Bgah 19 - Mankanya

Idolade ţi pyiman na ţi pwayëş

¹ Yawe Nawat Kabuka aţiini na Moyiŧ aji na a :

² Ţiiniin na babuk Iŧrayel bŧi iji na baka : « Nawoon bañaaŋ banyimanuŋ, mnwo mi nan manwoon mnwo mnyimanaan, ţiki nji Yawe Nawat Kabuka Naşibaţi i nan, dyimani.

³ « Andoli ţi an awo kaŧiink anin na aşin, awo kadëman unuur wi pnoorfën. Nji dwooŋ Yawe Nawat Kabuka Naşibaţi i nan.

⁴ « Nawutan kadëman ŋŧoŋ, nawutan kayuuyan ifeeru kado itu. Nji dwooŋ Yawe Nawat Kabuka Naşibaţi i nan.

⁵ « Woli nado pa nji bţeŋan bi bŧiinkar ţi Nawat Kabuka na bañaaŋ, nawo kado ba jibi njakuŋ, bahilna balilën

⁶ Bţeŋan mënţ bawo kade'ana ţi unuur mënţ wi badoluŋ ba, këme ţi unuur utëbanţën ; uko undukiiŋ bŧi te unuur uwajanţën, uwo katër bŧi du bdoo.

⁷ Kë woli ude'ana ţi unuur uwajanţën, uwo uko unţopuŋ, uunklilën.

⁸ Ñaaŋ ankdeeŋ wa awo na pekadu, ţiki aţopan uko wi baţeŋanuŋ pa Nawat Kabuka ; ñaaŋ andoluŋ haŋ apën ţi pntaali pi naan.

⁹ « Woli naluŋ akit du ŋţeehan, naanwo kakit te du ibaŋ yi uţeeh. Naanwo kapërënţ ţi ŋţeehan.

¹⁰ Naanwo kak kaţëp kak ţi uţeeh wi mnko manjaaŋ mandolna ubiñu wi nan, kamar da mnko, këme kajejënţ mnko manjotuŋ da këme mbuk. Nawutar ma bajuuk na bayaanţ. Nji dwooŋ Yawe Nawat Kabuka Naşibaţi i nan.

¹¹ « Nin aloŋ ţi an aanwo kakiij aŧënţul, kaţilan këme kaguura.

¹² Nawutan kaţilan kaşë kamehna ţi katim naan. Woli nado haŋ naji nakar katim ki naan. Nji dwooŋ Yawe Nawat Kabuka.

¹³ « Iinwo kadeenkna aŧënţu, iinwo kakiija. Iinwo kafër na baluk bi ñaaŋ anlempuŋ pa iwi.

¹⁴ Iinwo kakar ñaaŋ andënëmuŋ bë iinkak awo kaţu ţi bgah bi nakuul uko uloŋ unhiniiŋ kawata. Iinwo kañoom Naşibaţi i nu. Nji dwooŋ Yawe Nawat Kabuka.

¹⁵ « Iinwo kapaţşër ţi pwayëş pi nu : iinwo kaţok na najuuk, wutan kayeenkar nayok, ţëpan ţëp iwayëş baŧënţu pwayëş panwooŋ pŧool.

¹⁶ Iinwo kado kakuut aŧënţu na uŧaak. Wutan katapar aŧënţu bţup badoo baţu'a pkeţ. Nji dwooŋ Yawe Nawat Kabuka.

¹⁷ Iinwo kadeebaţër aŧënţu kahank wa ţi uşalu, iwo kaţiini na a, hënk iinkduka na pekadu.

¹⁸ Iinwo kalukan kë iinwo kadeebaţër aŧënţu. Iwo kaŋal aŧënţu jibi iŋaluŋ uleefu. Nji dwooŋ Yawe Nawat Kabuka.

