Yoáni 19 - Ɔngana á Kɛ̌kɛ

¹ Mpɔ, Pilátɔ áososea gea, ɓángɛ na Yéso ka ɓinda akɛ.

² Ɓato émani ɓáooka kuku á ngenge, ɓáomakea ka mɔ̌ akɛ. Ɓâ phɔtɔ ɔmɔ́lisa bɔngɔ ánjɛ.

³ Ɓáɔsɛkɛɗa bíbí akɛ, ɓáongoɗea: «Moamɛ ndea Ɓayúda, samba!» Ɓáontaiaga ka ngaga.

⁴ Pilátɔ â goto ojuana, áǒngoɗea ɓakpa: «Cɔ, neonjuanisa Yéso ka úbisa anu gea, kɛɔni nyɔngɔ ájeɗe nde akeni ka tena á nyɔngɔ nɛkɛ akpɛ.»

⁵ Mpɔ, Yéso áojuana n'aɔ́li kuku á ngenge phɔtɔ na bɔngɔ ánjɛ. Pilátɔ áǒngoɗea: «Nkpa ndɔ, a yɛ.»

⁶ Ɓî ɓagbɛga á ɓatobeigi-phɛ́a na ɓabɛɗanigi nɛɓɔ ɓámɔni Yéso, ɓáɔyɔnga n'ɛsɔ akpɛ gea: «Nkɔkɛagani ka moyangɔ! Nkɔkɛagani ka moyangɔ!» Pilátɔ â gǎkɛ ǒgea: «Ngani ně ɓenu sasanu, ɓɔ́nkɔkɛɛgɛ ka moyangɔ. Nga, kɛ́ɔni nyɔngɔ ájeɗe nde akeni ka tena á nyɔngɔ nɛkɛ akpɛ.»

⁷ Ɓayúda ɓáonsikisia: «Ɓesu, ɓena ɛɔphi. Ka ɓeana n'ɛɔphi ndɔ, akeni ákuwɛ ka nyɔngɔ nde agi te, ande Muna-Mokonga.»

⁸ Ɓî Pilátɔ aɔ́ki ye nyɔngɔ ndɔ, â goto oɓá na kɔɓɔɓɔkɔ phɛɛ.

⁹ Â goto ongia k'éndu, áomúsia Yéso: «Otókima wani?» Yéso kansikisiɛ gǎkɛ ka nyɔngɔ.

¹⁰ Mpɔ Pilátɔ â goto omúsia: «Kóna ka nyɔngɔ á sikisia ani? Kóoúba gea, nena kɔkɔta á ɗeketa akɔ, ne phɔtɔ na kɔkɔta á kusa akɔ ka moyangɔ?»

¹¹ Yéso áonsikisia: «Kóná ka kɔkɔta gǔ ani, na nna tɔndɔ nnde ɓákophi ka toka na koba. Kaɓondɔ unge, nkpa nde amobisi ka njaga akɔ, ɓojeɗe ínɛkɛ anyɛ́nyɛi nɛkɔ.»

¹² Ka mbenɔ ndɔ tɔ, Pilátɔ áokaɓa ɗeketa á Yéso. Ɓayúda ɓâ gǎkɛ ɔyɔnga n'ɛsɔ akpɛ gea: «Aoɓá n'onɗeketi nkpa nde, kó gǎkɛ dakɛ na moamɛ á Ɓalɔ́ma. Nkpa buakɛ mmbé ěɗokomisi gea ande moamɛ, ande mɓiɓia á moamɛ á Ɓalɔ́ma.»

¹³ Ɓî Pilátɔ aɔ́ki ye nyɔngɔ ndɔ, áonjuanisa Yéso, áoika ka kankaanga á nteni-nyɔngɔ, k'ɔ́ma nde ɓáɔɔphana ka Kiɛbulanía Gabata, ande gea, Mɓombe á ɛtɛ.

¹⁴ Ɗátú esa á ɓɔngisiaga jaí á Pasáka, bíbí á kantende. Mpɔ Pilátɔ áǒngoɗea Ɓayúda: «Cɔ, Moamɛ nɛnu a yɛ.»

¹⁵ Ɓâ gǎkɛ ɔyɔnga n'ɛsɔ akpɛ gea: «Ákuwɛ! Ákuwɛ! Nkɔkɛagani ka moyangɔ!» Pilátɔ áǒɓúsia: «Ande gea te, nɛ́nkɔkisɛgɛ moamɛ nɛnu ka moyangɔ?» Ɓagbɛga á ɓatoɓeigi-phɛ́a ɓáonsikisia te: «Ɓéké na moamɛ ɓaangbo, tɔndɔ moamɛ á Ɓalɔ́ma!»

