Yoáni 17 - Ɔngana á Kɛ̌kɛ

Yéso aɔmɛma ka phɔa á ɓagoigi nɛkɛ

¹ Mbusa á Yéso yɔnga ɓó, áɔɛnjia na koba, áɔyɔnga ɓe: «Abɛ, mbenɔ ajú, nɗokomisa Anakɔ gea te, Anakɔ ákoɗokomisɛ.

² Nga, ɗómophi kɔkɔta gǔ á ɓakpa ɓɔbu ka gea, éɓophɛ enda á mɛyɔ, ɓunde ɗómophi.

³ Enda á mɛyɔ ndɔ, ande úba akɔ gea, oɓɛ sasakɔ aámbé onde Mokonga ɗoni, na úba á Yéso Kiísito mmbé ɗónteki.

⁴ Ɗéoɗokomisi ka mokonda ka nyɔngɔ nde, ɗɛ́gɔɓi ekuma nde ɗómopi.

⁵ Cɔ, Abɛ, kɛ̌kɛnde, ómopa ɓoombia nde ɗétú ně bíbí akɔ mosá á conjá á mokonda.

⁶ Ɗéúbisi ina akɔ ka ɓakpa íɓunde ɗɔ̌sɔmbu ka mokonda, ômopa. Ɓakpa ndɔ, ɗáɓátú ɓuakɔ, ômopa, ɓáoamba nyɔngɔ nɛkɔ.

⁷ Kɛ̌kɛnde, ɓáúbi ye tɔ gea, kema bui nde ɗómopi, ɗátóki mɔtɛ-akɔ.

⁸ Nga, ɓoabi nde ɗómopi, ɗɛ̌tɔ̌mi, ɓáoɓeekea ú. Ɓáúbi ɗoni gea, netóki mɔtɛ-akɔ. Ɓáoɓeekea gea, oɓɛ aámbé ɗómoteki.

⁹ Ka nyɔngɔ aɓɔ unge, nɛɔkɔmɛma. Nna gǎkɛ ka nyɔngɔ á ɓakpa ɓɔbu á ka mokonda, tɔndɔ ɓunde ɗómopi, nga, ɓánde ɓakpa nɛkɔ.

¹⁰ Kema nɛmɔ bui, a tɔ akɔ. Kema nɛkɔ bui, a gǎkɛ tɔ amɔ. Nena ɓoombia ka nyɔngɔ aɓɔ.

¹¹ Ké ye ka mokonda, nege mɔtɛ-akɔ, ɓɔ ɓáunge ɓá phɔ́tɔ ka mokonda. Abɛ, nto á kanga ɓojeɗe, óamba ɓɔ ka ɓukpɛkpɛ á ina akɔ. Ina ndɔ ɗómopi ka gea, ɓakpa nɛsu ɓáɓɛ kimoci, ɓíndɔ oɓɛ n'eme ɓe kimoci.

¹² Ɓî ɗétú kimoci na ɓɔ, ɗéǒamba ka ɓukpɛkpɛ á ina akɔ, ina ndɔ ɗómopi. Ɗéambi phɛɛ, ka ɓɔ kaɓúngɛgɛ, tɔndɔ mmbé ɗákeni áɓungɛgɛ, ka gea te, moangɔ á Ɓuku á Mokonga átɔtɔkɛanɛ.

¹³ Cɔ, kɛ̌kɛnde, nege mɔtɛ-akɔ. Neyɔngi ɓó na ne phɔ́tɔ ka mokonda ka gea, maseye nɛmɔ átúmɛ suɓi aɓɔ pú!

¹⁴ Eme aámbé ɗéɓophi nyɔngɔ nɛkɔ, ɓato á ka mokonda ɓáǒkangea ka nyɔngɔ nde, ɓáná ɓato á ka mokonda ɓíndɔ eme ké nto á ka mokonda.

¹⁵ Kɛ́ɔmɛmi gea te, óphúiɛ ɓakpa ndɔ ka mokonda. A ndiu gea, óambɛ ɓɔ na Ntombigi.

¹⁶ Ɓáná ɓato á ka mokonda, ɓíndɔ eme ké nto á ka mokonda.

¹⁷ Ósokosea ka koɗoni, nyɔngɔ nɛkɔ aunge ande ɗoni, ɓéyameɛ ka phɔa akɔ ka ɗoni.

¹⁸ Ɓíndɔ ɗómoteki ka mokonda, eme ɗěteki phɔtɔ ka mokonda.

¹⁹ Ka nyɔngɔ aɓɔ unge, něyamei buani k'óɓɛ, ka gea, ɓɔ phɔtɔ ɓáɓɛ ɓakpa nɛkɔ ɗoni.

Yéso aɔmɛma ka phɔa ɓunde ɓámɓeekeaeka ɓɔbu

²⁰ Ké tɔ ɔmɛma ka phɔa ɓundee, a ndiu phɔtɔ ka phɔa ɓunde ɓámoɓeekeande ka ɓeana na ɓɔphɛi nɛɓɔ.

²¹ Nɛɔmɛma ka gea, ɓɔbu ɓáɓɛ kimoci, ɓíndɔ oɓɛ Abɛ osuɓi ani, n'eme suɓi akɔ. Nɛmɛmi phɔtɔ gea, ɓáɓɛ kimoci suɓi asu ka gea, ɓato á ka mokonda ɓáɓeekeɛ gea, oɓɛ aámbé ɗómoteki.

²² Cɔ, eme, něɓophi ɓoombia nde ɗómopi ka gea, ɓáɓɛ kimoci ɓíndɔ ɓe kimoci.

²³ Nɛɔmɛma gea, néɓɛ suɓi aɓɔ, n'oɓɛ suɓi ani ka gea, ɓáɓɛ kimoci ɗoni. Ɓondɔ unge, ɓato á ka mokonda ɓáúbande gea, oɓɛ aámbé ɗómoteki, ǒkondi phɔtɔ ɓíndɔ omokondi.

²⁴ Abɛ, nekondi gea, ɓakpa nde omopi, ɓáikɛ ɔma nde neɓei, ka gea te, ɓáɔnɛ ɓoombia ani. Ɓoombia ndɔ aunge ɗómopi ka nyɔngɔ nde, ɗómokondi mosá á conjá á mokonda.

²⁵ Abɛ, oɓɛ nto á koɗoni, ɓato á ka mokonda ɓáká tanda kokoúba, eme ndiu aámbé ɗékoúbi. Ɓakpa nɛmɔ ɓunde ɓâ phɔtɔ oúba gea, oɓɛ aámbé ɗómoteki.

²⁶ Ɗéúbisi ina akɔ ka ɓɔ na netútuisande úbisa aɓɔ ka gea, ekondi nde oně ka phɔa ani, áɓɛ ka phɔa aɓɔ na eme sasani néɓɛ suɓi aɓɔ.»