Yoáni 6 - Ɔngana á Kɛ̌kɛ

Yéso aǒisa ɓǒko ɛlɛphu ɓɔku (5.000)

¹ Mbusa índɔ, Yéso áokáia etǔ á Galiláya, nnde ɓá phɔtɔ ɔɔphana Tibɛlía.

² Usɛsɛ ángbó á ɓakpa ɓáomɓea nga, ɗáɓáɔni mphangiɔ á ketangaɔ nde ɗáɔtɔtɔkisa ka amisa á ɓato á esambɔ.

³ Yéso na ɓagoigi nɛkɛ, ɓáoɓamba mamba, ɓáoika kó.

⁴ Maseye á Pasáka ndea Ɓayúda ɗátú bíbí.

⁵ Yéso áomesia iso, áɔɔna usɛsɛ á ɓakpa na ɓáombikia. Mpɔ, áongea Philípɔ: «Cɔ, ɓesombande eea ka isa á ɓakpa nde súwani?»

⁶ Ɗáyɔngi ɓó ka tomba akɛ nga, ɗáoúba kema nde ageande.

⁷ Philípɔ â gǎkɛ onsikisia: «Nanga ɓéɓá na imɔna mia iɓɛ (200), nnaɔtɔka n'asombi mokati nde nkpa na nkpa atɔande miki á gbútuka í.»

⁸ Ka ɓagoigi nɛkɛ moci, ina akɛ Andeé, muna-amakɛ na Simɔ́ni Pɛ́tɛɛ, áongoɗea Yéso gea:

⁹ «Moganda moci a wani. Ana mokati ɓɔku na ɓasú ɓaɓɛ. Cɔ, nndɔ a gǎkɛ kema sina ka ɓakpa ɓásii ɓende?»

¹⁰ Yéso áogea: «Cɔ, óikisani ka oɗo.» (Ɔma ndɔ ɗátú phɔtɔ na manganga ásii.) Mpɔ ɓáoika, ɓǒko ɗáɓátú ɓea ɓakpa ɛlɛphu ɓɔku (5.000).

¹¹ Mpɔ, Yéso áoɓoa mokati ndɔ, áonsega Mokonga k'ɛ́mɛmi, áogaba ú ka ɓakpa nde ɗáɓátú wa. Â phɔtɔ ogea ɓó na ɓasú, nkpa na nkpa áoea ɓíndɔ akondi.

¹² Ɓî ɓákuti ye, Yéso áǒngoɗea ɓagoigi nɛkɛ: «Kɔngɔani due ka gea, kau kaújukanɛmbɛ.»

¹³ Ɓáɔkɔngɔa due á mokati ɓɔku nde ɓáí, ɓáotúmisa jɔ nkama na iɓɛ (12).

¹⁴ Ɓî ɓakpa ɓáɔni ye Yéso n'atɔtɔkisi ketangaɔ ndɔ, ɓáogea: «Ɗoni, mmbé ande Mɔtu-nyɔngɔ ndea Mokonga mmbé ɗákeni bika ka mokonda.»

¹⁵ Ɓî Yéso ɗáúbi gea, ɓakpa ɗáɓáogea ɓábikɛ mbɛɗɛ ka bisa akɛ moamɛ ka ɓukpɛkpɛ nɛɓɔ, kaɓondɔ, â goto oɓamba mamba yɛ sasakɛ.

Yéso aotamba gǔ á iɓo

¹⁶ Cɔ, ɗáɓi ye ɔgɔgɔ, ɓagoigi nɛkɛ ɓáodida na motii á etǔ.

¹⁷ Kó, ɓáokambea ka koko, ka gǎ nci á na Kapɛɛnaúmu. Esa ɗágeoípha Yéso na k'édondimbɛ.

¹⁸ Kɛtɛmbɔ áoɗengisa etǔ phɛɛ nga, sumbu ɗátú akpɛ.