¹⁶ Pilátɔ áombisa Yéso ka njaga aɓɔ gea, ɓánkɔkɛɛgɛ ka moyangɔ. Mpɔ, ɓato émani ɓâ ye tɔ onga ně.

Ɓato émani ɓáɔnkɔkɛaga Yéso gǔ á moyangɔ

¹⁷ Yéso áokumba moyangɔ nɛkɛ, áɔmɛa, áoga ɔma nde ɓáɔɔphana ka Kiɛbulanía Gɔlɔgɔta ande gea, Gangata.

¹⁸ Ɔma ndɔ unge ɗáɓánkɔkɛigi Yéso ka moyangɔ. Ɓâ phɔtɔ ɔ̌kɔkɛaga ɓakpa ɓaɓɛ kimoci na yɛ, moci ka njaga á mǔku, ɓaangbo ka njaga á nkei. Yéso áoɓá sɔsɔɓɛ aɓɔ.

¹⁹ Pilátɔ â phɔtɔ oɗundusa gǔ á gáo, áobisa ú ka moyangɔ. Ɗáɗundu gǎkɛ ɓe: YÉSO ƁA NAJALƐ́TI MOAMƐ NDEA ƁAYÚDA.

²⁰ Cɔ, Ɓayúda ɓásii ɓáotanga ɗundua ndɔ, ka nyɔngɔ nde ɔma nde ɗáɓánkɔkɛigi Yéso ɗátú bíbí á ntanga-nji na ɗáɓáɗundu gǔ á gáo ndɔ ka Kiɛbulanía, Kilatíni na Kigiíki.

²¹ Cɔ, ɓagbɛga á ɓatobeigi-phɛ́a ndea Ɓayúda ɓáongoɗea Pilátɔ: «Kóɗunduɛmbɛ, Moamɛ ndea Ɓayúda.» Ɗundua ndiu: «Nkpa nde ɗági te, nende Moamɛ ndea Ɓayúda.»

²² Pilátɔ â gǎkɛ ǒsikisia: «Nnde netóɗundu, ɓágoɓi ye na ɓáɗundu.»

²³ Ɓî ɓato émani ɓánkɔkɛigi ye Yéso ka moyangɔ, ɓáɔbɛɗa nkanjo nɛkɛ, ɓáokatisana ka phaeka gena. Ɓáogabeana ú, phaeka moci ka nkpa moci. Ɓâ phɔtɔ ɔbɛɗa bɔngɔ-éndǎ nɛkɛ, nnde ɗáɓáphophi tɔ gǔ na kusi, kángá á jukanisaga í.

²⁴ Kaɓondɔ, ɓato émani ɓáɔyɔngaga sɔsɔɓɛ aɓɔ te: «Ɓɛ́ɓɛtɛni ndiu ɓana-mɛlɔɛ ka phɔa nkanjo ndee, ka úba á nkpa sina abɛɗande.» Ka gea, nyɔngɔ nde a suɓi á Ɓuku á Mokonga átɔtɔkɛanɛ ɓe: «Ɗáɓákatisanigi bɔngɔ nɛmɔ sɔsɔɓɛ aɓɔ, ɓâ phɔtɔ ɔɓɛta ɓana-mɛlɔɛ ka phɔa bɔngɔ-éndǎ nɛmɔ.» Ɓondɔ unge ɓato émani ɗáɓági.

²⁵ Cɔ, amakɛ na Yéso, mɔtɔ-amakɛ, Malía nka Kleɔpási na Malía nseka á ka Magadála ɗáɓámamege bíbí á moyangɔ ndea Yéso.

²⁶ Yéso áɔmɔna amakɛ, â phɔtɔ ɔmɔna ngoigi nde ɗánkondi n'aiki bíbí á amakɛ, áongoɗea amakɛ: «Ayi, anakɔ aámbee.»

²⁷ Áongea ngoigi ndɔ: «Amakɔ aámbee.» Na ka kpanga á mbenɔ ndɔ tɔ, ngoigi ndɔ áonga ně mɔtɛ-akɛ.

