Bgah 8 - Mankanya

Pţooran baţeŋan

¹ Yawe Nawat Kabuka aţiini na Moyiŧ aji :

² « Duun Aaron na babukul biinţ, ijej imişa yi baţeŋan, na ukëra uţeŋanaani, uwit ukaş udolni bţeŋan bi ppënan ipekadu, ŋkaneel ŋtëb ŋkaş na kacah kanwooŋ na ipoom indaţ.

³ Woli ibaa kşë yitrën bañaaŋ bŧi biki Iŧrayel du ukëbi wi kaloona ki bayiti. »

⁴ Moyiŧ ado uko wi Nawat Kabuka ajakuluŋ : kë bañaaŋ bŧi bayit du ukëbi wi kaloona.

⁵ Wi wi Moyiŧ aşaaŋ aji na bañaaŋ aya kado uko wi Nawat Kabuka ajakuluŋ.

⁶ Ado kë Aaron añog ul na babukul aşë do baka bañow bi meel.

⁷ Awoharan Aaron kamişa kayul, atana katël, awoharana bayeti na Efod, di aliinŧanuŋ na katël ki da ki atanuluŋ.

⁸ Aţu ţi bjënŧ bi Aaron ŋnuŋu ŋi bañëguŋ aşë kaban ţi ŋa iko idolni pţoori yi bajaaŋ badu Urim na Tumim.

⁹ Ataaya bkow aşë ţu ţi kadun ki uleenŧ wuŋ uko uloŋ wi uwuuru, wul ujaaŋ udiiman kë ayimani, jibi Nawat Kabuka abiiŋ aji na Moyiŧ ado.

¹⁰ Moyiŧ ajej wal mënţ ukëra uţeŋanaani, akër kaloona kanjaaŋ kadiiman kë Naşibaţi awo da na iko inwooŋ da bŧi.

¹¹ Alëŧ ukëra ŋyaaş paaj na uloŋ ţi bliit bi mngur, akër bliit bi mngur na iko inwooŋ da bŧi, bhem bi dko dñownaani na uţeeh wi ba kadolna iko mënţ iyiman.

¹² Akak ajeeş ukëra ţi bkow bi Aaron, akëra kadolna ayiman.

¹³ Wi abaaŋ, aşë do babuk Aaron kë bañogi, kë awoharan baka imişa iyul, atan baka itël, aţu baka ŋleenŧ jibi Nawat Kabuka ajakuŋ na a ado.

¹⁴ Wi adoluŋ haŋ aşë do kë baţij uwit ukaş wi bţeŋan bi ppënan ipekadu. Aaron na babukul bapaf kañen ţi bkow bi wa,

¹⁵ kë Moyiŧ aşë faal wa. Ajej wal mënţ pñaak na pkoñ aţu ţi itiim inwooŋ ţi ibaŋ yi bliit bi mngur kadolna ba bajinţ ţi këş ki Nawat Kabuka ; ajej pñaak atul ţi bliit uţeeh, akakan ba byimanaan kahilna kado da iţeŋan yi ppënan ipekadu.

¹⁶ Ajej mniir mambooluŋ iko imeeţ, na manjabuŋ ţi ya, na kbuuku na mniir manfooyuŋ ka, dko dannuurnaaniiŋ ţi udeeb na kbuuku atër ma bŧi kaba ţi bliit bi mngur.

¹⁷ Iko indukiiŋ ţi uwit, kanjan, uyemaţ na mbeţ, ajej ya katër bŧi kalowan dko di bafëţuŋ jibi Nawat Kabuka ajakuluŋ ado.

¹⁸ Wi abaaŋ aşë do kë baţij unkaneel ukaş wi bawooŋ i ptërad bŧi Nawat Kabuka, kë Aaron na babukul bapaf kañen ţi bkow bi wa.

¹⁹ Moyiŧ ajej wa afaal aşë lëŧ pñaak ţi ibaŋ yi bliit bi mngur.

²⁰ Atibëş tibëş uyemaţ, atër bkow bŧi na uyemaţ untibëşuŋ wuŋ, na mniir.