¹⁹ Mbusa á tamba á ɓɔ ka koko ɓea kilɔmɛtɛɛ ɓɔku, kaɓɛ ngianjaga (6), ɓáɔmɔna Yéso n'aotamba gǔ á iɓo ka bîmisia á koko. Mpɔ, ɓáoɓá na kɔɓɔɓɔkɔ.

²⁰ Yéso â gǎkɛ ǒngoɗea: «Ɓókóɓangɛmbɛ, eme aámbɔ!»

²¹ Ɓî ɗáɓáokonda kambisa akɛ ka koko, kɛ̌kɛndɔ tɔ, koko â gǎkɛ odunduia ɔma nde ɗáɓágɛndɛi.

Usɛsɛ á ɓakpa ɓáonkaɓa Yéso

²² Mama í, usɛsɛ á ɓakpa nde ɗáɓájigi kubi étǔ, ɓáoengekisa gea, koko ɗátú tɔ wa moci. Ɗáɓáúbi gǎkɛ gea, Yéso ɗákákǎmbi na ɓagoigi nɛkɛ suɓi í. Ɓagoigi sasaɓɔ tɔndɔ ɓáunge ɗáɓáge.

²³ Mpɔ, koko nengbo ásii nnde atóki ka ntanga-nji á Tibɛlía áokiɗia bíbí á ɔma nde ɗáɓáigi mokati mbusa á Mɔkɔta sega á Mokonga.

²⁴ Mbenɔ nde usɛsɛ á ɓakpa ndɔ ɗáɓáɔni gea, Yéso kaɓɛ ɓagoigi nɛkɛ, ɗáɓákátú wa, ɓáokambea ka koko ndɔ, ɓáoga onkaɓa Yéso na Kapɛɛnaúmu.

Yéso ande mokati á endisa

²⁵ Ɓî ɓándondi ye Yéso kubi á etǔ, ɓáomúsia: «Ngoisigi, mbenɔ sina nde okiɗimá koni?»

²⁶ Yéso áǒsikisia gea: «Eya, nenóngoɗi ɗoni gea, ɓoomokaɓa nga, ɗóɓoí mokati, ɓóokúta, nna ndiu gea, ɓoengekisi kantíti á mphangiɔ á ketangaɔ nde nɛtɔtɔkisi.

²⁷ Ɓɔ́kɔbɛɗanɛgɛmbɛ ka nyɔngɔ á eea nde aoújukana, áɓɛ ndiu ka nyɔngɔ á eea nde aoendisa mɛyɔ. Eea ndɔ, eme Muna-Nkpa, aámbé nenóphande nga, Abɛ Mokonga amopi kɔkɔta í.»

²⁸ Mpɔ, ɓáomúsia: «Ka bɛɗanaga ekuma ndea Mokonga, ɓegeande ɓo?»

²⁹ Yéso áǒsikisia te: «Ekuma nde Mokonga akondi ka ɓenu, ande ɓeekea á mmbé anteki.»

³⁰ Ɓâ gǎkɛ ongea: «Cɔ, mphangiɔ á ketangaɔ sina nde ɔtɔtɔkisande ka gea te, ɓɛ́ɔnɛ ú na ɓeekea akɔ? Kema sina nde ɔtɔtɔkisande?

³¹ Ɓatatasu ɗáɓáí mána ka nkanda, ɓíndɔ ɓáɗundu suɓi á Ɓuku á Mokonga: Ɗéɓophi mokati, n'atóki na koba ka ea í.»

³² Mpɔ Yéso áǒgea: «Nenóngoɗi ɗoni gea, nna Mósa aámbé ɗánophi mokati n'atóki na koba. Abɛ ndiu aámbé aonopha mokati á ɗoni, nnde á na koba.

³³ Nga, mokati ndea Mokonga aunge aotóka na koba, áǒɓopha ɓato á ka mokonda enda.»

³⁴ Ɓâ gǎkɛ ongoɗea: «Mɔkɔta, ósopha mokati ndɔ esa bubui.»

