Bgah 11 - Mankanya

Ŋnko ŋnuura na ŋko ŋţop

¹ Yawe Nawat Kabuka aţiini na Moyiŧ na Aaron aji na baka :

² Naţiiniin na babuk Iŧrayel naji na baka : « Ţi ŋko ŋanwooŋ ţi mboş bŧi, ŋi ŋi ndinanuŋ nado kade :

³ nahilan kado kade ŋko bŧi ŋi ikuţaţ ijeepşiiŋ, kë ŋabot aji ŋagubaj.

⁴ « Kë ţi ŋko ŋanjaaŋ ŋagubaj ţañ këme ŋi ikuţaţ ijeepşiiŋ ţañ, ŋi, ŋi ŋi nawooŋ naankde ji unŧaam wi pnkunkaali ţiki uji ugubaj aşë wo uunjeepşa ikuţaţ ; uwo kawo uko unţopuŋ ţi këş ki nan ;

⁵ naanwo kade unŧaam umpoţi wi bajaaŋ bado daman ţiki uji ugubaj aşë wo uunjeepşa ikuţaţ, uwo kawo uko unţopuŋ ţi këş ki nan ;

⁶ naanwo kade umaalu ţiki uji ugubaj aşë wo uunjeepşa ikuţaţ, uwo kawo uko unţopuŋ ţi këş ki nan.

⁷ Naanwo kade unkuma ţiki ujeepşa ikuţaţ aşë wo uunji ugubaj, uwo kawo uko unţopuŋ ţi këş ki nan.

⁸ Naanwo kade uyemaţ wi ŋko ji ŋuŋ mënţ bë naankak aban ŋa woli ŋakeţi : ŋawo kawo ŋko ŋanţopuŋ ţi këş ki nan.

⁹ « Ţi ŋko ŋanwooŋ ţi meel bŧi ŋi ŋi ndinanuŋ nado kade : ŋko ŋankaaŋ ilamnţaani na ipepat awo ţi meel, idëk këme itant.

¹⁰ Kë naanwo kade ŋanwooŋ ŋaanka ilamnţaani abot awo ŋaanka ipepat ŋanwooŋ ţi idëk këme ţi itant, ŋko ŋmpoţi bŧi ŋanwooŋ ţi meel ŋawo ŋţop maakan ţi këş ki nan.

¹¹ Ŋawo ŋţop maakan ţi këş ki nan, naankde uyemaţ wi ŋa, naankak awo nin kaban ŋa woli ŋakeţi.

¹² Ŋko bŧi ŋanwooŋ ţi meel awo ŋaanka ilamnţaani na ipepat ŋawo keeri ŋţop maakan ţi këş ki nan.

¹³ « Ţi ŋkaŧ, ŋi ŋawooŋ ŋanţopuŋ maakan ţi këş ki nan, ŋi nawooŋ naankde : ujugude, unkunuur na udek wi bdëk.

¹⁴ Umilaŋ na ŋjugde ŋandukiiŋ.

¹⁵ Ŋntomaali bŧi.

¹⁶ Utruţë, upëpër, upoş kankeenu, na ŋţiiru bŧi.

¹⁷ Unkuun, ungëman, unkukalu,

¹⁸ upaata wi bdëk, udooto, ungëman,

¹⁹ uyoor ŋpula, ŋyaafa bŧi, ukaŧ balugum na ulak.

²⁰ « Uko umpoţi unwooŋ na ihoţ aşë wo na ibaaklu uwo uţop maakan ţi këş ki nan.

²¹ Kë naşë hil kade ţi ŋko ŋmpoţi ŋanwooŋ na ibaaklu, ŋanwooŋ na ihoţ aji ŋalut ţi mboş.

²² Hënk keeri ddinan nado kade ŋi : ŋguul bŧi na ŋmpëtëm bŧi na ŋntëmplënplut bŧi, na ŋyoor bapoţ.

²³ Kë ŋko ŋmpoţi bŧi ŋanwooŋ na ihoţ akuţ awo na ibaaklu, ŋawo ŋţop maakan ţi këş ki nan.

²⁴ « Woli naban ŋnŧaam ŋi, naţop : ñaaŋ ankbanuŋ ŋa woli ŋakeţi aji wo naţop te utaakal.

²⁵ Ñaaŋ ankjejuŋ ŋa wi ŋakeţuŋ awo kanaj imişa yi nul, aji wo naţop te utaakal.

²⁶ « Uko undoli unwooŋ na ikuţaţ inwooŋ iinjeepşaa ţañ këme awo uunkgubaj ţañ uwo uţop ţi këş ki nan, woli naban wa wi ukeţuŋ, nawo baţop.

