Yoáni 3 - Ɔngana á Kɛ̌kɛ

Yéso aoaba na Nikɔdɛ́mu

¹ Ɗátú na nkpa moci sɔsɔɓɛ á Ɓaphaisáyɔ ina akɛ Nikɔdɛ́mu. Ɗátú ka ɓakɔta ndea Ɓayúda.

² Cɔ, yɛ áombikia Yéso kǐpha áongoɗea: «Ngoisigi, ɓeoúba gea, Mokonga aámbé ɗáoteki k'aphe á goisaga asu ka nyɔngɔ nde, nkpa nnaɔtɔka n'atɔtɔkisi ketangaɔ ɓíndɔ ɔɔtɔtɔkisa, kaɓɛ Mokonga na nna kimoci na yɛ.»

³ Yéso áonsikisia: «Nekongoɗi ɗoni gea, nkpa nde káɓɔkɔtɛani mɔngɔ á ko iɓɛ, káɔnɛku koɓoamɛ ndea Mokonga.»

⁴ Nikɔdɛ́mu â gǎkɛ omúsia: «Ngbɛga aɓɔkɔtɛanande mɔngɔ á ko iɓɛ ɓo? Aɔtɔka n'angí goto ka sɔphɔ á amakɛ gea, áɓɔkɔtɛanɛ?»

⁵ Yéso áonsikisia: «Nekongoɗi ɗoni gea, nkpa nde káɓɔkɔtɛani ka iɓo na ka ɓukpɛkpɛ á Měma, kángiɛku ka koɓoamɛ ndea Mokonga.

⁶ Ɓaɓɔkɔti asu á kokpa, ɓáɔɓɔkɔta nyama asu, Měma á Mokonga, aɔɓɔkɔta měma suɓi asu.

⁷ Cɔ, koyayamɛmbɛ ɓî nekongoɗi, akeni ɓenu ɓɔbu ɓɔ́ɓɔkɔtɛanɛ mɔngɔ á ko iɓɛ.

⁸ Nga, sumbu aosinda ɓî akondi, ɔ̂ɔ́ka ndǔ í. Kó gǎkɛ oúba ɔma nde atóki na ɔma nde aoga. A phɔtɔ ɓó ka nkpa buakɛ mmbé aɓɔkɔtɛani ka ɓukpɛkpɛ á Měma á Mokonga.»

⁹ Nikɔdɛ́mu â gǎkɛ omúsia: «Nyɔngɔ ndɔ aɔtɔka n'atɔtɔkɛani ɓo?»

¹⁰ Yéso áonsikisia: «Oɓɛ, onde ngoisigi angbóngbó ka Isilaɛ́li. Cɔ, kó gǎkɛ oúba nyɔngɔ nde?»

¹¹ «Nekongoɗi ɗoni gea, ɓe tɔ ɔtɔmiaga nnde ɓeoúba, ɓéoɗigimisa nnde ɗɛ́ɓɛɔni. Ɓókó gǎkɛ oɓeekea ú.

¹² Aoɓá na ɓókóomoɓeekea mbenɔ nde nɛɔnɔtɔmiaga nyɔngɔ á ka mokonda, cɔ, ɓomoɓeekeande ɓo aoɓá na nɛɔnɔtɔmiaga nyɔngɔ á na koba?

¹³ Nga nna na nkpa nde atáimbɛ mɔnɔ na koba, tɔndɔ eme Muna-Nkpa, mmbé ɗédidi ka toka na koba.

¹⁴ A tɔ ɓíndɔ Mósa ɗáɗáphisi iii á njɔka nde ɓáconji na ngɔa gǔ á gbútuka á me ka nkanda, a phɔtɔ ɓó unge akeni ɓámoɗáphisɛ eme Muna-Nkpa,

¹⁵ ka gea, nkpa buakɛ mmbé amoɓeeki, áɓɛ na enda á mɛyɔ.

¹⁶ Nga, Mokonga ɗékondi ɓato á ka mokonda phɛɛ. Kaɓondɔ, ɗěɓophi ngɔmu nɛkɛ gea, nkpa buakɛ mmbé amɓeeki, kákuwɛku, áɓɛ ndiu na enda á mɛyɔ.

¹⁷ Mokonga ɗákánteki gǎkɛ Anakɛ ka gea te, átenɛ nyɔngɔ á ɓato á ka mokonda akpɛ. A ndiu ka gea, yɛ, éamisɛ ɓato á ka mokonda.

