Yoáni 8 - Ɔngana á Kɛ̌kɛNke nde ɗágu n'etoa 1 Yéso â gǎkɛ oga nɛkɛ ka mamba á Mijɛitúni. 2 Mama í ka mɔkɛsuɛ, â goto ongia k'éndu á Mokonga. Ɓakpa ɓɔbu ɓáombikia. Yɛ, áoika ka oɗo, ka phɛá aɓɔ. 3 Ɓaɗundu-ɛɔphi na Ɓaphaisáyɔ, ɓáombikia na nke n'agu n'etoa. Ɓáombisa nke ndɔ mosá á ɓakpa, 4 ɓáongoɗea Yéso: «Ngoisigi, nke nde agu n'etoa. 5 Suɓi ɛ́ɔphi ndea Mósa asósosi gea, ɓake ɓea ɓunde, ɓáɛ́ɓɛtɛ n'ɛtɛ, ɓákuwɛ. Cɔ, oɓɛ, ogi ɓo?» 6 Ɗáɓáɔyɔnga ɓó ka tombaga akɛ gea, ɓántɔngɛ. Yéso â gǎkɛ ǒgbuka, áoɗundua ka oɗo na miki á njaga. 7 Ɓî ɗáɓásuí úsiaga akɛ, Yéso áǒmɛsia, áǒgea: «Mmbé nna na ɓojeɗe ka ɓenu, ákpangɛ makea akɛ ɛtɛ k'ama mosá-mosá.» 8 Mpɔ â goto ǒgbuka, áoɗundua ka oɗo. 9 Ɓî ɓáɔ́ki ye ɓó, ɓatɔngi ɓɔbu ɓáojuana moci-moci. Ɓagbɛga ɓáokpanga juana, Yéso áojiga sasakɛ, nke ndɔ n'amamege tɔ mosá akɛ. 10 Yéso áǒmesia, áongea nke ndɔ: «Nke nde ca! Ɓatɔngi nɛkɔ ɓá wani? Nna na ka ɓɔ mmbé aotenei nyɔngɔ akpɛ?» 11 Nke ndɔ áonsikisia gea: «Mɔkɔta, ka ɓɔ moci nna wani.» Yéso áongea: «Eme phɔtɔ, kétenɛku nyɔngɔ nɛkɔ akpɛ. Cɔ, gǎ nɛkɔ, kpanga kɛ̌kɛnde, kogeɛmbɛ ye ɓojeɗe.»] Yéso ande owanga ka mokonda 12 Yéso â goto ǒngoɗea ɓakpa te: «Nende owanga ka mokonda. Mmbé aomoɓea, kátámbɛku tanda ka keiphe, aɓande ndiu na owanga á enda.» 13 Ɓaphaisáyɔ ɓáongea: «Ǒɗigimisa ka nyɔngɔ nɛkɔ sasakɔ! Ɓî a ɓó, nyɔngɔ nɛkɔ nnde ooɗigimisa nna á ɗoni.» 14 Yéso áǒsikisia te: «Nanga néɗigimisa nyɔngɔ nɛmɔ sasani, nnde nɛɔyɔnga, ande ɗoni. Nga, neoúba ɔma nde netóki na ɔma nde neoga. Cɔ, ɓenu gǎkɛ, ɓókóoúba ɔma nde netóki, na ɔma nde neoga. 15 Ɓenu, ɓo tɔ otena nyɔngɔ akpɛ ka kokpa. Eme gǎkɛ, kéotena nyɔngɔ ndea nkpa. 16 Atúoɓá na ne gǎkɛ otena nyɔngɔ, ámbé ne tɔ otena ka koɗoni nga, kéotena sasani, Abɛ mmbé amoteki, ɓe tɔ na yɛ kimoci. 17 Suɓi ɛ́ɔphi nɛnu ɓáɗundu gea, ɓakpa ɓaɓɛ ɓá ye oɗigimisa nyɔngɔ, ámbé nyɔngɔ nde ɓáɗigimisi ande á ɗoni. 18 Nena ɓaɗigimisi ɓaɓɛ: eme sasani, na Abɛ, mmbé amoteki.» 19 Ɓâ gǎkɛ omúsia: «Cɔ, Abakɔ a wani?» Yéso áǒsikisia: «Ɓókóomoúba eme, ɓókó phɔtɔ omúba Abɛ. Ɓo ye omoúba eme, ámbé ɓomúbande phɔtɔ Abɛ.» 20 Yéso ɗáyɔngi nndɔ, ɓî ɗáogoisaga k'éndu ndea Mokonga, k'ɔ́ma nde ɗáɓáobisaga sanduku ɛ́kɔmi. Nkpa ɗákándungi gǎkɛ nga, mbenɔ nɛkɛ ɗákájumbɛ. Yéso atɔ̌mi nyɔgɔ á gǎ mɔtɛ á Abakɛ 21 Yéso â goto ǒgea: «Cɔ, neoga. Ɓomokaɓande, ɓokuwande gǎkɛ na ɓo phɔ́tɔ na ɓojeɗe nɛnu. Ɓɔ́kɔ́ɔtɔka na ɓoge kuɓî neoga.» 