³⁵ Mpɔ, Yéso áɔ̌tɔmia ɓe: «Nende Mokati á endisa. Mmbé amobikíí, kákuwɛku tanda na nja na mmbé amoɓeeki, kákuwɛku tanda n'ɛnyɔta.

³⁶ Ɗénóngoɗi gǎkɛ nndɔ: Nanga ɓɔmɔɔni ye, ɓókóomoɓeekea.

³⁷ Ɓakpa ɓɔbu ɓunde Abɛ amopi, ɓámobikiande. Mmbé amobikíí kémɓeɛgɛku tanda.

³⁸ Nga, ɓî nedidi ka toka na koba, nna ka tɔtɔkisa á mɔphɛ nɛmɔ, a ndiu ka tɔtɔkisa á mɔphɛ á mmbé ɗámoteki.

³⁹ Mɔphɛ á mmbé ɗámoteki ande gea te, kémɓungisɛmbɛ mɔnɔ ka ɓunde ɗámopi. Nénjujukisɛ ndiu ka kukuwa k'ésa á sungiaga á mokonda.

⁴⁰ Cɔ, mɔphɛ á Abɛ a ɓe: Mmbé aɔmɔna Muna-Mokonga na ɓeekea akɛ, áɓɛ na enda á mɛyɔ na nenjujukisande k'ésa á sungiaga á mokonda.»

⁴¹ Cɔ, Ɓayúda ɓáɔngɔngɔnɛaga Yéso ka nyɔngɔ nde ɗági: «Nende mokati nde atóki na koba.»

⁴² Ɓáɔyɔnga gea: «Nga Yéso aámbé, muna-Yɔsɛ́phu na Malía. Cɔ, kɛ̌kɛnde agi, atóki na koba ka ɓo?»

⁴³ Yéso áǒsikisia te: «Ɓɔ́kɔngɔngɔnɛgɛmbɛ sɔsɔɓɛ anu.

⁴⁴ Nna na nkpa nde aɔtɔka n'abiki mɔtɛ-amɔ, Abɛ mmbé amoteki na kámɔphani. Na eme, nenjujukisaeka ka kukuwa esa á sungiaga á mokonda.

⁴⁵ Cɔ, ɓaɔtu-nyɔngɔ ndea Mokonga ɗáɓáɗundu ɓe: ‹Mokonga aámbé aegoisagande ɓakpa ɓɔbu.› Nkpa buakɛ mmbé aɔ́ki nyɔngɔ ndea Abɛ na ɓɔphɛi nɛkɛ, aámbé abikande mɔtɛ-amɔ.

⁴⁶ Ka ɓakpa kámɔnimbɛ mɔnɔ Abɛ, na nna tɔndɔ mmbé atóki mɔtɛ á Mokonga, yɛ tɔ aámbé amɔni Abɛ.

⁴⁷ Eya, nenóngoɗi ɗoni gea, mmbé aɓeeki, ana enda á mɛyɔ.

⁴⁸ Eme nende mokati á endisa.

⁴⁹ Ɓatatanu ɗáɓáí mána ka nkanda, ɓâ gǎkɛ okuwa.

⁵⁰ Cɔ, mokati nde atóki na koba, nkpa nde aoea ú, kákuwɛku.

⁵¹ Nende mokati á endisa, nnde atóki na koba. Aoɓá nkpa n'aí ka mokati ndɔ, aendande mɛyɔ. Mokati ndɔ, ande kesuku ani, nnde něgabeande ɓato á ka mokonda ka gea, ɓáɓɛ na enda.»

⁵² Kaɓondɔ, Ɓayúda ɓáokpanga púa ngǔngu aɓɔ phɛɛ. Ɓáoúsianaga: «Mogaa nde aɔtɔka opha asu kesuku akɛ gea, ɓéeɛ ka ɓo?»

⁵³ Yéso áǒgea: «Nenóngoɗi ɗoni gea, aoɓá na ɓókóí kesuku á Muna-Nkpa na noa magia akɛ, ɓókóɓɛku na enda.