Yéso aku

²⁸ Mbusa índɔ, Yéso áoengekisa gea, moangɔ bui así. Ka gea ɓoabi nde a suɓi á Ɓuku á Mokonga átɔtɔkɛanɛ, áogea: «Neku n'ɛnyɔta.»

²⁹ Wa, ɗátú gǎkɛ na ntuka n'atúmi na divai nde aángai-ngai. Ɓato émani ɓáoubia siphɔngɔ suɓi í, ɓáokpatikisa ka sese á ntabi á me nde ɓaɔɔphana ka kisambaye isɔpɔ, ɓáotáisa bíbí á aphenɔkɔ á Yéso.

³⁰ Ɓî Yéso amúmi ye ú, áogea: «Cɔ, así.» Áɔtúmanisaga mɔ̌ akɛ, áɔɗɔɛa.

Nto émani antúmi Yéso n'ekonga ka mpambá

³¹ Cɔ, esa ndɔ ɗátú esa á ɓɔngisiaga á saɓáto. Kaɓondɔ ɓakɔta á Ɓayúda ɗáɓákáokonda saɓáto ádondɛ mǒnda á ɓakpa ka moyangɔ nga, esa á saɓáto ndɔ, ɗátú esa ángbó phɛɛ. Wa, ɓáomɛma Pilátɔ gea, áesoseɛ ɓakpa ɓáɓunɛgɛ ecinji á ɓunde ɓá ka moyangɔ na ɓáephúiɛ.

³² Ɓato émani ɓáoɓúnaga ecinji á nkpa á k'ama mosá-mosá, mpɔ nnde á mmbé á ko ɓaɓɛ ɓunde ɗáɓátú ka moyangɔ kimoci na Yéso.

³³ Ɓî ɓándondi gǎkɛ Yéso, ɓáɔɔna gea, a ye ku. Ɓákamɓunɛgɛ ye ecinji.

³⁴ Ka ɓato émani â gǎkɛ ontúma Yéso n'ekonga ka mpambá, mɔngɔ ímoci iɓo na magia áojuana.

³⁵ Nkpa nde ɗáɔni nyɔngɔ n'íso akɛ aámbé aɗigimisi nyɔngɔ ndɔ. Nyɔngɔ nde aɔtɔmia ande ɗoni. Yɛ, aoúba gea a tɔ ɔyɔnga ɗoni. A gǎkɛ ɔyɔnga ɓó ka gea ɓenu phɔtɔ ɓóɓeekeɛ.

³⁶ Cɔ, kema ndɔ bubui atɔtɔkɛani tɔ ɓíndɔ ɗáɓáɗundu suɓi á Ɓuku ndea Mokonga gea: «Ɓákáɓunɛeka ka nkua akɛ.»

³⁷ Ɓáɗundu goto suɓi á ɓuku gea: «Ɓámɔnande mmbé ɗáɓántúmi.»

Yɔsɛ́phu na Nikɔ́dɛ́mɔ ɓámúmbi Yéso

³⁸ Mbusa índɔ, Yɔsɛ́phu, nto á ka Alimatɛ́a ɗátú ngoigi ndea Yéso ka ɓɔsɔmɛa nga, ɗáǒɓanga ɓakɔta á Ɓayúda. Yɛ ɗábiki ɔmɛma Pilátɔ gea, átokisɛ mǒnda á Yéso gǔ á moyangɔ. Pilátɔ áoɓeekea. Mpɔ, Yɔsɛ́phu áoga ophúia mǒnda akɛ.

³⁹ Nikɔdɛ́mu mmbé ɗábiki phɔ́ mɔtɛ á Yéso kǐpha, â phɔtɔ obika n'akumbi nkoki n'adaɗu na údi. Ɓoɗoko í n'aɓea nkama isaɔ (30).

⁴⁰ Cɔ, Yɔsɛ́phu na Nikɔdɛ́mu ɓáoɓóaga mǒnda á Yéso na sanda, ɓáoɗukiaga nkoki kau ɓíndɔ ɗátú asii ndea Ɓayúda ka úmba á ɓakpa.

⁴¹ Ɔma nde ɗáɓánkɔkɛigi Yéso ka moyangɔ, ciko moci ɗátú wa. Suɓi á ciko ndɔ, bóta moci á kɛ̌kɛ ɗátú wa, na ɓákámúmbimbɛmɔnɔ nkpa kau.

⁴² Ka nyɔngɔ á ɓɔngisiaga esa á saɓáto na ɓî bóta ɗátú bíbí, ɓáoúmba mǒnda á Yéso wa.