22 Ɓayúda ɓáɔyɔngaga sɔsɔɓɛ aɓɔ gea: «Ande gea te, ěkusande nga, ɗági ‹ɓɔ́kɔ́ɔtɔka na ɓoge kuɓî neoga.›» 23 Yéso áǒngoɗea ɓe: «Ɓonde ɓato á ka oɗo. Eme, ne gǎkɛ nto á na koba. Eme, ké nto á ka mokonda ndee. Ɓenu ndiu ɓáunge ɓonde ɓato á ka mokonda. 24 Ka nyɔngɔ índɔ unge nenóngoɗi ye tɔ gea, ɓokuwande ka nyɔngɔ á ɓojeɗe nɛnu. Nga, aoɓá na ɓókóɓeeki gea te: ‹EME NEƁEI,› ɓokuwande ka ɓojeɗe nɛnu.» 25 Mpɔ, ɓáomúsia Yéso: «Onde ani?» Yéso áǒsikisia: «Netónongoɗi ye mosá. 26 Nena nyɔngɔ ásii á yɔnga na tena í ka phɔanu. Cɔ, mmbé amoteki, ande nto á ɗoni. Nɛ tɔ ɔ̌tɔmia ɓato á ka mokonda, nnde nɛɔ́ki mɔtɛ-akɛ.» 27 Ɗáɓákáengekisi gea ɗáɔyɔnga ka phɔa Abakɛ. 28 Mpɔ, Yéso áǒngoɗea: «Mbenɔ nde ɓontáisande Muna-Nkpa, ɓoúbande gea EME NEƁEI. Ɓô phɔtɔ oúba gea, kéogea kema ka kɔkɔta nɛmɔ sasani, ne gǎkɛ tɔ ɔyɔnga nnde Abɛ ɗámogoisigi. 29 Mmbé atómoteki a kimoci n'eme. Kámoɗeketi sisani, ka nyɔngɔ nde, esa bui, neogea kema nde amɓɔngɛi.» 30 Ɓî Yéso ɗáɔyɔnga ɓó, ɓakpa ɓásii ɓáomɓeekea. Tóka ka kɔkɔɓɛ á ɗoni 31 Yéso áǒngoɗea Ɓayúda nde ɗáɓámɓeeki áǒgea: «Aoɓá na ɓoambi nyɔngɔ nɛmɔ, ɓonde ɓagoigi nɛmɔ ɗoni. 32 Mpɔ, ɓoúbande ɗoni na ɗoni ndɔ anotókisande ka kɔkɔɓɛ.» 33 Ɓáonsikisia: «Ɓesu, ɓende ɓato á k'ɛɓɔkɔti ndea Abalaámu. Nkpa kásobisimbɛ mɔnɔ tanda ka kɔkɔɓɛ ndeakɛ. Cɔ, ɔɔtɔka n'osóngoɗi gea, ɓetókande ka kɔkɔɓɛ ɓo?» 34 Yéso áǒsikisia ɓe: «Nenóngoɗi ɗoni gea, nkpa buakɛ mmbé aogea ɓojeɗe, ande nkɔɓɛ á ɓojeɗe. 35 Nkɔɓɛ nnaoika k'ékombo ndea mɔkɔta nɛkɛ esa bui. Miki á ɔɓɔkɔta aámbé aoika k'ékombo nɛkɛ esa bui. 36 Aoɓá Muna-Mokonga n'anótókisi ka kɔkɔɓɛ, ɓotókande ka kɔkɔɓɛ ɗoni. 37 Eya, neoúba gea, ɓonde ɓato á k'ɛɓɔkɔti ndea Abalaámu. Ɓo ndiu okaɓa mowa ani ka nyɔngɔ nde, ɓókóoɓeekea nyɔngɔ nɛmɔ. 38 Nɛɔyɔnga nyɔngɔ nde nɛtɔ́ɔni mɔtɛ á Abɛ. Ɓenu gǎkɛ, ɓoogea nnde abanu ɗánongoɗi.» 39 Ɓáonsikisia te: «Abalaámu ande tatasu.» Yéso áǒgea: «Atúoɓá na ɓonde ɓasuko á Abalaámu ɗoni, ámbé ɓɔtɔ́tɔtɔkisi ekuma nde ɗági. 40 Cɔ, kɛ̌kɛnde, nanga ɓî ɗénóngoɗi nyɔngɔ á ɗoni nde ɗɛ́ɔ́ki mɔtɛ á Mokonga, ɓo tɔ okaɓa mowa ani. Abalaámu ɗákági gǎkɛ ɓó. 41 Ɓenu, ɓo tɔ ɔbɛɗanaga ekuma ndea abanu.» Ɓâ gǎkɛ ongea: «Ɓéké ɓana nka-abɛ. Abasu a tɔ moci, Mokonga.» 