Bgah 14 - Mankanya

Bañow bi ñaaŋ ammaakuŋ bdoo

¹ Yawe Nawat Kabuka aţiini na Moyiŧ aji na a :

² « Hënk di di bawooŋ kado kado bañow pa ñaaŋ amaakuŋ bdoo wal wi bakţijuluŋ du naţeŋan :

³ naţeŋan apën du bdig bi dko di bafëţuŋ katenna ñaaŋ mënţ. Woli atena awin kë ajebi,

⁴ aşë do baţij pa ñaaŋ mënţ ŋkaŧ ŋtëb ŋanwooŋ ŋjeb abot ajinţ ţi këş ki naan, kaţu na bmul bi bko bi bajaaŋ bado Ŧedër, na ptal pjeenkal na kanah ki bko bi bajaaŋ bado hiŧop.

⁵ Ado bafaal ukaŧ uŧeek ţi pţukar duuţ, pambomanaanuŋ na ufuuş abot aŧum na meel mampënnuŋ du ukumpëş.

⁶ Ajej ukaŧ uloŋ na bmul bi Ŧedër na ptal pjeenkal na kanah ki hiŧop kaŧoop ţi pñaak pi ukaŧ unfaaluŋ.

⁷ Alëŧ wal mënţan ţi ñaaŋ ambiiŋ pdolan bţeŋan ŋyaaş paaj na uloŋ kaşë kaţup kaji ajinţ hënkuŋ kabaa kawutan ukaŧ ujeb wuŋ uyiţ uya du uţeeh.

⁸ « Ñaaŋ ankmbiiŋ pdo bañow anaj imişa yi nul, kapuunk uwel bŧi kaşë kañowa. Wal mënţ aji wo najinţ. Woli abaa, aşë kak du dko di bafëţuŋ kaşë wo aankneej du kaloona ki nul te ŋnuur paaj na uloŋ.

⁹ Ţi unuur uţënk paaj na uloŋ, akak apuunk uwel, na bduuh, nkank na uwel bŧi undukiiŋ, kanaj imişa kabot kañowa. Wal mënţ aji jinţ.

¹⁰ « Ţi unuur uţënk bakreŋ, ajej ŋkaneel, ŋaanwo kaţakëm nin dko dloŋ këme kawo na ujad uloŋ – ŋkaş ŋtëb na uwaţ uloolan undoluŋ uşubal, na ŋkil kañeen kaloŋ ŋi pşon pi banaakrënuŋ na ukëra, na pŧoof pi ulitru wi ukëra.

¹¹ Naţeŋan ankjañanuŋ iko ado ñiinţ mënţ abi anaţ ţi kadun ki nji Nawat Kabuka na iko yi aţijuŋ pbi kaţeŋanaan, du ukëbi wi kaloona ki bayiti.

¹² Ajej uloŋ ţi ŋkaneel ŋkaş ŋuŋ unwooŋ wi bţeŋan bi baluk na pŧoof pi ulitru wi ukëra, kadiiman ya nji Nawat Kabuka jibi ujaaŋ udolana.

¹³ Afaal unkaneel du dko di bajaaŋ bafaalna ŋnŧaam ŋi bajaaŋ batërad bŧi Nawat Kabuka du dko dloŋ danyimanuŋ ţi blay. Unŧaam unfaalaniiŋ wuŋ ubi wo wo wi naţeŋan, jibi bţeŋan bi ppënan ipekadu bawooŋ bi nul : bayiman maakan.

¹⁴ Naţeŋan ajej pñaak pi unŧaam kaţu ţi plep pi kabaţ kadeenu ki ambiiŋ pdo bañow na ţi pndëŋ pi kañen kadeenu na ţi pndëŋ pi kahoţ kadeenu.

¹⁵ Woli abaa, ajej ukëra kajeeş ntiinku ţi kañenul kamayu :

¹⁶ ajej pkoñ pi kañen kadeenu kaŧoop ţi ukëra wuŋ kaşë kalët ŋyaaş paaj na uloŋ ţi kadun ki Nawat Kabuka.

¹⁷ Wi wi aşaaŋ ajej ţi ukëra untiinku undukiiŋ ţi kañenul wuŋ kakër ţi plep pdeenu pi ankdolanuŋ bañow, ţi pndëŋ pi kañen kadeenu na ţi pi kahoţ kadeenu kaţu na pñaak pi bţeŋan bi baluk.

