Bgah 12 - Mankanya

Bañow bi ñaaţ ambaaŋ abuk buk

¹ Yawe Nawat Kabuka aţiini na Moyiŧ aji :

² Ţiiniin na bañaaŋ biki Iŧrayel iji na baka : « Woli ñaaţ abuk napoţ ñiinţ, aji wo naţop ŋnuur paaj na uloŋ, jibi ajaaŋ awo naţop woli añowa.

³ Unuur uţënk bakreŋ bawalan napoţ kaŧëmp.

⁴ Ñaaţ akak aţo ŋnuur iñeen ŋwajanţ na ŋwajanţ kabaa kajinţ ţi pñaak pi atuluŋ ţi kabuk kuŋ. Wal mënţan bŧi aanwo kaban kako kanyimanuŋ këme kaya du blay bi dko dyimanaan

⁵ Woli abuk napoţ ñaaţ, aji wo naţop inëm itëb. Aji wo naţop jibi ajaaŋ awo naţop wal wi awooŋ ţi kañowa, kabaa ţo ŋnuur iñeen paaj na paaj (66) kabaa kak najinţ ţi pñaak pi atuluŋ ţi kabuk kuŋ.

⁶ « Wal wi ñaaţ akţooŋ kaba ŋnuur ŋuŋ bŧi, wi wi abaaŋ aţij unkaneel wi uşubal kado batërad wa bŧi Nawat Kabuka na ubalab umpoţi këme urikaţe kado bado bţeŋan bi ppënan ipekadu, uwole ñiinţ i i abukuŋ këme ñaaţ. Awo kaţij iko yi bţeŋan yuŋ ţi kadun ki naţeŋan du ukëbi wi kaloona ki bayiti.

⁷ Wal mënţ naţeŋan aţij ŋnŧaam mënţ ţi kadun ki Nawat Kabuka kaşë kado bţeŋan ahilna amiir ipekadu yi ñaaţ. Ajinţ wal mënţ ţi kadun ki Nawat Kabuka. « Uko waŋ wi wi ñaaţ ambukuŋ napoţ ñiinţ këme ñaaţ awooŋ kado.

⁸ « Woli ñaaţ aanka uko unugni unkaneel, aţij ŋbalab ŋtëb këme ŋrikaţe ŋtëb. Uloŋ uwo katërad bŧi Nawat Kabuka, utëbanţën uwo pa bţeŋan bi ppënan ipekadu. Naţeŋan ado ţi a wal mënţ uko wi bajaaŋ bado pa ppënan ipekadu. Ajinţ wal mënţ ţi këş ki Nawat Kabuka. »