Yoáni 7 - Ɔngana á Kɛ̌kɛ

Ɓana-amakɛ na Yéso ɓáyé ɓeekea akɛ

¹ Mbusa á wa, Yéso áɔtɔmba Galiláya. Ɗákákondi gǎkɛ tɔmba á Yudɛ́a ka nyɔngɔ nde, Ɓayúda ɗáɓáokáɓa mowa akɛ.

² Ɓî jaí ndea Ɓayúda á ɛma, ɗátú ye bíbí,

³ ɓana-amakɛ na Yéso, ɓâ gǎkɛ ongoɗea: «Toá wani, ógɛ na Yudɛ́a ka gea te, ɓagoigi nɛkɔ ɓáɔnɛ phɔtɔ ekuma nde ɔɔtɔtɔkisa.

⁴ Nga, aoɓá nkpa n'aokaɓa úbúkana, yɛ sasakɛ nnaɔtɔka n'agi kema ka ɓɔsɔmɛa. Aoɓá na ɔɔtɔtɔkisa ekuma ɓíndɔ, cɔ, bɛɗanaga pɛ ú ka gea, ɓakpa ɓɔbu ɓákɔɔnɛ base.»

⁵ Nga, ɓana-amakɛ phɔtɔ ɗáɓákátúomɓeekea.

⁶ Yéso áǒsikisia gea: «Mbenɔ nɛmɔ ánjá kájumbɛ. Cɔ, ka ɓenu, mbenɔ bui a ndiu tɔ ánjá.

⁷ Ɓato á ka mokonda ɓánáɔtɔka na ɓánokangei. Ɓámokangei ndiu eme nga, nɛɔtɔmiaga gea, ekuma nɛɓɔ aájeɗe.

⁸ Ɓenu, gǎni ka jaí. Eme gǎkɛ kégɛku ka jaí ndɔ nga, mbenɔ nɛmɔ kájumbɛ.»

⁹ Mbusa á yɔnga akɛ ɓó, áojiga nɛkɛ na Galiláya.

Yéso a ka jaí á ɛma

¹⁰ Ɓî ɓana-amakɛ ɓáge ye ka jaí, Yéso â phɔtɔ oga. Ɗáge ka ɓɔsɔmɛa, kángá ɛ́ɔnisa.

¹¹ Ɓakɔta á Ɓayúda ɗáɓákpangi gǎkɛ kaɓa akɛ ka jaí ndɔ, ɓáoúsianaga: «Nkpa ndɔ ama koni?»

¹² Ka usɛsɛ á ɓakpa, ɓakpa ɗáɓáɔngɔngɔnaga ka phɔa akɛ phɛɛ. Ɓuangbo ɗáɓáogea: «Yɛ, ande nkpa anjánjá.» Ɓuangbo ɓâ gǎkɛ ogea: «Ndǎkɛ! A ndiu ǒdemaga ɓakpa.»

¹³ Cɔ, kaɓɛ gǎkɛ na nkpa nde ɗáɔyɔnga base ka phɔa akɛ nga, ɗáɓáǒɓanga ɓakɔta ndea Ɓayúda.

¹⁴ Na ɓá phɔ́tɔ suɓi á jaí, Yéso áoga k'éndu á Mokonga ka goisaga.

¹⁵ Mpɔ, ɓakɔta á Ɓayúda ɓáoyayama, ɓáogea: «Nkpa nde aúbi tanga ɓo, na kágoigi?»

¹⁶ Yéso áǒsikisia: «Goisaga nde néogoisaga kátóki mɔtɛ-amɔ, atóki ndiu ka mmbé amoteki.

¹⁷ Aoɓá nkpa n'akondi tɔtɔkisa á mɔphɛ ndea Mokonga, aúbande ámbé goisaga nde néogoisaga atóki ka Mokonga, kaɓɛ k'ophangɔ nɛmɔ sasani.

¹⁸ Mmbé aɔyɔnga nyɔngɔ nɛkɛ sasakɛ, a tɔ okaɓa ɓoombia nɛkɛ sasakɛ. Mmbé a ndiu okaɓa ɓoombia á mmbé anteki, ande nto á ɗoni. Nna na ɓojeɗe suɓi akɛ.

¹⁹ Cɔ, Mósa ɗákánophi phɔ́ ɛɔphi? Nna gǎkɛ na ka ɓenu ímbé aoamba ɛɔphi kau. Cɔ, ɓookaɓa mowa ani ka ɓo?»