¹⁹ « Nawo kaţaş kak iko yi nţu'anaŋ pdo yi : iinwo kado unŧaam wi batani bi nu upaya unŧaam umpaţi na wa, iinwo kaŧepi mbuk mampaţuŋ ţi uţeeh wi nu, iinwo kawoh kamişa ki iŧenda impaţuŋ.

²⁰ « Woli ñiinţ apiinţ na ñaaţ anwooŋ aanwo najeeh i ñiinţ aloŋ ajokuŋ, bë baanuga ţi a kë ñiinţ mënţ aanwutana, ñaaŋ mënţ baţu'a baluk kë başë wo baankkeţ ţiki ñaaţ aanwo najeeh.

²¹ Aţij ţi kadun ki nji Nawat Kabuka unkaneel ukaş du ukëbi wi kaloona ki bayiti uwo wi bţeŋan bi bŧiinkar ţi Nawat Kabuka na bañaaŋ.

²² Naţeŋan ajej unkaneel wuŋ kado ţi ñaaŋ mënţ iko yi bajaaŋ bado Nawat Kabuka amiirna a, pekadu daşë dapën ţi a.

²³ « Wal wi nakneejuŋ du uŧaak wi Kanaan, kaŧepi da mnko mandoli, nado ŋşubal ŋwajanţ ŋi mnko mi mambukuŋ mankwooŋ uko wi nneenanuŋ, naankde ma keeri.

²⁴ Ţi uşubal ubaakanţën, najej mnko mi mambukuŋ bŧi manwo mi nji Nawat Kabuka, nado ufeŧtu kadëmanaan.

²⁵ Kë ţi uşubal uñeenaţën, nahinan kamar ma pa an ţi ŋleefan kade, hënk di di kakit ki nan kakdooŋ kaŧum ŧum pya. Nji dwooŋ Yawe Nawat Kabuka, Naşibaţi i nan.

²⁶ « Naankde nin unŧaam unwooŋ na pñaak. Naankdo nin mnţoori, nin dayaamu.

²⁷ Naanwo kapuunk imbaŋ yi uwel wi bkow kafooyan këme kapuunk ibaaŋ yi bduuh.

²⁸ Iinwo kakib uleef wal wi iwooŋ na puum. Nawutan kapiiŧ ţi ŋleefan. Nji dwooŋ Yawe Nawat Kabuka.

²⁹ « Nawutan kaţopan babukan baaţ wi nakţuuŋ baka pwaap ŋleef ŋi baka, kaţi uŧaak bŧi uwo ţi pjuban, uŧum iko iţop.

³⁰ « Nadoon kadëman unuur wi pnoorfën, naţijan bnuura dko dyimanaan di naan. Nji dwooŋ Yawe Nawat Kabuka.

³¹ « Nawutan kaya du bapena këme bado dayaamu ţiki baţopanan. Nji dwooŋ Yawe Nawat Kabuka, Naşibaţi i nan.

³² « Iwo kanaţa wal wi nantohi abiiŋ, kadëmana. Nadiimaan ţi mnwo mi nan kë naji naŧiinkën. Nji dwooŋ Yawe Nawat Kabuka.

³³ « Woli nayaanţ abi afëţ ţi pŧoofan, naanwo kaŋotna a.

³⁴ Nayaanţ anwooŋ ţi pŧoofan awo kawo ji ayiţan, nawo kaŋala jibi naŋaluŋ ŋleefan, naleşan kë nabi wo bayaanţ du uŧaak wi Ejiptu. Nji dwooŋ Yawe Nawat Kabuka, Naşibaţi i nan.

³⁵ « Nawutan kaguurad ţi uko wi pniib bŧi.

³⁶ Nalaan iko iniibi inwooŋ inuura. Nji dwooŋ Yawe Nawat Kabuka, Naşibaţi i nan ampënananaŋ du uŧaak wi Ejiptu.

³⁷ « Nawo kamëban bnuura bgah na idolade yi naan bŧi, nadoon kaţaş ya. Nji dwooŋ Yawe Nawat Kabuka. »