţeŋan pa bañaaŋ biki Iŧrayel bŧi, jibi Nawat Kabuka ajakuŋ, ahilna amiir ipekadu yi baka. »

⁸ Aaron aya añog keeri du bliit bi mngur aşë junna afaal ubay ukaş Nawat Kabuka ahilna amiir pekadu di nul.

⁹ Babukul baţija pñaak, kë aŧoop pkoñ ţi pa aşë kër ţi itiim inwooŋ ţi ibaŋ yi bliit bi mngur abot ajeeş ploŋ ţi bliit uţeeh.

¹⁰ Ajej mniir na kbuuku na dko dannuurnaaniiŋ ţi udeeb ado kë batër bŧi du bliit bi mngur jibi Nawat Kabuka ajakuŋ na Moyiŧ ado.

¹¹ Aaron ajej uyemaţ na katël atër bŧi du bdig bi dko di bafëţuŋ.

¹² Wi wi Aaron aşaaŋ afaal unkaneel ukaş wi bţeŋan bi nul. Babukul bawula pñaak, kë alëŧ pa afooyan bliit bi mngur.

¹³ Bawula unŧaam wi bţeŋan wi bafal falanuŋ, na bkow, kë ajej atër bŧi du bliit bi mngur.

¹⁴ Anaj ipëş na ikuţaţ aşë do kë batër ya bŧi aba na iko indukiiŋ yi unŧaam wi bţeŋan.

¹⁵ Wi abaaŋ pdo bţeŋan bi nul, aşë jej bţeŋan bi bañaaŋ, kaţen Nawat Kabuka : Ajej upi udow wi bţeŋan bi ppënan ipekadu yi bañaaŋ, afaal wa aşë do bţeŋan jibi adoluŋ na ubay ukaş.

¹⁶ Ado kë baţij ŋnŧaam ŋi bţeŋan ŋi bawooŋ i katërad bŧi Nawat Kabuka aşë ţeŋan ŋa jibi ajakuluŋ.

¹⁷ Wi wi aşaaŋ aţij indak yi bañaaŋ biki Iŧrayel bawululuŋ yuŋ, aŧuman kañen aşë tër ya bŧi du bliit bi mngur. Bţeŋan bi adoluŋ hënk baanji baneenan ptër bŧi bi bajaaŋ batër nfa mandoli.

¹⁸ Abaañşaan wal mënţ uwit ukaş na unkaneel ukaş ŋi akfaaluŋ kadolna bţeŋan bi bŧiinkar ţi Nawat Kabuka na bañaaŋ. Babukul bawula pñaak pi ŋnŧaam ŋuŋ, kë alëŧ pa afooyan bliit bi mngur,

¹⁹ aţu na mniir mi uwit, na mi upi, ptant pi ŋa, mniir mambooluŋ iko imeeţ, na manjabuŋ ţi ya, na kbuuku na mniir manfooyuŋ ka, na dko dannuurnaaniiŋ ţi udeeb.

²⁰ Baţu yuŋ mënţ ţi ijënŧ, kë Aaron atër mniir bŧi aba du bliit bi mngur.

²¹ Ajej ijënŧ na pnkant pdeenu adiiman Nawat Kabuka, jibi Moyiŧ abiiŋ aji na a ado.

²² Wi abaaŋ pdo iţeŋan bŧi, Aaron atar wal mënţ iñen adek du bañaaŋ añehan Nawat Kabuka awul baka bnuura, aşë wala du bliit bi mngur,

²³ aneej na Moyiŧ du kaloona ki bayiti. Wi babaaŋ aşë pën, añehan Nawat Kabuka awul bañaaŋ bnuura. Wal mënţ, kë mndëm mi Nawat Kabuka manşë pën awinana ţi kadun ki bañaaŋ bŧi.

²⁴ Bdoo bloŋ bamara mara awoona du Nawat Kabuka atër iko inwooŋ ţi bliit bi mngur duuţ bŧi aba : ŋnŧaam ŋi bafaaluŋ na mniir. Wi bañaaŋ bawinuŋ uko waŋ, bukal bŧi balilan ahuuran aşë jot afëţ kaara ţi mboş.