²⁰ Usɛsɛ á ɓakpa ɓáonsikisia te: «Ona ɓansombo! Ani mmbé aokaɓa mowa akɔ?»

²¹ Yéso â gǎkɛ ǒngoɗea te: «Ɗégi tɔ ketangaɔ moci, ɓenu ɓɔbu ɓôyayama.

²² Mósa ɗánososi gusa á ɓaniki ɓǒko ganja. Nna gǎkɛ Mósa aámbé ɗábisi ɛɔphi ndɔ. Ɗátóki ndiu ka ɓatatanu. Ɓenu, ɓo phɔtɔ ogusa ganja esa á saɓáto.

²³ Cɔ, aoɓá na ɓoongusa miki moci ganja esa á saɓáto kángá á ɓuna ɛɔphi ndea Mósa, ekende ɓomoɓɛɛí ka nyɔngɔ á amisa á nkpa k'ésa á saɓáto?

²⁴ Ɓókótenɛmbɛ nyɔngɔ k'índe ɓɔɔna ka nsɛngɛ, tenani ndiu nyɔngɔ ka koɗonǐí.»

Yéso ande Kiísito?

²⁵ Ɓato á ka Yɛusalɛ́ma ɓuangbo ɓáogea: «Nna phɔ́ nkpa nde aámbé ɓáokaɓa mowa akɛ?

²⁶ Ɔ́nani! A tɔ ɔyɔnga base mosá á ɓakpa, ɓáná gǎkɛ ongoɗea ka nyɔngɔ! Ande gea, ɓakɔta nɛsu ɓáengekisi ánjá gea, ande Kiísito?

²⁷ Cɔ, nkpa nde, ɓeoúba ɔma nde atóki. Ka bika á Kiísito, nna na nkpa nde aúbaeka gǎkɛ ɔma nde atóki.»

²⁸ Mbenɔ nde Yéso ɗáogoisaga k'éndu á Mokonga, áɔyɔnga akpɛ gea: «Eya, ɓenu ɓoogea te, ɓoomoúba na úba á ɔma nde netóki. Kébiki ka kɔkɔta nɛmɔ sasani. Mmbé amoteki, ande nto á ɗoni. Ɓókó gǎkɛ omúba yɛ.

²⁹ Eme, neomúba nga, netóki mɔtɛ-akɛ na yɛ aámbé amoteki.»

³⁰ Mpɔ, ɓáokaɓa dunga akɛ, nna gǎkɛ na nkpa nde ɗándungi nga, mbenɔ nɛkɛ ɗákájumbɛ.

³¹ Suɓi á usɛsɛ ndɔ, ɓakpa ɓásii ɓáomɓeekea. Ɓáogea: «Mbenɔ nde Kiísito abikande, atɔtɔkisande mphangiɔ kɔnyɛ́nya nkpa ndee?»

Ɓaphaisáyɔ ɓáokaɓa dungisa á Yéso

³² Ɓaphaisáyɔ ɓáɔɔ́ka usɛsɛ á ɓakpa na ɓáɔngɔngɔnaga ka phɔa á Yéso. Ɓagbɛga á ɓatoɓeigi-phɛ́a na Ɓaphaisáyɔ ɓâ gǎkɛ ǒteka ɓaɓondigi ka dunga akɛ.

³³ Yéso áogea: «Ne goto na ɓenu ka mbenɔ ábɔa, mpɔ, nesikianagande mɔtɛ á mmbé ɗámoteki.

³⁴ Ɓomokaɓande, ɓɔ́kɔ́mɔɔnɛku gǎkɛ. Nga, ɓɔ́kɔ́ɔtɔka na ɓoge kuɓî neikande.»

³⁵ Ɓayúda ɓâ gǎkɛ ɔyɔngaga sɔsɔɓɛ aɓɔ te: «Nkpa nde agande ɔma sina, ka gea ɓɛ́kɛmɔnɛ? Aoga mɔtɛ á ɓadasu íɓunde ɓáphanjekani ka nji á Ɓagiíki gea, áégoisɛgɛ Ɓagiíki?

