Yúda 1 - Ɔngana á Kɛ̌kɛ

Nsesɔ

¹ Eme Yúda nende muna-amakɛ na Yakɔ́ɓɔ, nende mbɛɗanigi nde ɓa Yéso Kiísito. Nenóɗundui ɓenu íɓunde Abɛ Mokonga anɔɔphani, áonókonda na amba anu ka phɔa Yéso Kíisito.

² Ambe Mokonga ayameɛ ka ɓenu ngɔmi, ɓujɛjɛ n'ekondi nɛkɛ.

Ɔ́ɛnjiani na ɓagoisigi á mbɛa

³ Cɔ, ɓadani ékondi, ɗétú na mɔphɛ phɛɛ á ɗunduia anu nyɔngɔ á ɓoamia á ka měma, nnde ɓesu ɓɔbu ɓeɓeeki. Nɛɔni gǎkɛ ánjá nénoɗunduiɛ ka opha anu ɓukpɛkpɛ ka měma, ɓóúniɛ ɓeekea nde Mokonga ɗéɓophi ɓakpa nɛkɛ mɔngɔ ímoci.

⁴ Nenóɗundui ɓo nga, ɓakpa ɓájɛɗe ɓángí ka nkíndí anu ka ɓɔsɔmɛa. Ɓáoketia ka ɓojeɗe ɓonjánja-ékondi ndea Mokonga, ka gea ɓágbukumiɛ nyɔngɔ á iɛɓɛ nɛɓɔ. Ɓɔ, ɓáon'yá ngoisigi ndeasu mmbé a tɔ moci n'ande Mɔkɔta ndeasu Yéso Kiísito. Cɔ, Ɓuku á Mokonga ɗáyɔngi nyɔngɔ á tena nyɔngɔ ndeabɔ kala.

⁵ Nanga ɓóúba nyɔngɔ ndɔ bui, nekondi gea ɓókanisiɛ ɓî Mɔkɔta ɗěamisi ka mɔngɔ ímoci Ɓaisilaɛ́li ka tokisa aɓɔ ká nji á Mísii, â ndiu goto ɔ̌kɔndɔkisa ɓunde ɗáɓákámɓeeki.

⁶ Cɔ, kanisiani phɔ́ nyɔngɔ á ɓamalaéka: Ɓunde ɗáɓákákondi bɛɗanaga na kɔkɔta nde Mokonga ɗéɓophi, ɓâ ndiu oɗeketa sasaɓɔ ɔma ndeaɓɔ. Mokonga ɗáeɓóege na ngɔi á ngɔa, áǒbisa kusi ɔma á kaiphiɔ á mɛyɔ ka ɓondeaga esa ángbó á tena nyɔngɔ.

⁷ Kanisiani phɔtɔ nyɔngɔ á Sodóma, Gɔmɔ́la na ntanga-nji á bîbíbí. Nyɔngɔ á iɛɓɛ á ɓato á ka ntanga-nji ndɔ ɗátú phɔtɔ ájeɗe ɓea ɓamalaéka ndɔɔ. Ɗáɓáogea iɛɓɛ nnde atingani n'índe á kokpa. Ɓɔ, ɓáotambaga ka nsa á mɛyɔ. Ɓánde mphangiɔ ka ɓakpa ɓɔbu.

⁸ Eya, ɓakpa ɓájeɗe ɓundɔ ɗáɓángí ka nkíndí anu ka ɓɔsɔmɛa, ɓá phɔtɔ ogea ɓó. Njeki nde ɓáoɗa ně, a tɔ á mɔphɛ á uja nyama aɓɔ sasaɓɔ na ɓɛnjiaga kɔkɔta ndea Mokonga. Ɓáǒbóma econji á ɓoombia á na koba.

⁹ Nanga Mikaɛ́li áɓá mɔkɔta á ɓamalaéka, ɗákági gǎkɛ ɓó. Ɓî ɗáɓáopúa na nketi na sanea mǒnda á Mósa, Mikaɛ́li ɗákáteni gǎkɛ nyɔngɔ na bóma á nketi. Ɗángi ndiu nketi gea: «Ambe Mɔkɔta áophekeɛgɛ.»

¹⁰ Cɔ, ɓakpa ndɔ ɓáobóma kema bui nde ɓákáoúba. Úbapha aɓɔ aotamba kimoci na tambea aɓɔ ɓea ɓanyama ɓunde ɓáká na úbapha. Nndɔ ungɔ aǒɓúngisaga.

¹¹ Ngomi aɓɔ ka nyɔngɔ nde ɓáɓi aphe ndea Kaína! Ɗáɓábɛɗanigi ájeɗe ekuma á imɔna ɓea Ɓaláma. Ɗáɓákɔndɔkani ka nyɔngɔ nde ɗáɓáyomboki ɓea nkpa nde ɓáɔmɔphana Kɔ́la.