⁵⁴ Mmbé aoea kesuku ani na noa á magia ani, ana enda á mɛyɔ, na nenjujukisande ka kukuwa esa á sungiaga á mokonda.

⁵⁵ Nga, kesuku ani ande eea á ɗoni, na magia ani ande kema á onoa á ɗoni.

⁵⁶ Mmbé aoea kesuku ani na noa á magia ani, eme neiki suɓi akɛ na yɛ aiki suɓi ani.

⁵⁷ Abɛ mmbé amoteki ana enda, na enda ani atóki ka yɛ. A phɔtɔ ɓó ka mmbé aoea kesuku ani, aɓande na enda ka nyɔngɔ ani.

⁵⁸ Cɔ, ɔ́nani mokati nde ɗátóki na koba. Nna ɓíndɔ ɓatatanu ɗáɓáí ɓáokuwa. Mmbé a gǎkɛ oea mokati nde, aendande mɛyɔ.»

⁵⁹ Ɗáyɔngi nndɔ ɓî ɗátú ogoisaga k'éndu á madondanɔ ndea Ɓayúda ka nyɔngɔ á Mokonga ka Kapɛɛnaúmu.

Nyɔngɔ nde aoendisa mɛyɔ

⁶⁰ Mbusa á ɔ́ka á nyɔngɔ ndɔ, ka ɓagoigi nɛkɛ ɓásii ɓáogea: «Yɔnga nde aákpɛ. Ani mmbé aɔtɔka n'aɓeeki ú?»

⁶¹ Ɓî Yéso aúbi ye gea, ɓagoigi nɛkɛ ɓáɔngɔngɔnɛaga ka nyɔngɔ ndɔ, áǒgea: «Nyɔngɔ ndɔ anóphi ngǎka?

⁶² Cɔ, aɓande ɓo aoɓá na ɓɔɔmɔɔna eme, Muna-Nkpa na neotáia ɔma nde ɗétú mosá?

⁶³ Měma á kanga ɓojeɗe aunge aoendisa. Nga, nkpa sasakɛ nnaɔtɔka ka kema. Nyɔngɔ nde ɗénóngoɗi, ande á Měma na anóphande enda.

⁶⁴ Nyɔngɔ ndɔ gǎkɛ ungɔ ɓunɛngbo sɔsɔɓɛ anu ɓánáoɓeekea.» Nga, Yéso ɗáeɓúbi kpanga á kala ɓunde ɗáɓákáɓeeki, na mmbé antɔngande.

⁶⁵ Mpɔ, Yéso â goto ǒgea: «Ka nyɔngɔ índɔ unge ɗénóngoɗi gea, nkpa nnaɔtɔka n'amobikíí aoɓá Abɛ n'akámophi aphe.»

⁶⁶ Kpanga á mbenɔ ndɔ, ka ɓagoigi nɛkɛ ɓásii ɓáǒjujia na ɗeketa á tamba kimoci na yɛ.

⁶⁷ Mpɔ, Yéso áǒɓúsia ɓagoigi nkama na ɓaɓɛ (12): «Ɓenu phɔtɔ, ɓookonda ɓógɛ?»

⁶⁸ Simɔ́ni Pɛ́tɛɛ â gǎkɛ onsikisia: «Cɔ, Mɔkɔta, ɓegande mɔtɛ á ani? Nga, ona nyɔngɔ á endisa á mɛyɔ.

⁶⁹ Ɓeɓeeki ú na úba í gea, onde Nto á kanga ɓojeɗe ndea Mokonga.»

⁷⁰ Yéso áǒsikisia: «Ɗékénɔsɔmbu phɔ́ ɓenu Nkama na ɓaɓɛ (12), nanga moci sɔsɔɓɛ anu ande nketi?»

⁷¹ Ɗáɔyɔnga ka phɔa á Yúda muna Simɔ́ni Isikaliɔ́ta. Nanga ɗátú sɔsɔɓɛ á ɓagoigi nkama na ɓaɓɛ (12), yɛ aámbé antɔngaeka.