Yoáni 16 - Ɔngana á Kɛ̌kɛ

¹ Ɗénóngoɗi nndɔ ka gea, ɓókoɗeketɛmbɛ ɓeekea nɛnu.

² Nga, ɓánoɓeagande k'éndu á madondanɔ ndea Ɓayúda ka nyɔngɔ á Mokonga. Aɓande na mbenɔ nde ɓundɔ ɓánomande, ɓákanisiande gea, ɓáɔmbɛɗaneaga Mokonga.

³ Ɓágeande ɓó nga, ɓákámúbi Abɛ, ɓákámoúbi phɔtɔ eme.

⁴ Ɗénongoɗi gǎkɛ nndɔ ka gea, mbenɔ ndɔ a ye okiɗia, ɓokanisiande gea, ɗénóngoɗi ye. Ɗékénongoɗi nndɔ mosá nga, ɗétú na ɓenu.

Měma á kanga ɓojeɗe aɔbɛɗanaga

⁵ Kɛ̌kɛnde, nege mɔtɛ á mmbé ɗámoteki. Cɔ, ka ɓenu nna gǎkɛ omoúsia gea: ‹Oge wani?›

⁶ Ɓotúmi gǎkɛ na ɓɔmbɛ ɓî nenóngoɗi ye nyɔngɔ ndɔɔ.

⁷ Cɔ, nenóngoɗi gǎkɛ ɗoni gea, atú ánjá ka ɓenu négɛ. Nga, aoɓá na kége, ámbé Nengi kábikɛku mɔtɛ-anu. Cɔ, a gǎkɛ oɓá na nege, nenótekisiande yɛ.

⁸ Ɓî abikaeka, Aěengekisiande ɓato á ka mokonda ka nyɔngɔ á ɓojeɗe, koɗoni na tena á nyɔngɔ.

⁹ Aěengekisiande ɓato á ka mokonda ɓojeɗe, ka nyɔngɔ nde ɓákámoɓeeki.

¹⁰ Aěengekisiande ɓato á ka mokonda koɗoni, ka nyɔngɔ á gǎ ani mɔtɛ á Abɛ na ɓɔ́kɔ́mɔɔnɛku ye.

¹¹ Aěengekisiande ɓato á ka mokonda tena á nyɔngɔ, ka nyɔngɔ nde, ɓá ye teni nyɔngɔ ndea moamɛ á ka mokonda ndee.

¹² Ne goto na nyɔngɔ ásii ka ngoɗea anu. Ɓókó gǎkɛ ɔtɔka na ɓophiphî kɛ̌kɛnde.

¹³ Mbenɔ nde yɛ Měma á ɗoni abikande, anɔsɔndɔɛande k'aphe á ɗoni bui. Káyɔngɛku ka kɔkɔta nɛkɛ sasakɛ, nyɔngɔ bui nde aɔ́kaeka mɔtɛ á Abɛ, a ndiu unge anɔtɔmiande. Anɔtɔmiande nyɔngɔ nde abikaeka.

¹⁴ Yɛ, amoombisande nga, kema nde anɔtɔmiande, atókande ně mɔtɛ-amɔ.

¹⁵ Kema bubui nde Abɛ aně, ande nɛmɔ. Ka nyɔngɔ índɔ unge ɗénongoɗi, kema nde anɔtɔmiande, atókande ně mɔtɛ-amɔ.

Tambaga ěgaiande ka maseye

¹⁶ Ka mbenɔ ábɔa, ɓókómɔɔnɛku ye, cɔ, mbusa á mbenɔ ábɔa, ɓɔmɔɔnande goto.»

¹⁷ Ka ɓagoigi nɛkɛ ɓáɔyɔngaga sɔsɔɓɛ aɓɔ te: «Asongoɗi: ‹ka mbenɔ ábɔa, ɓókómɔɔnɛku ye, cɔ, mbusa á mbenɔ ábɔa, ɓɔmɔɔnande goto.› Phɔtɔ ‹ka nyɔngɔ nde nege mɔtɛ Abɛ.› Kantíti á nyɔngɔ ndɔ a ɓo?