¹² Ɓánde ephiphi ájeɗe ka nkíndí anu ka mbenɔ á eaga eea á ekondani á komunamema, ɓáoeaga n'ɛphɛɛu kángá á soni na ɓá tɔ ɔɛnjia mɔphɛ nɛɓɔ sasaɓɔ. Ɓáogea ɓó kángá kɔɓɔɓɔkɔ. Ka mbenɔ á eaga, ɓá tɔ ɔnjia nyɔngɔ nɛɓɔ sasaɓɔ. Ɓákengeani n'egugu nde aoyembia ka nyɔngɔ á maphopho nde nna kɔɔkisa mbua. Ɓá tɔ ɓea me nde nna ɔgɔmbisa mbuka nanga áɓá matú á gɔmbisa í. Cɔ, ɓá ye ophúia mǐgi í, áokuwa mɔngɔ iɓɛ.

¹³ Ɓákengeani na kɛtɛmbɔ akpɛ á oɓenge, nnde aophúia phû á tambea aɓɔ á soni. Ɓákengeani na ɓasɛɛngɔa nde ɓáotoaga. Mokonga aebisíí esa bui ɔma á kaiphiɔ akpɛ phɛɛ.

¹⁴ Cɔ, nyɔngɔ aɓɔ unge Ɛnɔ́ka nkpa á ko ngianjaga iɓɛ kpangá ka Adámu ɗáɔtu kala gea te: «Ɔ́nani, Mɔkɔta aobika na ɓamalaéka ndeakɛ ɓásii phɛɛ

¹⁵ ka gea, ɓátenɛ nyɔngɔ á ɓakpa ɓɔbu. Ɓátenande akpɛ nyɔngɔ á ɓato á ɓojeɗe ɓɔbu ka nyɔngɔ á ɓojeɗe nɛɓɔ bui nnde ɗáɓátɔtɔkisi ka mbɛnɔ á oyombɔ na ka nyɔngɔ ájeɗe-jeɗe bui nde ɗáɓáyɔngigi ka phɔa Mokonga.»

¹⁶ Ɓakpa ndɔ ɓáná na maseye. Ɓáophangia esúia nɛɓɔ ka ngɔngɔnaga. Ɓáotówa ntaɓo esa bui ka nyɔngɔ nde ědondaeka ka sungiaga á enda aɓɔ. Ɓá tɔ oɓea tambea aɓɔ ájeɗe, nyɔngɔ á k'aphenɔkɔ aɓɔ a tɔ á ébeba na ɓɔ́ngá á ɓakpa ka gea ɓátɔɛ ka kema.

Ɓɔphɛi ka ɓaɓêki

¹⁷ Cɔ, ɓenu gǎkɛ, ɓadani ékondi, kanisiani phɔ́ nyɔngɔ nde ɓateki ndea Mɔkɔta ndeasu Yéso Kiísito ɗáɓáyɔngi kala.

¹⁸ Ɗáɓánóngoɗi ɓe: «Ka mbenɔ á sungiaga, ɓakpa ɓánɔtɛbɛagande. Ɓáɓeande tambea ndɛaɓɔ ájeɗe.»

¹⁹ Ɓɔ ɓáunge ɓánde cina á katanaga á ɓakpa. Ɓato á mɔphɛ á ka nyama, kángá Měma á Mokonga.

²⁰ Cɔ, ɓenu ɓadani ékondi, mamani akpɛ ka ɓeekea nɛnu á kanga ɓojeɗe. Mɛmani na ɓukpɛkpɛ á Měma á kanga ɓojeɗe.

²¹ Ikani suɓi ékondi ndea Mokonga, ka ɓondeaga ɓonjánja-ékondi ndea Mɔkɔta ndeasu Yéso Kiísito ka opha anu enda á mɛyɔ.

²² Ókuiani gǎkɛ ngomi ɓakpa nde ɓána ngǎka.

²³ Óamisani ɓuangbo na nsa. Ɓunɛngbo goto, ókuiani ngomi índɔ ana kɔɓɔɓɔkɔ. Ɓókodungɛmbɛ ka ngɔ́mbɛ á ka nyama aɓɔ, ka nyɔngɔ nde a ye jɔɔkani n'ekuma nɛɓɔ ájeɗe.

Obebɔ á ka sungiaga

²⁴ Mokonga aɔtɔka ámbá anu ka gea ɓókoguɛmbɛ ka ɓojeɗe na kiɗianisa anu mosá á ɓoombia akɛ kángá kisɛki ka maseye.

²⁵ Yɛ Mokonga sisakɛ, Namisi ndeasu ka Yéso Kiísito Mɔkɔta ndeasu, áɓɛ n'obebɔ, ɓongbóngbó, ɓukpɛkpɛ, kɔkɔta, kpanga kala, kɛ̌kɛnde na ka saga na saga, Áɓɛ ɓó!