³⁶ Kantíti á nyɔngɔ nde ayɔngi a ɓo? ‹Ɓomokaɓande, ɓɔ́kɔ́mɔɔnɛku gǎkɛ. Nga, ɓɔ́kɔ́ɔtɔka na ɓoge kuɓî neikande.›»

Yéso ande iɓo á endisa á mɛyɔ

³⁷ Esa á sungiaga á jaí ndɔ, esa á kau ɗátú esa ángbó phɛɛ. Esa ndɔ, Yéso áomá, áɔyɔnga n'ɛsɔ akpɛ gea: «Aoɓá nkpa n'aku n'ɛnyɔta, ábikɛ mɔtɛ-amɔ, ánoɛ iɓo.

³⁸ Mmbé amoɓeeki, iɓo á endisa ayokande ka měma akɛ, ɓíndɔ Ɓuku á Mokonga ayɔngi.»

³⁹ Yéso ɗáɔyɔnga ka phɔa á Měma á Mokonga, nnde ɓunde ɓámɓeekeande ɓátɔande. Mbenɔ ndɔ, Měma á Mokonga ɗákájumbɛ ka nyɔngɔ nde, Mokonga ɗákánɗokomisimbɛ Yéso ka ɓoombia.

Ɓakpa ɓákatanigi

⁴⁰ Mbusa á ɔ́ka aɓɔ nyɔngɔ ndɔ, ɓakpa ɓunɛngbo suɓi á usɛsɛ á ɓakpa ɓáogea: «Nkpa nde ande Mɔtu-nyɔngɔ ndea Mokonga ɗoni.»

⁴¹ Ɓakpa ɓuangbo ɓáogea: «Yɛ, ande Kiísito.» Ɓunɛngbo ɓâ ndiu ɔyɔnga te: «Kiísito aɔtɔka n'atóki na Galiláya?

⁴² Ɓáɗundu suɓi á Ɓuku á Mokonga gea, Kiísito aɓáeka mosuko á moamɛ Daúdi. Atókande na Bɛtɛlɛɛ́mu, ka nji ndɔ Daúdi ɗáɓɔkɔtɛani kau.»

⁴³ Kaɓondɔ, usɛsɛ á ɓakpa ndɔ â gǎkɛ okatanaga, ka nyɔngɔ á Yéso.

⁴⁴ Ɓakpa ɓunɛngbo sɔsɔɓɛ aɓɔ ɓáokaɓa dunga akɛ, kaɓɛ gǎkɛ na nkpa nde andungi.

Ɓaamɛ ndea Ɓayúda ɓákámɓeeki Yéso

⁴⁵ Ɓaɓondigi ɓáosikianaga kuɓî ɓagbɛga á ɓatoɓeigi-phɛ́a na Ɓaphaisáyɔ ɓá ɓei. Ɓɔ, ɓáǒúsia ɓaɓondigi gea: «Ɓókómbiki na Yéso ka ɓo?»

⁴⁶ Ɓaɓondigi ndɔ ɓáǒsikisia: «Tanda phɔ́! Ɓékémɔkimbɛ mɔnɔ nkpa n'aɔyɔnga ɓea mmbɔ.»

⁴⁷ Mpɔ, Ɓaphaisáyɔ ɓáǒgea: «Ɓenu ɓǒdemisi phɔtɔ na yɛ ɓo?

⁴⁸ Ɓɔɔ́kimbɛmɔnɔ, ka ɓakɔta nɛsu, kaɓɛ ka Ɓaphaisáyɔ, n'amɓeeki?

⁴⁹ Ɓato á usɛsɛ ndɔ ɓánáoúba ɛɔphi ndea Mósa. Ɓánde ɓakpa nde ɓáɛsɛmɛigi.»

⁵⁰ Mophaisáyɔ Nikɔdɛ́mu, mmbé ɗángɛndɛi Yéso mosá, ɗátú wa. Áǒngoɗea te:

⁵¹ «Ɛɔphi nɛsu aɓeeki tena á nyɔngɔ á nkpa akpɛ, yɛ na káyɔngimbɛ na ɓékéengekisimbɛ phɔtɔ kema nde agi?»

⁵² Ɓáosikisia te: «Onde phɔtɔ nto á ka Galiláya? Cɔca phɔ́ Ɓuku á Mokonga, ɔɔnande gea, ka ɓaɔtu-nyɔngɔ ndea Mokonga moci nnaɔtɔka n'atóki na Galiláya.» [

⁵³ Mbusa, nkpa buakɛ áoja k'éndu nɛkɛ.