Yoáni 21 - Ɔngana á Kɛ̌kɛ

Yéso aɛsɛnɛkɛi ɓagoigi nɛkɛ ngianjaga iɓɛ (7)

¹ Mbusa índɔ, Yéso â goto ɔ̌sɛnɛkɛa ɓagoigi nɛkɛ ka mpɛphɛ á etǔ Tiɓɛlía. Cɔ, ɗɛ̌sɛnɛkɛi ɓe:

² Simɔ́ni-Pɛ́tɛɛ, Tɔmá mmbé ɗáɓáɔmɔphana Mphase, Natanaɛ́li nto á ka Kána á ka Galiláya, ɓana Jɛbɛdáyɔ na ɓagoigi ndea Yéso ɓuangbo ɓaɓɛ, ɗáɓátú kimoci.

³ Simɔ́ni-Pɛ́tɛɛ áǒngoɗea: «Nege k'aphe á ɛɔpha.» Ɓáonsikisia gea: «Ɓesu ɓege phɔtɔ n'oɓɛ.» Ɓáojuana, ɓáokambea ka koko. Kǐpha ndɔ, â tɔ oɓá tamba á keúka.

⁴ Ka koɗokanaga ésa, Yéso áomama k'ɔ́ɓɛɛ á iɓo. Ɓagoigi ɗáɓákáúbi gǎkɛ gea ande yɛ.

⁵ Mpɔ Yéso, áǒngoɗea gea: «Ɓaniki nde ca! Ɓona kema á koea?» Ɓáonsikisia: «Ɓɛɛndɔ.»

⁶ Yɛ, áǒngoɗea gea: «Makani mɔaɓɔ nci á njaga á mǔku á koko, ɓokambande.» Ɓâ gǎkɛ omaka ú, ɗáɓákátú ye na ɓukpɛkpɛ á ɓǒta í ka nyɔngɔ á ɓika á ɓasú kau.

⁷ Mpɔ, ngoigi nde Yéso ɗánkondi áongoɗea Pɛ́tɛɛ: «Mɔkɔta aámbé!» Ɓî Simɔ́ni-Pɛ́tɛɛ aɔ́ki gea: «Mɔkɔta aámbé», â goto ɔɔ́la bɔngɔ nɛkɛ á k'égogo nga, ɗáphúi ú. Áoguia ka iɓo.

⁸ Ɓagoigi ɓundɔ ɓuangbo ɓâ ndiu obika ka koko na ɓáoɓota moaɓɔ n'atúmi na ɓasú. Ɓɔ, ɗáɓákátú ɗanga n'ɔɓɛ̌, ɓea mɛtɛ́ɛ mia moci (100).

⁹ Ɓî ɓájabi kubi, ɓáɔɔna mokati na ɓasú na ɓábisi gǔ á eká n'aǒtoɓoaga.

¹⁰ Wa, Yéso áǒngoɗea gea: «Óbikani na ka ɓasú nde ɓo ye na ɓɔ̌ɔphi.»

¹¹ Cɔ, Simɔ́ni-Pɛ́tɛɛ áokambea ka koko, áoɓota moaɓɔ kubi n'atúmi na ɓasú ángbóngbó mia moci nkama ɓɔku na isaɔ (153). Nanga ɓasú ɗáɓáɓiki, moaɓɔ ɗákábomoki gǎkɛ.

¹² Yéso áǒngoɗea: «Bikani ɓóeɛgɛ.» Nna na ka ɓagoigi nde ɗákini úsia akɛ te: «Omande ani?» Nga, ɗáɓáúbi gea ande Mɔkɔta.

¹³ Mpɔ Yéso áɔsɛkɛɗa bíbí aɓɔ, áɔbɛɗa mokati, áǒgabea. Â phɔtɔ ɔbɛɗa ɓasú áǒgabea.

¹⁴ Nndɔ ɗátú ye mɔngɔ á ko isaɔ ka Yéso sɛnɛkɛa á ɓagoigi mbusa á jujúka akɛ sɔsɔɓɛ á ɓasí.