²⁷ Kë hënk kak di di ŋko bŧi ŋanwooŋ na ihoţ ibaakër abot apoşna iñiiri yi ihoţ ŋawooŋ ŋţop ţi këş ki nan wal wi ŋakeţuŋ : ñaaŋ ambanuŋ ŋa wal wi ŋakeţuŋ aji wo naţop te utaakal.

²⁸ Ñaaŋ ajejle ŋa wi ŋakeţuŋ, awo kanaj imişa yi nul, aji wo naţop te utaakal, ŋawo ŋţop ţi këş ki nan.

²⁹ « Ţi ŋko ŋanjaaŋ ŋaţuura ţi mboş, ŋi ŋawooŋ ŋanţopuŋ ţi këş ki nan : utuuj, uyaaţ, ŋluul bŧi,

³⁰ uduŋ kafëţ, utaaku, ufonţ, uñiiñu.

³¹ Ţi ŋko ŋmpoţi bŧi, ŋaŋ, ŋawooŋ ŋţop ţi këş ki nan. Woli ñaaŋ aban ŋa wi ŋakeţuŋ aji wo naţop te utaakal.

³² Woli uloŋ ţi ŋko mënţ ujot wal wi ukeţuŋ ţi iko iloŋ yi najaaŋ nawoonaan iji iwo iţop. Iko mënţ ihina kawo pţukar, kamişa, kanjan, uko bŧi wi najaaŋ naţuuna iko yi nan. Naţu kako mënţ ţi meel, kaji kawo kaţop te utaakal kabaa kak kajinţ.

³³ Woli uko uloŋ ţuŋ ŋuŋ mënţ ujot ţi pţukar pi nan meeţ nawo katul uko unwooŋ ţi pa ; uko unwooŋ ţi pţukar bŧi uji uwo uţop, kaşë kafom pţukar mënţ.

³⁴ Uko ude këme udaan wi baţuuŋ meel manwoonuŋ ţi pţukar mënţ uwo uţop.

³⁵ Woli ŋko mënţ wal wi ŋakeţuŋ ŋajot ţi kako kaloŋ, kaji kaţop uwole ufuurnu këme bdoo bjuŋni ŋawo ŋţop, iko mënţ iwo kafom.

³⁶ Kë ŋkumpëş, itank iţuuni meel na itant işë wo iinkţop woli ŋajot da wal wi ŋakeţuŋ, ñaaŋ anşaaŋ aban ŋa wi ŋakeţuŋ awo naţop.

³⁷ Woli uloŋ ţi ŋko mënţ ukeţ aşë jot ţi mbuk manwooŋ mi pŧepi, manji manwo mnjinţ nahil kaŧepi ma.

³⁸ Kë woli mbuk mantulani, kë uloŋ ţi ŋnŧaam mënţ ukeţ aşë jot ţi ma, manţopi.

³⁹ « Woli unŧaam uloŋ ţi ŋi nahinanuŋ kade umara mara keţ, kë naban wa, nawo baţop te utaakal.

⁴⁰ Ñaaŋ adele uyemaţ wi wa awo kanaj imişa yi nul, aji wo naţop te utaakal. Ñaaŋ akakle jej ŋa wal wi ŋakeţuŋ awo kanaj imişa yi nul, aji wo naţop te utaakal.

⁴¹ « Naanwo kade nin uko unknţuuriiŋ ţi mboş ţiki ŋaţop maakan ţi këş ki nan.

⁴² Naanwo kade ŋko mënţ, uwole uko unkţuuruŋ kayiŋ ţi mboş, këme ŋanwooŋ na ihoţ ibaakër na impeluŋ ibaakër. Ŋnko ŋankţuuriiŋ ţi mboş bŧi ŋawo ŋţop maakan pa an, naanwo kade ŋa.

⁴³ Naanwo kaţopan ŋleefan ţi pde uloŋ ţi ŋko mënţ. Nawutan kawut ŋa ŋaţopanan.

⁴⁴ Nji dwooŋ Yawe Nawat Kabuka Naşibaţi i nan, mnwo mi nan manwoon mnwo mnyimanaan ţiki nji dyimani. Nawutan kaţopan ŋleefan na ŋko ŋankţuuriiŋ ţi mboş.

⁴⁵ Nji dwooŋ Yawe Nawat Kabuka, andolanaŋ kë napën du uŧaak wi Ejiptu, kawo Naşibaţi i najaaŋ nadëman naşë nayiman ţiki nji dyimani.

⁴⁶ « Yi, iwooŋ iko yi pdo kaţaş ţi uko wi ŋko, na ŋkaŧ na ŋko bŧi ŋanwooŋ ţi meel na ŋankpuliiŋ ţi mboş.

⁴⁷ Iko yi pdo kaţaş yi iwo pa pdolan nayikrën uko ujinţ na uţop, uko unjaaŋ ude'ana na unwooŋ uunkde'ana. »