¹⁸ Mmbé amɓeeki Anakɛ, Mokonga kátenɛku nyɔngɔ nɛkɛ akpɛ. Cɔ, mmbé kámɓeeki gǎkɛ, Mokonga ateni ye tɔ nyɔngɔ nɛkɛ akpɛ. Nga, yɛ káɓeeki ina á ngɔmu ndea Mokonga.

¹⁹ Cina á tena á nyɔngɔ nɛkɛ akpɛ a ɓe: owanga ndea Mokonga abiki ka mokonda. Ɓakpa ɓáyé gǎkɛ owanga ndɔɔ, ɓâ ndiu okonda kaiphiɔ. Nga, tambea aɓɔ aájeɗe.

²⁰ Cɔ, nkpa buakɛ mmbé aogea ájeɗe, akangei owanga, nna phɔtɔ okonda gǎ kuɓî owanga aɔ, ka gea, tambea akɛ ájeɗe áúbikanɛ base.

²¹ Mmbé a ndiu otambea ánjá ka ɓeá á koɗoni ndea Mokonga, aoga kuɓî owanga aɔ ka gea te, áúbikanɛ base, atambei ɓíndɔ Mokonga akondi.»

Yoáni na Yéso

²² Mbusa índɔ, Yéso na ɓagoigi nɛkɛ ɓáoga na Yudɛ́a. Áoika na ɓɔ kó ka mbenɔ ábɔa, yɛ, n'aoɓatisa.

²³ Yoáni-Mɓatisi ɗá phɔtɔ oɓatisa ka nji á Ainɔ́ni, bíbí na Saími nga, iɓo ásii ɗátú kó. Ɓakpa ɗáɓátúombikia, yɛ áǒɓatisa.

²⁴ Nga, ɗáɓákámakimbɛ phɔ́ Yoáni ka mekakɔ.

²⁵ Ka matú ndɔ, ɓagoigi nɛkɛ ɗáɓáopúa na Moyúda moci ka nyɔngɔ á moangɔ á tokisa á ɓojeɗe.

²⁶ Kaɓondɔ, ɓagoigi ndɔ ɓáɔngɛndɛa Yoáni, ɓáongoɗea te: «Ngoisigi, mmbɔ ɗátú n'oɓɛ kubi á Yɔɔdáni, mmbɔ ɗɔ́ɔtɔmiaga nyɔngɔ akɛ, a ye tɔ oɓatisa. Ɓakpa ɓɔbu ɓámɓǐ.»

²⁷ Mpɔ, Yoáni áǒsikisia gea te: «Nkpa nnaɔtɔka n'atɔi kema kaɓɛ Mokonga n'akamophi.

²⁸ Ɓenu sasanu, ɓɔɔ́kima ɓî nɛyɔngima gea, eme, ké Kiísito. Ne ndiu mmbé Mokonga anteki mosá akɛ.

²⁹ Munya-mpakai, aámbé ande munya nke. Dakɛ na mǒko gǎkɛ a tɔ bíbí akɛ, áotúma na maseye ɓî aɔɔ́ka ɛsɔ á mǒko ndɔɔ. Kaɓondɔ, netúmi na maseye phɛɛ.

³⁰ Cɔ, akeni ɓoombia nɛkɛ átáiɛ, nɛmɔ ádidɛ.»

³¹ Mmbé atóki na koba, a gǔ á ɓakpa ɓɔbu. Mmbé a gǎkɛ ka mokonda, ana ebigɔ á ka mokonda. Aɔyɔnga ɓea ɓato á ka mokonda. Mmbé atóki na koba a gǎkɛ gǔ á ɓakpa ɓɔbu.

³² Aoɗigimisa nyɔngɔ nde aɔni na ɔ́ka í. Nna ndiu na nkpa nde aomɓeekea.

³³ Mmbé aɓeeki nyɔngɔ nde aɗigimisi, aɓeeki phɔtɔ gea, Mokonga ande nto á ɗoni.

³⁴ Mmbé Mokonga anteki a tɔ ɔyɔnga nyɔngɔ á Mokonga. Nga, yɛ antúmisi na Měma akɛ.

³⁵ Eya, Mokonga ankondi Anakɛ, áobisa kema bui ka njaga akɛ.

³⁶ Cɔ, mmbé amɓeeki Anakɛ, a ye tɔ na enda á mɛyɔ. Mmbé an'yé, káɓɛku na enda ndɔ, Mokonga a gǎkɛ n'esúia gǔ akɛ.