Yéso aɔyɔngaga na Pɛ́tɛɛ

¹⁵ Mbusa á eaga, Yéso áomúsia Simɔ́ni-Pɛ́tɛɛ gea: «Simɔ́ni, muna Yoáni, omokondi kɔ̌nyɛ́nya ɓunde?» Pɛ́tɛɛ áonsikisia: «Eya Mɔkɔta oúba gea nekokondi.» Yéso áongoɗea: «Ámbá ɓaniki á mɔgɔgɔ nɛmɔ.»

¹⁶ Mpɔ, â goto omúsia mɔngɔ á ko iɓɛ: «Simɔ́ni muna Yoáni, omokondi?» Áonsikisia: «Eya Mɔkɔta oúba gea nekokondi.» Yéso áongoɗea: «Ámbá ɓamɔgɔgɔ nɛmɔ.»

¹⁷ Áomúsia mɔngɔ á ko isaɔ: «Simɔ́ni muna Yoáni, omokondi?» Pɛ́tɛɛ áɔɓɛa nga, Yéso ɗámúsi ka mɔngɔ á ko isaɔ: «Omokondi?» Mpɔ áonsikisia gea: «Mɔkɔta, oúba kema bui. O tɔ oúba gea nekokondi.» Yéso áongoɗea: «Ámbá ɓamɔgɔgɔ nɛmɔ.

¹⁸ Nekongoɗi ɗoni gea, mbenɔ nde ɗótú moganda, ɗótú ɔ̌ɓɔɛa aégba ndeakɔ sasakɔ. Ɗótúoga ɔma nde ɗótúokonda. Cɔ, mbenɔ nde oɓande gǎkɛ phomi, onanoagande njaga akɔ, nkpa ɓaangbo akɔɓɔɛande aégba nɛkɔ na gǎ akɔ ně ɔma nde kókóndɛku gǎ.»

¹⁹ Yéso ɗáyɔngi ɓó ka phangia nkókó á kukuwa nde Pɛ́tɛɛ akuwande, ka ombisa á Mokonga. Mpɔ Yéso áongoɗea Pɛ́tɛɛ: «Ómoɓea.»

Yéso na ngoigi nde ɗánkondi

²⁰ Ɓî Pɛ́tɛɛ aɔnji mbusa, áɔmɔna ngoigi nde Yéso ɗánkondi n'aobika mbusa. Ngoigi nde ɗátúomúsiaga Yéso něgimisi ka ɓokuɓa akɛ mbɛnɔ nde ɗáɓátúoeaga gea: «Mɔkɔta, ani mmbé aɔtɔngaeka?»

²¹ Mbenɔ nde Pɛ́tɛɛ amɔni, áongoɗea Yéso te: «Mɔkɔta! Cɔ, mmbé aɓáeka ɓo?»

²² Yéso áonsikisia: «Kaɓɛ na nekondi gea áendɛ na ka ɓî nebikande, nɛkɔ kau ande eke? Oɓɛ, ómoɓeá!»

²³ Nyɔngɔ ndɔ áɔɛmba ka kecue á ɓadakɛ ɓáɓêki gea, ngoigi ndɔ kákuwɛku. Cɔ, Yéso ɗákángonɗi gea: «Kákuwɛku.» Ɗáyɔngi ndiu: «Kaɓɛ na nekondi gea áendɛ na ka ɓî nebikande, nɛkɔ kau ande eke?»

²⁴ Cɔ, a tɔ ngoigi ndɔ aámbé aɗigimisi nyɔngɔ ndɔɔ. Yɛ, áoɗundua ú. Ɓesu, ɓeoúba phɔtɔ gea ɗigimisa á nyɔngɔ ndɔ ande ɗoni.

²⁵ Yéso ɗátɔtɔkisi goto kema nɛngbo ásii. Atúoɓá na ɗáɓáɗundu nyɔngɔ moci-moci, nekanisi te, mokonda nde bui atóɓande ábɔa na kema nde ɓáɗundu suɓi í.