¹⁸ Ukëra undukiiŋ ţi kañen ki nul, ajej wa kakër ankdolanuŋ bañow ţi bkow kaşë kado iko injaaŋ ido pa bañow bi ñaaŋ anţopuŋ ţi kadun ki Yawe Nawat Kabuka.

¹⁹ « Wal mënţ naţeŋan ado bţeŋan bi ppënan ipekadu kaşë kado iko injaaŋ ido pa bañow bi ñaaŋ anţopuŋ. Wi wi aşaaŋ afaal unŧaam unţijuŋ katër bŧi pa nji Nawat Kabuka.

²⁰ Aţij wa kaţu du bliit bi mngur kaţu na bţeŋan bi ŋdeey. Hënk naţeŋan ado ţi a iko injaaŋ ido pa bañow bi ñaaŋ anţopuŋ. Wal mënţ awo najinţ.

²¹ « Woli ñaaŋ ankdolanuŋ bañow awo najuuk awo aanhil kanug iko yi nheparuluŋ, aţij unkaneel uloolan ukaş pa bţeŋan bi baluk. Bado bţeŋan kadiiman wa Nawat Kabuka. Aţij kak unkil wi pşon pannaakrënuŋ na ukëra, na pŧoof pi ulitru wi ukëra.

²² Akak aţij ŋbalab ŋtëb këme ŋrikaţe ŋtëb, jibi ahinanaaruŋ, uloŋ uwo pa bţeŋan bi ppënan ipekadu, uloŋ utër bŧi pa Nawat Kabuka.

²³ Ţi unuur uţënk bakreŋ, añooţ naţeŋan iko yi nţupuŋ yuŋ bŧi du ukëbi wi kaloona ki bayiti, ţi kadun ki Nawat Kabuka.

²⁴ Naţeŋan ajej unkaneel na pŧoof pi ulitru wi ukëra, kadiiman ya nji Nawat Kabuka jibi ujaaŋ udolana.

²⁵ Afaal unkaneel, kajej pñaak pntiinku kaţu ţi plep pi kabaţ kadeenu ki ambiiŋ pdolan bţeŋan, ţi pndëŋ pi kañen kadeenu na pi kahoţ kadeenu.

²⁶ Naţeŋan ajeeş wal mënţ ukëra untiinku ţi kañenul kamayu,

²⁷ kajej pkoñ pi kañen kadeenu kaŧoop ţi ukëra mënţ kaşë kalëŧ na pkoñ puŋ ŋyaaş paaj na uloŋ ţi kadun ki Nawat Kabuka.

²⁸ Wi adoluŋ haŋ aba, aşë ţu ukëra ţi plep pi kabaţ kadeenu ki ñaaŋ ambiiŋ pdolan bţeŋan, ţi pndëŋ pi kañen kadeenu na pi kahoţ kadeenu yi adooŋ abi ţu pñaak pi unkaneel.

²⁹ Ukëra undukiiŋ ţi kañen ki naţeŋan ajej wa kajeeş ţi bkow bi ñaaŋ mënţ. Wi wi aşaaŋ aji do ţi ambiiŋ pdolan bañow uko wi bajaaŋ bado ñaaŋ kakakna najinţ ţi kadun ki Nawat Kabuka.

³⁰ Ajej wal mënţ uloŋ ţi ŋbalab këme uloŋ ţi ŋrikaţe jibi ankdolanuŋ bañow ahiinanuŋ aţij,

³¹ kado bţeŋan bi ppënan ipekadu, undukiiŋ uşë utërad bŧi nji Nawat Kabuka na bţeŋan bi ŋdeey. Naţeŋan ado wal mënţ ţi a iko injaaŋ ido pa bañow bi ñaaŋ anţopuŋ.

³² Hënk di di ñaaŋ anwooŋ na pmaak pi bdoo aşë wo aanţënkbëri awooŋ kado pa bañow bi nul. »

Bŧoh ţi itoh

³³ Yawe Nawat Kabuka aţiini na Moyiŧ na Aaron aji :

³⁴ « Wal wi nakluŋ kaneej du uŧaak wi Kanaan wi nji nţenanaŋ, woli ddo kë bŧoh bapën ţi katoh kaloŋ du uŧaak wi nan uhalu,

³⁵ ajug katoh mënţ aya kaţup naţeŋan kaji na a : “Dwin uko unwooŋ ji bŧoh du katoh ki naan.”