42 Yéso áǒgeae: «Atúoɓá Mokonga n'ande Abanu, ámbé ɗóɓomokondi. Nga, ɗétóki mɔtɛ á Mokonga, néobika wani. Kébiki k'éme sisani, yɛ ndiu aámbé ɗámoteki. 43 Ka nyɔngɔ sina nde ɓókóoengekisa nyɔngɔ nde neonongoɗea? A tɔ ka nyɔngɔ nde, ɓɔ́kɔ́ɔtɔka ɔ́ka á nyɔngɔ nɛmɔ. 44 Ɓonde ɓana-nketi, ɓo phɔtɔ okaɓa tɔtɔkisa á mɔphɛ á abanu. Ande nto á kaiso kpanga ka nkpangeɔ, nnaomama ka nyɔngɔ nde ande á ɗoni nga, ɗoni nna suɓi akɛ. Mbenɔ nde aɔyɔnga mbɛa, nndɔ a tɔ ebigɔ nɛkɛ ka nyɔngɔ nde yɛ, ande nto á mbɛa n'ande phɔtɔ Aba-mbɛa. 45 Cɔ, eme ne gǎkɛ ɔyɔnga ɗoni, ka ɓondɔ unge ɓókóomoɓeekea. 46 Cɔ, ka ɓenu sina nde amɔtɔngande gea negi ɓojeɗe? Kaɓɛ nɛɔyɔnga ɗoni, nyɔngɔ sina nde ɓókóomoɓeekea? 47 Nkpa ndea Mokonga aɔɔ́ka ɛsɔ á Mokonga. Kaɓɛ na ɓɔ́kɔ́ɔɔ́ka, ande ka nyɔngɔ nde ɓókó ɓato á Mokonga.» Yéso na Abalaámu 48 Ɓayúda ɓáonsikisia Yéso gea: «Nna phɔ́tɔ ɗoni unge ɓeogea, onde Mosamalía n'ona ɓansombo?» 49 Yéso áǒsikisia: «Ké na ɓansombo. Ne ndiu onɗokomisa Abɛ. Cɔ, ɓenu, ɓókóomoɗokomisa. 50 Kéokaɓa ɓoombia nɛmɔ. A ndiu na nkpa moci mmbé aomokaɓea ú, na tenea ani nyɔngɔ. 51 Nenóngoɗi ɗoni, aoɓá nkpa n'aambi nyɔngɔ nɛmɔ, kákuwɛeka ye tanda.» 52 Mpɔ Ɓayúda ɓáongoɗea: «Kɛ̌kɛnde ɓeúbi ye tɔ gea ona ɓansombo. Abalaámu, na ɓaɔtu-nyɔngɔ ndea Mokonga, ɓáku. Oɓɛ gǎkɛ, ogi: ‹aoɓá nkpa n'aambi nyɔngɔ nɛmɔ, kákuwɛeka ye tanda.› 53 Ande gea te, onde ngbɛga kɔnyɛ́nya tatasu Abalaámu, mmbɔ aku ndɔ, na ɓaɔtu-nyɔngɔ ndea Mokonga phɔtɔ? Cɔ, oɓɛ onde ani?» 54 Yéso áǒsikisia: «Aoɓá na něɗokomisi sasani, nndɔ nna na kantíti. Abɛ, mmbɔ ɓogi te ande abanu, mmbɔ aámbé aomoɗokomisa. 55 Ɓókóomúba yɛ, eme aámbé ne ndiu omúba. Aoɓá na netógi kéomúba, ámbé neɓande nto á mbɛa ɓea ɓenu. Cɔ, neomúba, ne phɔtɔ oamba nyɔngɔ nɛkɛ. 56 Tatanu Abalaámu ɗátú na maseye ɓî ɗákanisi te, aɔnande esa nde nebikaeka. Ɗáɔni gǎkɛ, mpɔ áoɓá na maseye.» 57 Ɓayúda ɓáongoɗea: «Kójusimbɛ phɔ́ tanda ɓasaga nkama ɓɔku (50), aunge ogi te, ɗɔ́mɔni ka Abalaámu?» 58 Yéso áǒsikisia: «Nenóngoɗi ɗoni, Mosá á ɓɔkɔtɛana á Abalaámu, EME NEƁEI.» 59 Mpɔ, ɓáɔbɔnya ɛtɛ ka makeaga akɛ. Yéso â gǎkɛ ɔ̌sɔmɛana, áojuana k'éndu á Mokonga. |
© 2021, Wycliffe Bible Translators, Inc.
Wycliffe Bible Translators, Inc.