²¹ Ajej ipëş na ikuţaţ anaj ya atër ya bŧi aba bŧi ţi bliit bi mngur. Atër wa bŧi aba kë uwo bţeŋan bi badoluŋ pa Nawat Kabuka jibi abiiŋ aji na a ado, uwo uko untëruŋ wi pţëkëñ pajaaŋ palila.

²² Moyiŧ ado wal mënţ kë baţij unkaneel ukaş utëbanţën, wi bţeŋan pa pţooran baţeŋan, kë Aaron na babukul bapaf kañen ţi bkow bi wa.

²³ Wi wi Moyiŧ aşaaŋ afaal wa ajej pñaak aţu ţi plep pi kabaţ kadeenu ki Aaron, na ţi pndëŋ pi kañen kadeenu na ţi pndëŋ pdeenu pi kahoţ.

²⁴ Wi abaaŋ aşë do kë babuk Aaron kë bañogi, kë akak aţu baka pñaak ţi plep pi kabaţ kadeenu, ţi pndëŋ pi kañen kadeenu na ţi pi kahoţ kadeenu. Ajej pñaak alëŧ ţi ibaŋ yi bliit bi mngur.

²⁵ Ajej mniir : mi ptant, mambooluŋ iko imeeţ, na manjabuŋ ţi ya, na kbuuku na manfooyuŋ ka, dko dannuurnaaniiŋ ţi udeeb na kbuuku, na pnkant pdeenu.

²⁶ Apënan kapoom kaloŋ ţi kacah ki ipoom indaţ inwooŋ ţi kadun ki Nawat Kabuka, kapoom kanwooŋ na ukëra na pntaŋ apaf ya ţi mniir na pnkant pdeenu.

²⁷ Ajej iko mënţ bŧi aţu ţi iñen yi Aaron na ţi yi babukul kë başë deeŋ ya adek du baţi adiiman ya Nawat Kabuka.

²⁸ Akak ayeenk ya, atër ya bŧi aba du bliit bi mngur aţu na iko intëruŋ bŧi aţeŋan, kë uwo bţeŋan bi bajaaŋ baţooranaan baţeŋan kë pţëkëñ palil Nawat Kabuka.

²⁹ Moyiŧ ajej bjënŧ aşë deeŋ ba adek baţi adiiman Nawat Kabuka, kë bawo kafah ki Moyiŧ jibi Nawat Kabuka ajakuluŋ.

³⁰ Wi adoluŋ haŋ, ajej ukëra wi bajaaŋ baţeŋanaan na pñaak panwooŋ ţi bliit bi mngur alëŧ ţi Aaron na babukul na ţi imişa yi baka. Hënk di di adoluŋ kë Aaron na imişa yi nul na babukul na imişa yi baka kë bayimani.

³¹ Wi abaaŋ, aşë ji na Aaron na babukul : « Najuŋan uyemaţ du ukëbi wi kaloona ki bayiti, nade wa na ipoom indaţ imbëkanuŋ ţi kacah ki bajaaŋ badolna bţeŋan bi pţooran baţeŋan jibi njakuŋ aji an naluŋ kade wa.

³² Uko unkdukiiŋ ţi ipoom na uyemaţ, natër wa bŧi.

³³ Nado ŋnuur paaj na uloŋ ţi ukëbi wi kaloona ki bayiti, bë naankpën da, te wal wi pţooran pi nan pakbaaŋ, ţiki pawo ŋnuur paaj na uloŋ.

³⁴ Nawat Kabuka ajakuŋ ŋdo jibi ŋdoluŋ nţa aşë miir ipekadu yi nan.

³⁵ Kë hënk di nakţooŋ ŋnuur na ŋŧejan paaj na uloŋ du ukëbi wi kaloona kabaa kahil pdo kado iteŋan yi Nawat Kabuka aţuuŋ pdo kabuurna pkeţ. Uko waŋ wi wi ajakuŋ ndo. »

³⁶ Aaron na babukul biinţ bado iko bŧi yi Nawat Kabuka aţëpnuŋ ţi Moyiŧ aji na baka bado.