¹⁸ Kantíti á nyɔngɔ nde agi: ‹Mbusa á mbenɔ ábɔa› a ɓo? Nga, ɓékéoengekisa.»

¹⁹ Yéso ɗáúbi gea, ɗáɓáokonda úsia akɛ. Kaɓondɔ áǒngoɗea ɓe: «Ɓookaɓa engekisa sɔsɔɓɛ anu, kantíti á yɔnga nde nɛyɔngi gea: ‹ka mbenɔ ábɔa, ɓókómɔɔnɛku ye, cɔ, mbusa á mbenɔ ábɔa, ɓɔmɔɔnande goto.›

²⁰ Cɔ, nenóngoɗi ɗoni gea, ɓogámande, ɓóoɓá n'oiɔ, ɓato á ka mokonda ɓâ gǎkɛ oɓá na maseye. Ɓotambagande ka měma, tambaga ndɔ ěgaiande gǎkɛ ka maseye.

²¹ Mbenɔ nde nke áoɓá ka ɓoaé, áotambaga ka nyɔngɔ nde ɓoaé andondi. Mbenɔ nde a gǎkɛ koonja, áoɓosea tambaga ndɔ nga, ana maseye á ɓɔkɔtɛana á miki ka mokonda.

²² Ɓenu gǎkɛ, kɛ̌kɛnde ɓo phɔ́tɔ otambaga. Ɓî nɛnɔɔnande goto, ɓoɓande na maseye. Maseye kau, nkpa kánóutɛku.

²³ Esa ndɔ, ɓókómoúsiɛku ye ka kema. Nga, nenóngoɗi ɗoni gea, Abɛ anóphande kema bubui nde ɓɔɔmɛma k'ína ani.

²⁴ Na ka kɛ̌kɛnde, ɓɔ́kɔ́mɛmimbɛ ka kema k'ína ani. Cɔ, mɛmani na ɓɔtɔande, mpɔ, ɓótúmɛ na maseye.

Yéso akíndí mokonda

²⁵ Nɛtɔ́nɔtɔ̌mi kema ndɔ bui ka mɛní, mbenɔ a gǎkɛ obika, nnde kɛ́nɔtɔmiɛgɛku ye nyɔngɔ ka mɛní, nɛnɔtɔmiagande ndiu base, nyɔngɔ ndea Abɛ.

²⁶ K'ésa ndɔ, ɓɔmɛmande Abɛ k'ína ani. Kénóngoɗi te, eme aámbé nɛmɛmande Abɛ ka phɔa anu.

²⁷ Nga, Abɛ sasakɛ anokondi, ka nyɔngɔ nde, ɓomokondi na ɓô phɔtɔ oɓeekea gea, netóki mɔtɛ á Mokonga.

²⁸ Cɔ, netótóki mɔtɛ á Abɛ, néojua ka mokonda. Kɛ̌kɛnde, netóki gǎkɛ ka mokonda, neji mɔtɛ á Abɛ.»

²⁹ Mpɔ, ɓagoigi nɛkɛ ɓáongea: «Cɔ, kɛ̌kɛnde ɔyɔngi base, kángá á yɔnga ye ka mɛní.

³⁰ Kɛ̌kɛnde, ɓeúbi gea, ooúba kema bubui, kóna siki á gea, ɓákoúsiɛgɛ. Kaɓondɔ unge ɓeɓeeki gea, ɗótóki mɔtɛ á Mokonga.»

³¹ Yéso áǒsikisia: «Ɓoɓeeki ye tɔ?

³² Cɔ, mbenɔ aobika, n'a ye tɔ ɓei, ɓî ɓenu ɓɔbu ɓophanjekanande, nkpa na nkpa mɔtɛ-akɛ, ɓóomoɗeketa sasani, ké gǎkɛ sasani nga, Abɛ a kimoci n'eme.

³³ Netónongoɗi nndɔ bui ka gea, ɓóɓɛ na ɓujɛjɛ ka jukana anu n'eme. Ɓotambagande ka mokonda. Cɔ, ɓáni gǎkɛ na nténdé, ne ye kíndí mokonda.»