³⁶ Wal mënţ naţeŋan ado bapënan iko bŧi inwooŋ ţi katoh kabaa kaya pten dko danjabuŋ duŋ. Hënk, nin uko uloŋ ţi ka uunkkak uţop. Wi wi abaaŋ aneej ţi ka katen ka.

³⁷ Aten dko danjabuŋ bnuura : woli uniw uwo na ihër inţuuŋ kanaam na ujaagal këme kajeenkëţ,

³⁸ apën ţi katoh kaşë kado batuh ka ŋnuur paaj na uloŋ.

³⁹ Ţi uunuur uţënk paaj na uloŋ, akak du katoh katen ka. Woli awin kë bŧoh badëmi,

⁴⁰ ado bapënan knduba kanwooŋ na bŧoh kafël du dko danwooŋ dţop, du bdig bi ubeeka.

⁴¹ Ado bagoot katoh meeţ bŧi, başë bajej iko ingootuŋ yuŋ bafël du dko danwooŋ dţop, du bdig bi ubeeka.

⁴² Bajej wal mënţ knduba kloŋ khalu kaţu du di bapënanuŋ iŧeek. Bakak ajej mboş mnhalu kakërna ka.

⁴³ « Woli bŧoh bakak apën wal wi bapënanuŋ knduba kanwooŋ na bŧoh akuţ agoot uniw akak akër wa aba,

⁴⁴ naţeŋan akak, katen ka. Woli awin kë bŧoh badëmi, uwooŋ kë bŧoh bwuţaan ba, katoh mënţ kaţopi.

⁴⁵ Bafom katoh mënţ, iko yi baniwuŋ na induba na yi babomanaanuŋ imul, na mboş mankërnuŋ ka. Bajej iko mënţ bŧi kafël du dko dţop, du bdig bi ubeeka.

⁴⁶ « Woli ñaaŋ aloŋ aneej ţi katoh mënţ wal wi batuhuŋ ka, aji wo naţop te utaakal.

⁴⁷ Woli ñaaŋ apiinţ du katoh mënţ këme ade da, awo kanaj imişa yi nul.

⁴⁸ « Kë woli naţeŋan aten katoh awin kë bŧoh baandëm ţi ka wi bapënanuŋ induba injabuŋ abot akër ka, aţup kaji katoh mënţ kawo kajinţ ţiki bŧoh bapën ţi ka.

⁴⁹ Woli bado bañow bi katoh mënţ, naţeŋan ajej ŋkaŧ ŋtëb, bmul bi bko bi bajaaŋ bado Ŧedër na ptal pjeenkal, na kanah ki bko bi bajaaŋ bado Hiŧop ;

⁵⁰ kaşë kafaal ukaŧ uŧeek ţi pţukar duuţ pambomanaanuŋ na ufuuş abot aŧum na meel mampënnuŋ du ukumpëş.

⁵¹ Ajej bmul bi bko bi bajaaŋ bado ŧedër na kanah ki bko bi bajaaŋ bado hiŧop buŋ na ptal pjeenkal na ukaŧ uloŋ, kaŧoop ţi pñaak pi ukaŧ uŧeek panaakrënuŋ na meel mi ukumpëş. Alëŧ pñaak pntiinku ŋyaaş paaj na uloŋ ţi katoh.

⁵² Hënk di di akjinţanuŋ katoh kanţopuŋ kuŋ na pñaak pi ukaŧ, meel mi ukumpëş, ukaŧ ujeb, bmul bi ŧedër na kanah ki hiŧop na ptal pjeenkal.

⁵³ Awutan wal mënţ ukaŧ ujeb wuŋ uyiţ uya du bdig bi ubeeka du uţeeh. Wi wi aşaaŋ ado ţi katoh uko wi bajaaŋ bado pa pjinţan ka. Wal mënţ kaji kajinţ.

⁵⁴ « Uko waŋ wi wi bgah bajakuŋ ţi mmaak mi katël, këme mi katël ki bkow,

^55-56 na ţi bŧoh banwooŋ ţi imişa, këme bŧoh banwooŋ ţi katoh ; ţi ŋwur, uleefu unkfootşiiŋ na ţi ŋndampu.

⁵⁷ Iko yi pdo mënţ ijaaŋ iţu ñaaŋ ahilan kaji ñaaŋ awo najinţ këme naţop këme uko uloŋ uwo ujinţ këme uţop. »