Yoáni 2 - Ɔngana á Kɛ̌kɛ

Yéso agaí iɓo ka divai

¹ K'ésa á ko isaɔ mbusa í, ɗáɓábiki n'ɛkɛka ka Kána nji moci á ka Galiláya. Amakɛ na Yéso ɗá gǎkɛ wa.

² Ɓâ phɔtɔ ɔmɔphana Yéso na ɓagoigi nɛkɛ k'ɛ́kɛka kau.

³ Cɔ, na ɓá phɔ́tɔ k'ɛ́kɛka, divai áosia. Kaɓondɔ, amakɛ na Yéso áongea: «Ɓáká ye na divai.»

⁴ Yéso â gǎkɛ onsikisia: «Ayi, nyɔngɔ sina nde ɓen'oɓɛ kau? Mbenɔ nɛmɔ kájúmbɛ.»

⁵ Mpɔ, amakɛ áǒngoɗea ɓabɛɗanigi-ɛ́kɛka: «Geani tɔ kema bui nde anóngoɗeande.»

⁶ Cɔ, ɗáɓátú gǎkɛ wa na mbikiɓo ngianjaga (6) nnde ɓáconji n'etae. Ɓayúda ɗáɓátú ǒsokosa n'iɓo á suɓi í ka nyɔngɔ á esomba á sokosea á ɓojeɗe nɛɓɔ. Mbikiɓo ndɔ ɗá gǎkɛ otúma na ngbanda mia moci na nkama ɓɔku (150).

⁷ Yéso áǒngoɗea ɓabɛɗanigi: «Túmisani mbikiɓo ndɔ na iɓo.» Ɓáotúmisa ú, pu!

⁸ Áǒngoɗea: «Dogani kau ábɔa kɛ̌kɛnde, ɓógɛ ně mosá á mǒko-ɛ́kɛka.» Ɓáogea ɓó.

⁹ Ɓî mǒko-ɛ́kɛka akengi iɓo ndɔ, n'ěgaí ka divai. Yɛ, kaúbɛ gǎkɛ ɓî divai ndɔ atóki. Ɓabɛɗanigi ɗáɓá gǎkɛ oúba nga, ɓɔ ɓáunge ɗáɓádogi ú. Yɛ, áɔmɔphana mǒko-ɛ́kɛka,

¹⁰ áongoɗea: «Ɓakpa ɓɔbu ɓá phɔ́ kǒɓopha ɓato á ɛkɛka makana nde aánjá phɛɛ mosá-mosá. Mbusa á noa í ásii, ɓáǒɓopha mokongo. Cɔ, oɓɛ obisi gǎkɛ tɔ makana nde aánjá phɛɛ mbusa!»

¹¹ Nndɔ, ɗátú mphangiɔ á ketangaɔ á k'ama mosá-mosá ndea Yéso, nnde atɔtɔkɛani ka Kána á ka Galiláya. Yéso ɗáphangi ně base ɓoombia nɛkɛ. Kaɓondɔ, ɓagoigi nɛkɛ ɓáomɓeekea.

¹² Mbusa á wa, Yéso áoga na Kapɛɛnaúmu, kimoci na amakɛ, ɓana-amakɛ, na ɓagoigi nɛkɛ. Ɓáoika kó k'ésa ábɔa.

Yéso ěɓǐgi ɓasombisigi nkumba k'éndu á Mokonga

¹³ Cɔ, ɓî esa á jaí á Pasáka ndea Ɓayúda ɗá ye tɔ bíbí, Yéso áoga na Yɛusalɛ́ma.

¹⁴ Áongia k'éndu á Mokonga, áǒdonda ɓasombisigi ɓangɔmbɛ, ɓamɔgɔgɔ na ɓamboe. Â phɔtɔ ǒdonda ɓaánganisigi-imɔna na ɓáiki ka mɛja nɛɓɔ.

¹⁵ Kaɓondɔ, Yéso áɔɓɔngisaga gbútu na ngoi. Áǒɓeaga ɓakpa ɓɔbu ka nsɛngɛ éndu ndea Mokonga, na ɓangɔmbɛ na ɓamɔgɔgɔ nɛɓɔ. Áophanja imɔna ndea ɓaánganisigi-imɔna ka oɗo, â phɔtɔ okpúngbumisa mɛja ɗanga-ɗanga nɛɓɔ.

¹⁶ Áǒngoɗea ɓasombisigi-ɓamboe gea: «Caa! Ótokisani ɓamboe nde wani.» Â goto ǒgea: «Ɓókogaíɛmbɛ endu ndea Abɛ k'éndu á sombisaga á nkumba.»

¹⁷ Ɓagoigi nɛkɛ ɓâ ye tɔ okanisia nyɔngɔ nde ɓáɗundu suɓi á Ɓuku á Mokonga ɓe: «Mokonga hoo! Ekondi á k'éndu nɛkɔ, ande ɓea nsa n'aǒtoɓoaga suɓi ani.»

¹⁸ Mpɔ, ɓakɔta á Ɓayúda ɓáomúsia gea: «Ona mphangiɔ á ketangaɔ sina ka úbisa asu gea, ona kɔkɔta á tɔtɔkisa á kema nde?»

¹⁹ Yéso áǒsikisia: «Uɗáni endu á Mokonga nde, nɛphɛkande ú k'ésa isaɔ.»

²⁰ Ɓayúda ɓâ gǎkɛ omúsia gea: «Ɗáɓáphɛ̌ki endu ndea Mokonga nde ka ɓasaga nkama gena na ngianjaga (46). Cɔ, ɔɔtɔka n'omesi ú k'ésa isaɔ tɔ?»

²¹ Endu ndea Mokonga nde Yéso ɗáɔyɔnga nyɔngɔ í, ɗátú ndiu nyama akɛ.

²² Mbusa á jujúka á Yéso ka kukuwa, ɓagoigi nɛkɛ ɓáokanisia gea ɗáyɔngi nyɔngɔ ndɔɔ. Ɓáoɓeekea nyɔngɔ nde Yéso ɗěngoɗi, n'índe ɓáɗundu ka phɔakɛ suɓi á Ɓuku á Mokonga.

Yéso aoúba kema bui á ka suɓi á měma á nkpa

²³ Cɔ, ka matú ndɔ ɓî Yéso ɗátú na Yɛusalɛ́ma ka jaí á Pasáka, ɓakpa ɓásii ɓáomɓeekea, ka nyɔngɔ á ɔna á ketangaɔ nde ɗáɔtɔtɔkisa.

²⁴ Yéso ɗákábisi gǎkɛ měma akɛ ka ɓɔ, ka nyɔngɔ nde ɗáěengekisi ɓɔbu ánjá.

²⁵ Nga, ɗákátú na siki á nkpa ka tɔ̌miaga akɛ nyɔngɔ ndea ɓakpa, ɓî yɛ sasakɛ ɗáúbi ye měma aɓɔ.