Bgah 10 - Mankanya

Pkeţ pi babuk Aaron batëb

¹ Nadab na Abihu babuk Aaron biinţ bajej andoli pţukar pi nul ptërni mnkulan. Baţu ţi pa bdoo aşë ţu mnkulan, atërad bŧi Yawe Nawat Kabuka. Kë aşë wo aanji na baka batërada bŧi uko mënţ.

² Kë bdoo başë mara mara apënna du Nawat Kabuka atër baka bŧi kë bakeţ ţi kadun ki nul.

³ Moyiŧ aji wal mënţ na Aaron : « Mënţ uko wi wi wi Nawat Kabuka abiiŋ aţiiniyaan wi ajakuŋ : “Ddiiman bañaaŋ bankñognuŋ kë nji dyimani. Ddiiman ţi kadun ki bañaaŋ bŧi mndëm mi naan ?” » Kë Aaron ayompi.

⁴ Wi uko waŋ uţëpuŋ, Moyiŧ adu Mişayel na Elŧafan babuk Uŧiyel anwooŋ aţa aşin Aaron, aji na baka : « Nabiin najej muum mi babuk aşinan nalowan ţi kadun ki kaloona ki naan, du bdig bi dko di nafëţuŋ. »

⁵ Wi babiiŋ baţënk muum kë manwo na imişa, kë bajej ma apënan ţi dko di bafëţuŋ jibi Moyiŧ ajakuŋ na baka.

⁶ Moyiŧ aţiini na Aaron na bi Eleyaŧar na Itamar babuk Aaron bandukiiŋ aji na baka : « Nawutan kadiiman kë nawo na puum, kagarëş wel wi nan kabot katow imişa yi nan. Woli nado haŋ nakeţ, Nawat Kabuka akuţ kadeebaţër bañaaŋ biki Iŧrayel bŧi. Kë bañaaŋ biki Iŧrayel bŧi bandukiiŋ başë luŋ kawoonir bayiţan biki bdoo bi Nawat Kabuka bafiŋuŋ.

⁷ Nawutan kaţëp blay bi kaloona ki bayiti, kaţi nabi nakeţ, nawo na ukëra wi Nawat Kabuka wi bakëranaŋ ţi uleef kë nakak ayiman. » Kë bado uko wi Moyiŧ ajakuŋ na baka.

Idolade pa baţeŋan

⁸ Yawe Nawat Kabuka aţiini na Aaron aji na a :

⁹ « Iwi na babuku, woli nabi du kaloona ki bayiti, nakdaan nin poot, kaţi nabi nakeţ. Hënk di nawooŋ kado te mnţo an na pntaali pankpënnuŋ ţi an,

¹⁰ nahilna name uko unyimanuŋ na unwooŋ uunyimani, unjinţuŋ na unţopuŋ,

¹¹ nakuţ najukan biki Iŧrayel iko bŧi yi nji Nawat Kabuka nţëpnuŋ ţi Moyiŧ aţu baka pdo. »

¹² Moyiŧ aji na Aaron na Eleyaŧar na Itamar babukul bandukiiŋ : « Najejan uko undukiiŋ ţi indak intëruŋ pa Nawat Kabuka, nade ya. Indak mënţ iinji iţu uko utajanaani pşon. Nadeena ţi kañog bliit bi mngur ţiki indak mënţ iyiman maakan.

¹³ Nadeena ya ţi dko dyimanaan ţañ, iwooŋ kafah ki nu na babuku biinţ ţi iko yi batëruŋ bŧi pa nji Nawat Kabuka. Hënk di Nawat Kabuka ajaknuŋ aji nado.

¹⁴ Kë bjënŧ bi idiimanuŋ Nawat Kabuka na pnkant pi iţenuluŋ, nade ya ţi dko danjinţuŋ ţi këş ki nul iwi na babuku biinţ na baaţ, iwooŋ kafah ki nu na babuku, ki bajaaŋ bawulan ţi bţeŋan bi bŧiinkar ţi Nawat Kabuka na bañaaŋ bi babuk Iŧrayel.

¹⁵ Pnkant na bjënŧ yi baţeŋanuŋ pa Nawat Kabuka injaaŋ iţu na mniir mantëruŋ, iwo i pdiimana ya. Iwo yi nu na babuku te mnţo jibi Nawat Kabuka aţuuŋ pdo. »

¹⁶ Moyiŧ ala pme dko di upi unwuluŋ pa bţeŋan bi ppënan ipekadu uwooŋ. Wi ameeŋ kë bado bi tër wa bŧi aba, adeebaţër bi Eleyaŧar na Itamar babuk Aaron bandukiiŋ.

¹⁷ Aji na baka : « Wel ukaaŋ kë naande unŧaam wi nayeenkuŋ pa ppënan ipekadu du dko dyimanaan ba ? Uwo unŧaam unyimanuŋ maakan wi Nawat Kabuka awulanaŋ, kahilna kapënan pekadu di bañaaŋ biki Iŧrayel.

¹⁸ Wi pñaak pi wa pawooŋ paantul du dko dyimanaan, nawo lah kade uyemaţ wi wa du dko dloŋ dyimanaan ţi blay, jibi njakanaŋ. »

¹⁹ Kë Aaron aşë ji na Moyiŧ : « Tenan, nţa di babuk naan bawul bţeŋan bi ppënan ipekadu na iko yi batëruŋ bŧi ţi kadun ki Nawat Kabuka, kë ime uko undoluŋ babuk naan bukundi. Woli dde lah unŧaam unţeŋanuŋ pa ppënan ipekadu, uwoha uko unuura ţi kadun ki Nawat Kabuka i ? »

²⁰ Moyiŧ aŧiink uko mënţ, kë bţup balila.